په‌نا به‌نه‌ لاى كورد و خه‌یر وه‌پى نیه‌توان!!

شفق نيوز

نه‌ ئه‌وه‌سه‌ تویه‌نید پشت وه‌پیان بووه‌سید نه‌یش تویه‌نید به‌ن خوه‌د ئه‌ڕایان شله‌و بكه‌ید. نان خوه‌ر و سفره‌ دڕ، سفڵه‌و حه‌سوید، كینه‌ت له‌دڵ و ناڕه‌سه‌ن، بى شه‌رم و بى ته‌قیه‌. وه‌ل ئه‌وه‌یشا ماڵ كورد ئاوه‌دان ئه‌را ئه‌و سه‌بر و تاقه‌تیه‌ ك هه‌رچى وه‌پى كه‌ن وه‌بان ئه‌وه‌یشه‌و هویر له‌ ئنسانیه‌ت ئه‌كاو نیه‌تواێد ده‌نگ جه‌نگ ومرافه‌ باید له‌وه‌رده‌م ماڵه‌ هاوساى، هه‌میشه‌ وه‌گووره‌ى وژدان جویلیه‌ێدو بانگه‌واز ئاشتى و ئارامى ئه‌كا، وه‌لى وه‌ل ئه‌وه‌یشا هیمان هه‌ق خوه‌ى وه‌ته‌واوى وه‌رنه‌گرتگه‌ ك له‌ده‌ستوور ئى وڵاته‌ چه‌سپیاگه‌.

كورد مه‌رده‌و خاوه‌ن غیره‌ته‌، ئه‌وه‌سه‌ گشت جه‌نگ و ده‌مه‌قاڵیگیش به‌نه‌ ده‌رقاپیه‌گه‌ى و دویاخریش نیه‌ناسنه‌ى! گشت هیز و لایه‌نه‌یل عراقى هه‌وه‌جه‌ وه‌كورد داشتنه‌، هه‌ر له‌دانیشتن ئۆپۆزسیۆن له‌ سه‌ڵاحه‌دین له‌وه‌رجه‌ رمیان رژیم بگر تاڕه‌سیگه‌ دانیشتنه‌یل تر له‌بان میز گفتوگوو له‌هه‌رێم كوردستان، بیجگه‌ ئه‌وه‌یش ئه‌گه‌ر كورد به‌شدار حكوومه‌ت و پرووسه‌ى سیاسى وڵاتیش نه‌ویاتاد شایه‌ت بار ئاسایش و كیشمه‌كیش ناونى لایه‌نه‌یل عراقى له‌یه‌ خراوتر بویاتادو مه‌ردم ئه‌زره‌تمه‌ن تاویگ ئارامى بویاتان، وه‌لى له‌سایه‌ى سه‌ر كوردو هه‌وڵ وه‌یه‌كه‌وناین و ئاشتیخوازانه‌ى، هه‌میشه‌ ره‌سیه‌سه‌ هاناى گشت ناكووكى و گرفته‌یلیگ له‌ناونى هیز ولایه‌نه‌یل عراقى و نه‌یشتگه‌ وه‌ى له‌وه‌ى به‌تر نه‌ود. وه‌لى كى وه‌قه‌درى بزانیگ ! وه‌ختى باس مادده‌ى 140 كریه‌ى هه‌ر لایه‌نیگ كوته‌كیگ نه‌یده‌ ئاو چمانى له‌هه‌قیان بریه‌ێد. یا وه‌ختى نوڕنه‌ ئاڵاى كوردستان چمانى خوه‌ره‌ زه‌رده‌گه‌ى چه‌ویان كوور ئه‌كا. یا وه‌ختى باس فیدراڵى كریه‌ى توان چنگ بنه‌نه‌ هه‌ڵقد! وه‌ى جووره‌ خوه‌یان وه‌خاوه‌ن ماڵ زانن و كوردیش وه‌بیگانه‌و ناهه‌ق زانن له‌بان خاك باوگ وباپیره‌ى خوه‌ى.

ئه‌وه‌سه‌ له‌لایگه‌و هیمان گرفت و كیشمه‌كیش مالكى و عه‌لاوى ته‌واو نه‌ویه‌و هه‌ركامیان فشار بایده‌ بانى په‌نا ئه‌را سه‌ركرده‌یل كورد به‌ن و داواى دانیشتن و گفتوگوو كه‌ن، له‌لایگ تریشه‌و مه‌سه‌له‌ى ده‌سداشتن تارق هاشمى له‌رویداگه‌یل ترۆریستى عراق شڵه‌قانگه‌و تا دویه‌كه‌یش هاشمى دژ كورد و هه‌قه‌یل ره‌واى كورد وسیاو ئیسه‌یش ئه‌وه‌سه‌ په‌نا برده‌سه‌ وه‌ر ئه‌قڵ ئاشتیخوازانه‌ى كورد! دى وه‌ى جووره‌ یه‌كه‌ یه‌كه‌ى وه‌رپرسه‌یل عه‌ره‌ب له‌حكوومه‌ت مه‌ركه‌زى هه‌وه‌جه‌یان كه‌فێده‌ لاى كوردئه‌را چاره‌سه‌ر كیشه‌یلیان و دویاخریش هه‌ر ده‌سیان ره‌سیه‌ بته‌وى و مه‌سه‌له‌گه‌یان یه‌كلاوه‌ بوى خه‌یر وه‌پى نیه‌توان! وه‌لى ئى كاره‌ تازه‌ نیه‌و هه‌میشه‌ حكوومه‌ته‌یل یه‌ك له‌شوون یه‌ك عراق ئى ره‌فتار هه‌ر داشتنه‌و سه‌ره‌تا گشت قه‌وڵیگ وه‌ كورد دانه‌و دویاخریش له‌قه‌وڵه‌یل خوه‌یان په‌شیمانه‌و بوینه‌، هه‌ر له‌وه‌ر ئه‌وه‌یش تویه‌نیم بویشیم ئه‌یانه‌یش هه‌ر یه‌كیگن له‌ ئه‌وان و مه‌سڵه‌ته‌ كوردیه‌گه‌ى خوه‌مانیش ئویشێد"هه‌رچى له‌ مویش بكه‌فێده‌و هه‌وانه‌ دڕێد"، چوینكه‌ هه‌میشه‌ زه‌ره‌د وه‌ ملله‌ت كورد تواستنه‌ نه‌ك خه‌یر.

 

جه‌ماڵ ئه‌ركه‌وازى