ئایا گفتوگوو لایه‌نه‌یل سه‌رئه‌كه‌فێد؟

شفق نيوز

زوورم فراكسیۆنه‌یل سیاسى ده‌سپیشخه‌رى تایبه‌ت وه‌خوه‌یان داشتوون، ك هه‌رچه‌نى ئه‌و ده‌سپیشخه‌رى یا موبادره‌یله‌ له‌روخساره‌و جیاوازى له‌ناونیان كریه‌یده‌ دى، وه‌لى له‌ ناوه‌و گشتیان یه‌ك ئامانج دیرن و ئه‌وه‌سه‌ بڕه‌سنه‌ مێز گفتوگوو.

وه‌ل ئه‌وه‌ هه‌مگه‌ ده‌سپیشخه‌ریه‌، هه‌ر هه‌وه‌جه‌ وه‌گفتوگوو راسكانى كریه‌ێد و بایه‌سه‌ ته‌ماشاى ئه‌و كه‌م و كوڕیه‌یله‌ بكریه‌ى له‌ پرووسه‌ى سیاسى ك هه‌رچه‌نى لایه‌نه‌یل گفتوگوو وه‌یه‌كه‌و ئه‌نجام نیه‌ن و باوه‌ڕیگ په‌یڕه‌وكارانه‌ نیارنه‌ كار. هووكار ئى مه‌سه‌له‌یشه‌ ئه‌وه‌ه‌ ك گشت لایه‌نه‌یل ئه‌و قه‌یرانه‌ وه‌ره‌و ده‌سپیشخه‌رى بكیشێد و ئسپات گه‌ورایى خوه‌ى بكا، له‌لایگ تریشه‌و دوینید كاره‌گه‌ وه‌چه‌واشه‌س، له‌وه‌ر ئه‌وه‌ك هویچ متمانه‌یگ له‌ناونى لایه‌نه‌یل سیاسى نیه‌.

ئنجا ئى قه‌یران متمانه‌ى سیاسیه‌ چه‌ن پرسیاریگ له‌لى كه‌فێده‌و، له‌وانه‌یش: ئایا گفتوگوو سه‌ركه‌فێد له‌باوه‌ت كووتاییهاوردن ئه‌و جیاوازیه‌یله‌و پرووسه‌ى سیاسى خاسى وه‌خوه‌یه‌و دوینێد؟ ئایا زه‌مانه‌تیگ هه‌س ئه‌را ئه‌وه‌ك جاریگ تر فراكسیۆنه‌یل سیاسى ڕوى له‌ ناكوكى و كیشمه‌كیش نه‌كه‌ن و قه‌یران دروس نه‌كه‌ن؟

تائیسه‌ چشتیگ ئاشكرا نه‌ویه‌ ك هیزه‌یل ده‌سڵاتدار نیاز ریككه‌فتنیگ داشتوون له‌بان به‌رنامه‌یگ سیاسى له‌ى باوه‌ته‌و ك وه‌ جووریگ چاره‌سه‌ر فره‌یگ له‌ى رویداگو قه‌یرانه‌یل سیاسى سه‌خته‌ بكا. وه‌ل ئه‌وه‌یشا هه‌واڵ خوه‌شیگ نیه‌ ئه‌را ئه‌وه‌ك ئه‌و هیزه‌یله‌ تواناى ئه‌وه‌ داشتوون وڵاته‌گه‌ له‌ى حاڵه‌ت قه‌یرانه‌ جیواز بكه‌ن ئه‌را حاڵه‌تیگ پڕ له‌ ئاسایش و سه‌قامگرتن و له‌هه‌مان وه‌خت چشتیگ نیه‌ ئشاره‌ت ئه‌را ئه‌و متمانه‌ى شاریاگه‌ بكا ك هه‌یشت ساڵه‌ گومه‌و له‌ناكاو له‌بان مێز گفتوگوو خوه‌ى بوینێده‌و. له‌ڕاسى ئه‌و سیاسه‌ت پاڵه‌وانیه‌تیه‌ وه‌ گووره‌ى ساڵه‌یل گوزه‌یشت كه‌فته‌ وه‌رچه‌ومان، ره‌نگ و بوو فره‌ ناخوه‌شیگ به‌خشیه‌ پیمان ك تائیسه‌یش هه‌ر هه‌مان جووره‌و نیگه‌رانى فره‌یگیش له‌لاى هاووڵاتیه‌یل دروس كردگه‌و هه‌ر له‌وه‌ر ئه‌وه‌یش دوینێد هس وه‌ ئاسایش و دڵنیایى و ئاسووده‌یى ناكریه‌ێد.

هه‌ر له‌وه‌ر ئه‌وه‌یش لایه‌نه‌یل سیاسى ئمڕوو له‌ى وڵاته‌ هه‌وه‌جه‌ وه‌ دانیشتن و گفتوگوو دیرن جویر ئاشتیكردن جه‌نگ ، بیگومان تویه‌نیم بویشیم: یه‌یش دویا ئه‌زموونیگه‌ ئه‌را ئه‌و هیزه‌یل سیاسیه‌ ك خوه‌یان له‌ده‌سڵات دویننه‌و، ك ئایا تا چه‌نیگ ئاماده‌ن چاره‌سه‌ر ئى قه‌یران سه‌خته‌ بكه‌ن و ئاسایش و سه‌قامگیرى بارنه‌و ئه‌را وڵاته‌گه‌ له‌سایه‌ى ژیانیگ ئاسووده‌.

 

یاسر ئه‌لسالم