« ناونی »

شفق نيوز


ـ ممو سه میر اشلونک؟ شنو خه بر؟
ده سه یلێ چۆ ئه سیر هێز دیادوو ئشاره کردیا، ک یانێ «هۆچ». هه گێ پرسیام «شنو اوضاع ؟» کلێگه یلێ له خوه ر سزیای خوه ی وه پووسێ ئاسمان کیشیاد ک یانێ «کاو و ساف».
ئاو رووژه یله ئاسمان کاو بی. وه گه ردێ چه ن گلێ ئاورێ بێ نیشتمان ک وه گژه ی وای له مه رز دیانه ده یشت و بیانه عه رب. ئیکه ش له گژه ی وای تر گلا خواردیان.
ـ هه وای خوه شێگه! مه مو بخوه ن.
جوورێ خوه نی ک سه ر بردمه ناو سیناو بێ ده نگ قیژانم. ئاو ئه سره یلێ ژیرێ پووسم نیه یونیا. مه گه ر بوو بۆشی نێ یه. باوگم هه میشه وه تیا وه لای غه ریبه گیره نه که. منیش هۆچ جارێ سفره ی دلم واز نه کردم چۆن لافاو بردیاده مان، ئمجا قسه قسێگیش له چاوه یلم که فتیاده ده یشت. مه مو سه میر مچێ ده سێ چۆ به ساینێ شێر فه له که ی پادێگان له ناو هه وا خر دیا، ک یانێ «چه ده کوره گه م؟». نورینێ چۆ باوگه یل بی !
خه تیان ره سێ ئمجا دلم ته نگ بییه ئه رایان. مه مو غه ریبم لێره. له که س و کارم بی خه ورم. لێره ئایم خیال ک هاناو قه فسێگ و دلێ وه ده ر و دیوارێ سینێ کوترید.
یانه وه قسه نه وه تم. وه نوورین و دوو قه تره ئه سرێ بێ تاقه ت وه تم ک هه له پله وه گه ردێ «هۆچم نییه مه مو، خاسم» رشیا. هۆکاره بۆم چۆ پییا، ده ربه نێ سه ختی نه یومن. ئه مان پاییز ک هاته وه را چشتێ وه مه مو سه خت گردۆ.
ـ چه ده مه مو؟ وه سه رێ فرم نید.
مه مو خه نێ تیه لێ کردوو وه ژێر جوواو خه نه یلێ وه خت و بێ وه ختم ده رچیا. خیال کردیام درێ د ێده ژێر قاول و قه رارێ پیاوه تیمان. مه گه قرار نیه و فه قه ت خوه شمان بوودو نه یلیم ئی ناونی بێ پدره دیوارێ راسکانیگ بوو ک هه روه خت خوه مان تووایم به رزا بوو.
مه مو سه میر شووانێ ولاتێ هنازێ ناونی بی و وه سه رو ده مچاوێ دیار بی چوو به سیده زگ. که س و کارێ ژنێگ بی و شه ش منال، ی گله یش له زگ داشت. شاو سه ر نییاده بان کووچگ. ئه مان یه چشتێ نه یو ک مه مو گیر بخێ. مه مو قورس و چه میا رێ کردیا. سه رێ خوه ێ چۆناو کردیاده خوار ک چناکه ی لۆچ لۆچ و سقانیێ وه زه یو ره سیا.
دلم گیریاو. خیال کردیام هه ئی ی رووژه سه سوو ک بای سه ر حالاو بوو. ئه مان هه رجار به تر له هه میشه ره نگێ و رۆ یێ په ریاد. چاوه یلێ منسیاده ئه سیرێ ک تفه نگ نایونه وه ر ده مچاویو کلگێ هرشه له بان ماشه گێ بوو. تا وه گولێگ تف بکیده ده مچاوێ ئیکه ش وه هۆچێ په تی کلێ بکێده سۆکێ قاورسان.
چه ن رووژێ بی چه وه رێ وسیا سه ر هلگه ردنم تا چاو گل بێد وه راو مێدان. ده سێ قه زا دیم ک چه نێ ئه لاجه یو نوورێده مێدان. چمان هاودمێ ئاو روژه یلیه مێدان بی
ـ مه مو یانه مینن ئه مان م ئایمم!
نوورینێ گه نێ وه پێم کرد
ـ هه نه ک کردم مه مو. ئه را هێز گردی؟ هێمان مه نیه تا ئیواره. تووای گلابخوه ی؟
هه لێوا چییاده سه ر. پاییز زوورێ فیشتر بی و وا تێخ کرانیاده قێ پووس. ئیکه ش تا نێمه رو ئه زان، رکیایدوو چه وه رێ بید خوه ر نزیکا بوودو ده سێ بکشیده گیانت. مه موییش هه ئی حالێ پاییزه داشت. تا نووریاده پێما نگای وه پاییزیش تێژ تر بی و دو قه ندیل وه گیانم نیشتیا.
لاو رووژا زانستم هه ئی چه ن قه دم ناونی بێنمانه چه ن کیلوومتره. جورئه ت نیه کردیام پا بنه مه وه ر.
ئاو رووژه ی وێژه مه ن تا خوه ر خاس له پشتێ کۆه وه یل درای، ک ده نگێ ئنفجارێگ ناونی ته کان داو پادێگان له ێه ک شێوان. گشت وه هه له پله وه راو مه رز ده ویم.
ـ مه مو سه میره؟
ـ ئه ر مه مو سه میره!
گشت مه مو سه میر ناسیان ئه مان له قسێ مناله یل پادێگان ده سگیرم بی ک هۆشکه چه نه م ئاو نیه ناسێ.
کوت کوتێ گووشت وه گجای بی و مه مو بێ ده نگ وه سه ر دو زرانی نیشتۆ. ده سیلێ چۆ ئقامه سفت چاوسانۆده گووشو وه کزا «یا وه له دی» خوه نیا. په رچه مه یل بێ تاقه ت چه ن هه فته بێ ده نگ ره خسیان.
کورێ زووان به سیای مه مو له ناو مێدان مین چه کردیا؟
لاو رووژا دو فه سل چیاو وه گه ردێ وه هار، شه قایقه یل داوانێ ده یشت پوشاناو وه هر دو لاوا مێدان گردنه سه باوش.
ـ مه مو کوره گه د په نج سالێ بی؟
چاوه یلێ مه مو پر بۆده ئه سرو وه نیشانێ «ئه رێ» سه ر کرده خووار و قه تره ی ئه سر دشداشه گێ ته ر کرد.
ـ مه مو م زانستم چه بی، ئمجا کاشکا نه ویوا.
ئی قسیله وه چاویلم وه تم. به عزێ وه خت چشتیلێ چۆ یه له حه لقم هاتیاده دیشت و وه پشت وه ریانێ بوغز گیر کردیا. ئاو زانستیا م خاس زانم ئیره وه قه د نانێگ ئه را پای کورێ وه دوله ت حوقوق گرێدو سه ر نیده بان بالێش.
ئاوره یل وه گژه ی وایگ له مه رز دایونه ده یشت و ئاسمان بان سه ر مه مو ئاوری بی و یێهاو داژێر خوه نین و په رچه میل بی نز ره خسین. کور مه مو وه رجایکه بچووده مێدان مردۆ. شایه دیش ئاو هه مگه ی چرچ مه مو له مردن کورێ بی ئه مان هۆچ نه وه ت. وه لو مه رزه که مه رزه یل لاچن و ئایم که فیده ویریا زوانێگ هه س ک نه وه که له مه نه وه قسه ک وه نوورین و هناس گه رم ئوشرێد.
ئمروو حال چۆنه ممو؟
لاو رووژا هه ر جار ک حالێ پرسیم بێ ده نگ گیره کردو ئه سرێ شاریای نیونیای. ئه مان مه گه بو نیونی؟