ئایا مه‌سه‌له‌ نه‌فته‌، یا وسانن تواناى خودوه‌ڕیه‌وبردن كورده‌؟

شفق نيوز

 

له‌ ساڵه‌یل گوزه‌یشت هویچ مه‌سه‌له‌یگ له‌باوه‌ت كلكردن نه‌فت هه‌رێم كوردستان له‌ ڕى توركیاوه‌ له‌ وجوود نه‌وى، ئمساڵ جوور گشت ساڵه‌یل تر كیشه‌ى 17% به‌شه‌ بودجه‌گه‌ى هه‌رێم كوردستان ده‌س وه‌پیكرد، وه‌لى ئیجاره‌ سه‌رۆك وه‌زیره‌یل به‌غدا ئاشكرا ئویشید من رازى نیم پویل هه‌رێم كوردستان بیه‌یم، یه‌یش وه‌و مانا ك وه‌ كرده‌وه‌ خوازیاره‌ سزاى هه‌رێم كوردستان بیه‌یدو له‌ڕى نه‌وین موچه‌یش فشار خراویگ مه‌ردمى له‌ دژ ده‌سڵات ناوخوه‌یى كوردستان دروس بكا، یه‌یش گشتى وه‌ پاساو ئه‌وه‌ك گوایا حكوومه‌ت هه‌رێم كوردستان داهات نه‌فت ره‌وانه‌ى به‌غدا ناكا له‌وه‌ختیگ ك وه‌رپرسه‌یل توركیا ئاشكراى ئه‌وه‌ كردن ك هیمان نه‌فت هه‌رێم هویچ له‌لى نه‌فرووشیاگه‌.

ئیمه‌ بایه‌سه‌ ئه‌وه‌ بزانیم له‌ بودجه‌ى ساڵ 2013 هاتگه‌ ك بایه‌سه‌ كوردستان بڕ 250 هه‌زار به‌رمیل نه‌فت ره‌وانه‌ى ده‌یشت بكا، وه‌لى له‌ بودجه‌ى ساڵ 2014 ئه‌ى بڕه‌ به‌رمیله‌ كریاسه‌ 400 هه‌زار به‌رمیل.

حكوومه‌ت به‌غدا له‌ هه‌مان وه‌خت ئویشید ئه‌گه‌ر هه‌رێم كوردستان ئى بڕه‌ نه‌فته‌ ره‌وانه‌ نه‌كرد، ئه‌وه‌ بایه‌سه‌ ئه‌و بڕه‌ پویله‌ له‌ بودجه‌ى گشتى هه‌رێم بوڕیه‌ید ك 17% بویه‌. ماناى ئه‌وه‌سه‌ مالكى خوازیاره‌ سزاى مه‌ردم كوردستان بیه‌ید.

ئیمه‌ له‌یرا بایه‌سه‌ ئه‌وه‌ بزانیم ك به‌غدا وه‌رجه‌ مه‌سه‌له‌ى كلكردن نه‌فتیش هه‌ر كیشه‌ وه‌ل هه‌رێم كوردستان داشتگه‌و بودجه‌یش گشت ساڵیگ تویش كیشه‌ هاتگه‌و مادده‌ى 140 جیوه‌جى ناكریه‌یدو ناوچه‌یل داوڕیاگ كوردستان و كیشه‌ى تاریخى و سیاسییش سه‌خته‌و چاره‌سه‌ر ناكریه‌ن.

له‌ بنه‌ڕه‌ته‌و ئى كیشه‌یله‌ په‌یوه‌ندى وه‌ هویر و ئایدۆلۆجیاى ته‌كڕه‌وى و خودچه‌سپانن مه‌ترسیداره‌و دیرید، ك ئه‌ویش په‌یوه‌سه‌ وه‌ پیكهاته‌ى ده‌روینى و سیاسى تونڕه‌وى نه‌ته‌وه‌یى عراق. چوینكه‌ نورى مالكى ك هیمان نه‌تویه‌نستگه‌ شاریگ جوور رومادى و فه‌لوجه‌ كۆنترۆڵ بكاو ترۆریسته‌یل بنبڕ بكاو نواى كاره‌یل ترۆریستى وه‌رده‌وام ناو به‌غدا بگرید، وه‌لى نوڕید له‌یلاوه‌ بویشیده‌ كورد ئیوه‌ بانه‌ ژیر ده‌سڵات حكوومه‌ت ناوه‌ندى و نیه‌ود وه‌بى به‌غدا هویچ بڕیار و گامیگ بنه‌ین.

ماناى ئه‌وه‌سه‌ مه‌سه‌له‌گه‌ په‌یوه‌ندى وه‌ سیاسه‌ت عه‌ره‌بیزم و سزاداین مه‌ردم كوردستانه‌و دیرید له‌ڕى بڕین بودجه‌و كلنه‌كردن موچه‌ى كارمه‌نده‌یل و ئه‌و گامه‌یله‌ ك كوردستان ناسه‌ى له‌وه‌ر خاتر په‌ره‌وه‌پیداین هه‌رێمه‌گه‌ له‌ ڕوى ئابوورى و سیاسى و دبلۆماسى و ئاوه‌دانى، نه‌ك مه‌سه‌له‌ى كلكردن نه‌فت.

غازى حه‌سه‌ن

ج . أ