پاشایه‌تى له‌بان مه‌ردم ورسگ و فه‌قیر له‌وڵاتیگ ده‌وڵه‌مه‌ن!!

شفق نيوز

پێكهاتگه‌ له‌ چه‌ن چینیگ ، وه‌لى زیاتریان چین نه‌دارو كه‌مدرامه‌ت و فه‌قیر بوینه‌ ك وه‌ هه‌وڵ و ته‌قالاى بیوچان تویه‌نستنه‌ وه‌ بژى مه‌مر ژیان بووه‌نه‌ سه‌ر.

تائیسه‌یش ئه‌گه‌ر باس له‌سه‌رده‌م دامه‌زرانن ده‌وڵه‌ت عراق بكه‌یم وه‌تایبه‌ت هه‌ر له‌ سه‌رده‌م پاشه‌یه‌تى له‌ سه‌ره‌تاى ساڵه‌یل بیس سه‌ده‌ى وه‌رین تا رووژ ئمڕوو له‌ى عراقه‌ ك یه‌كیگ له‌ ده‌وڵه‌مه‌نترین ده‌وڵه‌ته‌یل جه‌هانه‌ له‌ڕوى ئابووریه‌و، وه‌لى جى داخه‌ نووڕید زوورم مه‌ردمه‌گه‌ى نه‌دارو فه‌قیر حاڵن و له‌ڕوى ئابووریه‌و پێشكه‌فتن وه‌ خوه‌یانه‌و نه‌ینه‌ ك وه‌رده‌وام شكات له‌ده‌س بیكارى و به‌دبه‌ختى كه‌ن و خه‌یر وبه‌یر وڵاته‌گه‌ چووده‌ گیرفان جه‌رده‌و چه‌ته‌ى له‌خودا نه‌ترس.

له‌ دویاى رمیان رژیم به‌عس و هاتن چه‌رخ تازه‌و ئاڵشتكارى سیستم حوكمڕانى، ئومید ئه‌وه‌ كریا ژیان چین فه‌قیره‌یل وه‌ره‌و ئاڵشتكارى بچوودو له‌و سه‌ندووق دیمۆكراسیه‌ ك بى ترس هه‌وه‌جه‌ وه‌ ده‌نگه‌یلیان داشت چاره‌نویس و ئاینده‌ى به‌خته‌وه‌ر و ژیان ئاسووده‌یگ له‌تى بویننه‌و، وه‌لى ئى سه‌رده‌میشه‌ ته‌واوكه‌ر ئه‌و سه‌رده‌مه‌یل زوڵم و چه‌وسیانه‌سه‌ ك له‌لایه‌ن ده‌سه‌ڵاتداره‌یله‌و په‌یڕه‌و كریا.

خوه‌زه‌و بزانیم پاشاو فه‌رمانڕه‌وایه‌یل یه‌ك له‌شوون یه‌ك عراق وه‌ چ دڵخوه‌شییگه‌و پاشایه‌تى له‌بان مه‌ردم ورسگ و فه‌قیر كه‌ن له‌وڵاتیگ ده‌وڵه‌مه‌ن و پڕ نه‌فت و سامانه‌یل سروشتى!! له‌ى عراقه‌ ئه‌وه‌ك خوه‌ى وه‌ پاشا بزانێدو ته‌خت ده‌سه‌ڵات وه‌ ده‌سیه‌و بوود، بایه‌د مه‌ردم ورسگ و شه‌كه‌ت و خه‌مین و گه‌یا له‌وڵات نه‌یاشتوود، بایه‌د وه‌ختى له‌بان خوان پڕ به‌ره‌كه‌ت نیشێد وه‌رجه‌ ئه‌وه‌ك تیكه‌ ئه‌را ده‌مى بوواد، هویر له‌ حاڵ ئه‌وانه‌ بكا ك شام شه‌و نه‌یرن، هویر له‌ یه‌تیمه‌یل و ژنه‌ شه‌هیدو گه‌یایكه‌ره‌یل ناو جاده‌و مناڵه‌یل جاجگ فرووش بكا.

رووژیگ ئه‌سكه‌نده‌ر گه‌ورا له‌كابرایگ فه‌یله‌سووف پرسى، ئایا كه‌سیگ تر له‌ من گه‌وراتر هه‌س، ئه‌ویش جوواوى داو وت: به‌ڵێ گه‌وره‌م له‌ تۆ گه‌وراتر ئه‌وانه‌ن ك ورسگیانه‌ ئه‌را تیكه‌ى نان و درامه‌ت نه‌یرن!

له‌نیمه‌ى دویه‌م سه‌ده‌ى بیس وه‌ دویاوه‌، باسكردن و باوه‌ته‌یل فره‌یگ له‌بان مه‌سه‌له‌ى فه‌قیرى و چین فه‌قیره‌یل كه‌فته‌ وه‌رباس رووژانه‌و بویه‌ دیارده‌یگ كوومه‌ڵایه‌تى، وه‌لى وه‌ل ئه‌وه‌یشا ئاماژه‌ وه‌ وڵاته‌یل ده‌وڵه‌مه‌ن و سه‌رمایه‌دار و خاوه‌ن داهات و به‌رهه‌مدار كریاو یه‌كیگیش له‌وانه‌ عراقه‌، ك هه‌ر له‌ باكوورى تا باشوور و خوه‌رهه‌ڵات و خوه‌رئاواى خاكه‌گه‌ى چه‌ور و پڕ پیت و به‌ره‌كه‌ته‌، رێژه‌ى كلكردن نه‌فت رووژانه‌ى ها له‌ئاست فره‌ به‌رزیگ  و له‌ڕوى ئابوورییشه‌و تواناى وه‌خاوه‌نكردن زیاتر له‌ ده‌ وڵات تریش دیرید، وه‌لى فایده‌ى چه‌س مه‌ردمه‌گه‌ى تام خوه‌شى له‌ساى ئى هه‌مگه‌ خه‌یر وبه‌ره‌كه‌ته‌ نه‌كردنه‌.

ئه‌ى دى نیه‌زانیم ئى عراق زه‌خمدار و دویاكه‌فتگه‌ ك چووڕه‌ى خوینى ئه‌یه‌ێد و زوورم مه‌ردمه‌گه‌ى له‌ ورسگى و فه‌قیرى ژیه‌ن، پاشا ئه‌ڕا چه‌یه‌و ده‌ور ته‌خت و پاشایه‌تى له‌ى وڵاته‌ چه‌س!؟

ج. ا