ده‌وڵه‌ت سه‌روه‌خوه‌يی

شفق نيوز

يه‌كيگ له‌و كيشه‌يل بنه‌ڕه‌تی و حه‌تميه‌يله‌ ك يه‌قه‌ی به‌شيگ له‌ كومه‌ڵگايه‌يل جه‌هان سێيه‌م گرتگه‌، نه‌گرتن باڵانسه‌ له‌ناونی سه‌روه‌خوه‌يی ئابووری و سياسی، چوينكه‌ بڕيگيان وه‌ ئاشكرا دياره‌ ك له‌بار يه‌كه‌م سه‌ركه‌فتن و له‌بار دويه‌ميش شكه‌ست خواردنه‌، چه‌واشه‌گه‌يشی راسه‌.

ئه‌گه‌ر ئيمه‌ ته‌ماشايگ بار ئيسه‌ی خوه‌رهه‌ڵات ناوين و عراق و سوريا بكه‌يم، په‌ی وه‌و راسيه‌ به‌يم ك ئه‌و هه‌ردوگ وڵاته‌ هانه‌ ناو قه‌يران قويل و وه‌ئاشكرايش هس وه‌ جيايی ناونی پيكهاته‌يل كومه‌ڵايه‌تی و مه‌زه‌وه‌يل ئه‌كريه‌ێد و هه‌ر له‌وه‌ر ئه‌وه‌يش هه‌ر پيكهاته‌و نه‌ته‌وه‌يگ خاوه‌ن كلتوور و فه‌رهه‌نگ جيا جايسه‌ ك له‌ ده‌رفه‌تيگ جاڕ سه‌روه‌خوه‌يی بيه‌ن و نه‌كه‌فنه‌ ژير بار سووزدارييشه‌و.

مێژوو ئويشێد: بڕيگ نه‌ته‌وه‌ له‌و هه‌ردوگ وڵاته‌ هه‌ل ته‌ڵايی ئه‌ڕايان هه‌ڵكه‌فتگه‌ ك ئاشكرای ده‌وڵه‌ت سه‌روه‌خوه‌يی بكه‌ن، وه‌لێ وه‌ل سياسه‌ت سه‌رده‌م جوور خواست ده‌س وپه‌نجه‌يليان نه‌رم نه‌كردنه‌و هه‌ڵه‌ی شماره‌يگ سياسی و بڕيار وه‌ده‌سيش ئه‌و ده‌رفه‌ته‌ له‌كيش دانه‌.

له‌ی بار ئيسه‌ ك خه‌ريكه‌ ئاڵشتكاری ئه‌ياده‌ بان نه‌خشه‌ی جوگرافی ناوچه‌گه‌، له‌يوا دياره‌ جه‌مسه‌ربه‌ندی و به‌رژه‌وه‌ندی وڵاته‌يل گه‌وراهيز له‌وه‌ بدێد ك هه‌م له‌ڕوی دبلۆماسيه‌و وه‌ليانا كووك بدێ و هه‌يش له‌ڕوی ئابوورييشه‌و په‌يوه‌ندييد وه‌ليانا بته‌و بدێ، وه‌لێ گومانيش له‌وه‌ نيه‌ ك وه‌ دقه‌تيش چه‌و بڕنه‌ پايه‌و سه‌نگد له‌بان ئاست كومه‌ڵگای ناوده‌وڵه‌تی.

له‌گشت باريگ، يه‌كه‌م ئه‌رك سياسيه‌يل ئه‌وه‌سه‌ ك وه‌رجه‌ گشت چشتيگ له‌ڕوی داراييه‌و هه‌وڵ دروسكردن و بنياتناين ئابوورييگ سه‌روه‌خوه‌ی بيه‌ن وه‌گشت مانايه‌يليه‌و، ك ئه‌كريه‌ێد له‌و بواريشه‌ نه‌ف له‌ ئه‌زموون شاره‌زايه‌يل و ئاكاديميه‌يل و كارناسه‌يل وه‌ربگيرێد.

ئه‌وه‌كيش ئه‌مينێده‌و، ئه‌ويش كيشانن مه‌يل كومه‌ڵگای ناوده‌وڵه‌تيه‌ ك دی قه‌واره‌يگ سه‌روه‌خوه‌ی ديرێد و بيجگه‌ ئه‌وه‌گ خاوه‌ن دامه‌زرياگ شه‌رعی خوه‌دێد و له‌هه‌مان وه‌خت خوه‌يوه‌ڕيه‌وبردن و حوكمڕانييش تاقييه‌و كردێده‌و ريز له‌ سه‌روه‌ری ياساو بنه‌مايه‌يل باو ديموكراسييش ئه‌گرێد.

راسه‌ ك سه‌روه‌خوه‌يی وه‌ مانا گشتيه‌گه‌ی هه‌وه‌جه‌ وه‌ قوربانی ديرێد، وه‌لێ ناكريه‌ێد ته‌نيا له‌بان هساو هاونيشتمانيه‌يل بڕيار چاره‌نويسساز بدريه‌ێد، به‌ڵكوو بايه‌سه‌ زويتر گشت لايه‌نه‌يل سياسی و چين و پيكهاته‌يل كومه‌ڵگا له‌بان بنه‌مايه‌يل بنه‌ڕه‌تی و سه‌ره‌كی ريك بكه‌فن و گشت ناكووكييگ ناوخوه‌يی وه‌و خاتره‌ بخريه‌ێده‌ كنار.

ئومێد بابان