تشماڵی و هاوماڵی!!

شفق نيوز

 

تويه‌نيم بويشيم هه‌ر له‌سه‌ره‌تای وجوود ئاده‌ميزاد تا ئيسه‌و تا ژيانيش له‌بان ئی گووشه‌ی زه‌ويه‌ وه‌رده‌وامه‌، يه‌كه‌مين هه‌وه‌جه‌يگ ك جيايی و دويرگرتن له‌لی مه‌حاڵه‌، ئه‌ويش هه‌وڵ دامه‌زرانن په‌يوه‌ندی و جيوه‌جيكردن ئه‌ركه‌يل دووسايه‌تی و خيشايه‌تيه‌ له‌ڕی په‌يڕه‌وكردن ياسايه‌يل ژيان كومه‌ڵايه‌تی و داب ونه‌ريته‌يل باو كومه‌ڵگا.

ئمجا هه‌ر وه‌و خاتريشه‌ نه‌وه‌ی ئاده‌م و حه‌وا تويه‌نستگه‌ خوه‌ی له‌ ئه‌نگه‌مه‌و خه‌م دويری و ته‌نيايی بپاريزيد و ره‌نج ژيانی بيوه‌ليفه‌ت نه‌ود له‌ژير سای ته‌مه‌نگه‌ی سيه‌ماڵ تيه‌ريكی و بنپاسار دويرگرتن.

ئمجا ئه‌گه‌ر خوه‌د وه‌ ده‌مچه‌رمگ ئێڵ زانيد و خوازياريد زه‌ره‌د له‌ قه‌در و شانيه‌ت و خوه‌د نه‌يه‌يدو هه‌ميشه‌ سه‌ربڵين بويدو نه‌ويده‌ بارگه‌پووش و باقه‌به‌س دووس و هاوڕيه‌يلد ته‌نيا له‌ وه‌خت وه‌ڕيكردنيان وه‌ره‌و دويا مه‌نزڵ، نه‌بايه‌د جوور بيگانه‌يگ ره‌وه‌نی حه‌سره‌ته‌يل كاڵ وژداند وه‌ خوه‌نين"ئه‌لحه‌مد"ويگ په‌رده‌پووش بكه‌يدو ئه‌را ته‌نيا جاريگيش له‌ ژياند هه‌ق هاوماڵی و خيشايه‌تی وه‌جی ناريد.

چوينكه‌ هه‌ر ئاده‌ميزاديگ خوازيار ئه‌وه‌ بوود ده‌م له‌ گه‌ورايی بكوتيدو سه‌نگ خوه‌ی له‌وه‌رچه‌و كه‌س وكاری قورس بكاو جی ريز و حورمه‌ت بوود له‌لايان، له‌ هه‌مان وه‌خت بايه‌سه‌ بويچگی خوه‌يشی بچه‌سپنيد له‌ڕی ره‌فتار به‌رز و په‌يوه‌ندی و سووز و به‌زه‌يی له‌ گشت روييگه‌و وه‌تايبه‌ت له‌ مه‌سه‌له‌ی هاوماڵی و هامشووكردن و نه‌ك هه‌ر چه‌وه‌ڕی ئه‌وه‌ بوود مه‌ردم هامشووی بكه‌ن و نه‌چوود وه‌ره‌و كه‌س.

هه‌ر وه‌و خاتريشه‌ وه‌زيفه‌ی ئاده‌ميزاد له‌ژيان ئه‌وه‌سه‌ وه‌ هه‌ڵويست راس و دروس ريز و حورمه‌ت خوه‌ی بڕه‌سنيده‌ دڵ كه‌سه‌يل تر، ئه‌گه‌ريش مينه‌ی تشماڵی ئه‌كه‌يد بايه‌سه‌ هاوماڵی داشتويد وه‌ل گشت بنه‌ماڵه‌يل قه‌وم خيشد و له‌گشت بوونه‌يگ ته‌كان بيه‌يده‌ خوه‌د و له‌وه‌رجه‌ مه‌ردم به‌شداری خوه‌شی و ته‌نگييان بكه‌يد و هويچ وه‌ختيگ وه‌ لويتبه‌رزی و هساو گه‌وراييه‌و مامڵه‌ وه‌ل ئه‌ندامه‌يل بنه‌ماڵه‌و ئێڵد نه‌كه‌يدو جوور شه‌م بسزيه‌يد ئه‌را رووشنايی ئه‌وان تا وه‌ی جووره‌ بتويه‌نيد بڕه‌سيده‌ مه‌رام.

محه‌مه‌د كه‌مال

ج . أ