ئاو، سه‌نته‌ر كيشمه‌كيش ئاينده‌ی جه‌هان

شفق نيوز

سه‌رهه‌ڵداين كيشمه‌كيش فره‌يگ تا ره‌سيگه‌ ئاست جه‌نگ و مرافه‌ ، ئمجا گويڕيان له‌ناكاو وه‌رگ هه‌وای زه‌وی و رويداين جارنه‌جاريگ شه‌پوول يا مه‌وج وشكه‌ساڵی له‌ ناوچه‌يل جوگرافی جياواز ، زه‌نگ ئه‌و مه‌ترسيه‌ ده‌نه‌لی . وه‌ل ئه‌وه‌يشا پيشبينی كريه‌يگ ك خوه‌رهه‌ڵات ناوڕاس وه‌گشتی و عراق وه‌تايبه‌ت بووگه‌‌ مه‌يدان ئه‌و كيشمه‌كيش تازه‌ .

له‌ی دوياخره‌ له‌يه‌كه‌وده‌ره‌يل ئاسايش نه‌ته‌وه‌يی ئه‌مريكا ئه‌را يه‌كمجار نيگه‌رانی خوه‌يان وه‌رانوه‌ر گويِڕيان كه‌ش وهه‌وای زه‌وی و ئاسايش ئاو له‌جه‌هان نيشاندان و چه‌ن پيشبينی مه‌ترسيداريگ له‌و باره‌وه‌ خستنه‌ روی . ئمجا وه‌گووره‌ی له‌يه‌كه‌وداينه‌گه‌ ، له ٢٠ ساڵ ئاينده‌ ئه‌فريقياو خوه‌رهه‌ڵات ناوڕاس روی وه‌ روی قه‌يران گه‌ورايگ بوونه‌وه‌ له‌ وشكه‌ساڵی دريژماوه‌وكه‌می ئاو وخوه‌راك وكاره‌سات لافاو له‌ناكاو ، ئه‌و قه‌يرانه‌يليشه‌ بوونه‌ سه‌به‌ب سه‌رهه‌ڵداين گرفت سياسی گه‌ورا ، تا ئاست جه‌نگ ومرافه‌ی ده‌وڵه‌ته‌يل و رمانن حكوومه‌ت و سه‌رهه‌ڵداين گرووپ تيرۆرست مه‌ترسيدار . پنتاگۆن وشياری ده‌يگه‌ ئه‌مريكا وه‌ ئه‌وه‌ك بايه‌سه‌ ئه‌را هاوكاری ئنسانی له‌و ناوچه‌يله‌ خوه‌ی ئاماده‌ بكه‌يگ .

له‌لايگ تره‌وه‌ راپۆرتيگ تر نه‌ته‌وه‌يل يه‌كگرتگ وه‌ی دوياخره‌ ئاماريگ خسته‌ڕوی ك له‌تی ئاشكرای ئه‌وه‌ كردگه‌ وه‌ سه‌به‌ب وشكه‌ساڵی و خراوی وه‌كارهاوردن سه‌رچه‌وه‌يل ئاوه‌وه‌ ، زياتر له‌ (٢)مليار هاووڵاتی له‌سه‌رانسه‌ر جه‌هان روی وه‌ روی قه‌يران كه‌مئاوی بوينه‌سه‌وه‌ ، وه‌ل ئه‌وه‌يشا پيشبينی كردگه‌ ك زيايبوين شماره‌ی مه‌ردم بان زه‌وی له‌چه‌ن ساڵ ئاينده‌ بووگه‌ سه‌به‌ب دو ئه‌وه‌نه‌ی قه‌يرانه‌گه‌و خوه‌رهه‌ڵات ناوڕاسيش يه‌كيگ بووگ له‌ سه‌نته‌ره‌يل ئه‌و قه‌يرانه‌ .

له‌ی ناونييشه‌ ، عراق هه‌ر له‌ئيسه‌وه‌ سه‌ره‌تايه‌يل ئه‌و كيشه‌ له‌تی سه‌رهه‌ڵداگه‌ وه‌سه‌به‌ب روی وه‌ روی بوينه‌وه‌ی قه‌يران وشكه‌ساڵی و كه‌مه‌وبوين ئاست ئاوه‌يل دجله‌و فورات ك سه‌رچه‌وه‌يليان له‌ توركياوه‌ تيه‌يگ . ئمجا وه‌گووره‌ی ريككه‌فتننامه‌يگ ك زويتر له‌ناونی به‌غداو ئه‌نقه‌ره‌ ئمزا كرياگه‌ ، بايه‌سه‌ عرا له‌هه‌ر چركه‌يگ (٥٠٠)م٣ ئاو له‌مه‌رز توركياوه‌ بڕه‌سيگه‌پی ، وه‌لی پاره‌كه‌و ئمساڵێش ئه‌و نسبه‌ وه‌شيوه‌يگ مه‌ترسيدار كه‌مكردگه‌ ، ئه‌ويش له‌وه‌ختيگه‌ ك عراق له‌شوون نه‌فت وڵاتيگه‌ وه‌پله‌ی يه‌كم پشت وه‌ كشتوكاڵ به‌سيگ و شاده‌مارئه‌و كه‌رت يا قه‌تاعيشه‌ سه‌رچه‌وه‌يل ئاوه‌ .

وزاره‌ت سه‌رچه‌وه‌يل ئاو عراق ئويشيگ : ئاست ئاو فورات ره‌سيه‌سه‌ نيمه‌ی ئاست ئاسايی خوه‌ی و ، وه‌ ئه‌وه‌يش هه‌زاران دۆنم له‌ناوچه‌يل ناوڕاس و باشوور عراق كه‌فتنه‌سه‌ وه‌ر هه‌ڕه‌شه‌ی وه‌بياوان بوين (ته‌سه‌حور) .