شين و زاری فه‌يلی ئه‌را په‌يكه‌ر كووت

شفق نيوز

خودايا، گشت هه‌وڵه‌يل رووژانه‌مان وه‌خاتر نزيكه‌وبوينه‌ له‌لێد، ئمڕوو ئی دونيايشه‌ ك دووزه‌خد له‌دژی داێد، به‌ڵێ، دروو ناكه‌يم، چوينكه‌ هه‌ردوگ هه‌ڵبژارده‌گه‌ بوينه‌ سيه‌ی قه‌ترانی و سيه‌يی ئه‌و بڵێزه‌ خاستره‌ له‌ی مه‌مڵه‌كه‌ته‌.

خودايا، ئيمه‌ ناخوازيم لايه‌ن خراوی و ويرانه‌ی دويناگه‌د ده‌رخه‌يم، ته‌نيا هه‌ر خوه‌د شايه‌ت و دوينه‌ر ئی وڵاتێده‌ چه‌ وه‌پی هاتگه‌ و ئه‌گه‌ريش ئه‌خواێد بكوشنه‌مانه‌و له‌ تۆمارد، چوينكه‌ له‌يه‌ ويرانه‌تر ئه‌رای ناخوازيم ك بويمنه‌ی به‌نه‌يگ له‌ وڵاتيگ ك هويچ په‌يغه‌مبه‌ريگ توانای هدايه‌ت مه‌ردمه‌گه‌ی نه‌ياشت.

خودايا،ئه‌وه‌ ئه‌خوازيم ك ته‌نيا ئاده‌مێزاد بدێده‌ ئاده‌ميزاديگ، خودايا دويای ئه‌و هه‌مگه‌ كرده‌وه‌يله‌ ك هاته‌ تويشمان جواو هويچ ناويشيم بيجگه‌ مقه‌يه‌تيكردن له‌ په‌يكه‌ر شه‌هيده‌يلمان، وه‌لێ كه‌فتيمنه‌ رووژيگ لێڵ له‌بان ويرانه‌ی شايه‌تيگ تايبه‌ت وه‌پيمان له‌ شار كووت ئه‌زيز له‌ناوخود عراق گه‌ورا.

خودايا، گشت چشتيگ له‌ی وڵاته‌ ره‌ش و روێت مه‌ند، نازانيم ك چوين ئه‌سر چه‌وه‌يلمان بسڕيم يا له‌وه‌خت ژان هاوار بكه‌يم، هه‌ر وه‌و خاتريشه‌ كزترين ئيمان ئه‌وه‌سه‌ وه‌ بيده‌نگ بگيريم يا ئه‌وه‌سه‌ وه‌ عه‌جيبه‌ته‌و ته‌ماشا بكه‌يم و ناڕه‌حه‌ت بويم و زه‌رده‌خه‌نه‌ بكه‌يم.

خودايا، له‌ی رووژه‌و خوه‌شه‌ويسی مه‌ردم له‌بانمان لاده‌ چوينكه‌ كه‌فتنه‌وه‌ی پڕ ژانه‌و دويری خه‌ له‌ليمان و گرينگی نه‌داينيان باره‌ شوونی به‌شكه‌م ره‌حم بكاو به‌زه‌يی باێد.

خودايا، ئيمه‌ی فه‌يليه‌يل دريغی گه‌ورامان ئه‌وه‌گ گوزه‌يشت بوی چی و ئه‌وه‌گيش مه‌ندگه‌ بايه‌سه‌ دگان وه‌پی بنه‌يم و داخ ئه‌ڕای بكيشيم وه‌بی ده‌نگ، ئاگريش له‌ ده‌روينمان گڕه‌، ك چه‌نيگ چه‌وه‌ڕی كرديم چشتيگ له‌ خوه‌مان باريمنه‌و له‌ وڵاتيگ ك هويچ چشتيگ له‌تی ئارام نادێ و نايه‌ێده‌و، وڵاتيگ ئومێد له‌تی ئه‌كاده‌ خوه‌ڵه‌كوو، وڵاتيگ حكايه‌ت ئشقمان ئه‌را خوه‌ی كرده‌ ويرانه‌، كوچگيگ كرديمنه‌ شايه‌ت و بيده‌نگييش باڵ كيشاسه‌ بان ئه‌زره‌ته‌يلمان.

عه‌لی حسێن فه‌يلی