كوردستان گه‌ورا

شفق نيوز

 

له‌و رویه‌و فریه‌یگ له‌ ریكخریاگه‌یل یاسایى و ئازادیخواز، خوازیار هه‌قه‌یل كورد بوین تا جوور ملله‌ته‌یل تر جه‌هان هه‌ق و ئازادیه‌یلیان بارنه‌ ده‌س، وه‌لى نه‌ته‌وه‌یل یه‌كگرتگ ژیان له‌تى نه‌وى و له‌یوا دیاره‌ چه‌وه‌ڕى هه‌ناسه‌یگ زینگه‌وبوین له‌ واشنتۆن كردیاد تا بژیه‌یدو بزانید مه‌سه‌له‌ى ژیان و خواست ئى ملله‌ت كورده‌ چوین بوود.

ملله‌ت كورد تائیسه‌یش دیل ده‌س سیستمه‌یل ده‌سڵاتداره‌ ك وه‌هویچ جووریگ په‌یوه‌ندى له‌ناونى ئى ملله‌ته‌و ئه‌و سیسستمه‌یله‌ وجوود نه‌یرید، ته‌نیا ئه‌وه‌ك ئه‌راى هاته‌سه‌ دى ئه‌وه‌ بویه‌ ك جوور به‌نه‌یگ له‌ده‌س گه‌وراگه‌ى وه‌ریگرتگه‌، جوور ئه‌وه‌ك چوین له‌سه‌رده‌م به‌نایه‌تى یا عبودیه‌ت رویداو هه‌قه‌یل ئاده‌میزاد ژیرپا خریا.

ئنجا كى باوه‌ڕ ئه‌كا ملله‌تیگ جوور ملله‌ت كورد ك شماره‌یان په‌نجا ملیۆن كه‌سه‌ نیشتمان نه‌یرن! یه‌یش له‌وه‌ختیگ ك كویه‌نترین ملله‌ته‌و خاوه‌ن پایه‌و ره‌سه‌نایه‌تى و تاریخ گه‌ورایگن. كورد ملله‌تیگه‌ ك ته‌فرتوینه‌ كریانه‌و گشت ئاره‌زووه‌یلیان له‌ناونى قه‌وڵه‌یل ساخته‌كارى ناوده‌وڵه‌تى وه‌ دریژایى ده‌یه‌ها ساڵ بردنه‌سه‌ سه‌ر و تائیسه‌یش ته‌نیا قسه‌یگ له‌و قه‌وڵه‌یله‌ ده‌رهه‌قیان جیوه‌جى نه‌كریاگه‌.

وه‌ل ئه‌وه‌یشا ك هه‌میشه‌ بار سیاسى بى ره‌حم بویه‌ وه‌ل ملله‌ت كورد، وه‌لى دامه‌زرانن حكوومه‌تیگ بته‌و كوردى له‌ كوردستان عراق ئسپات ئه‌وه‌ كرد ئه‌را گشت جه‌هان ك بایه‌سه‌ ئى ملله‌ته‌ ریز له‌لى بگیریه‌یدو پشتگیرى ته‌واویگ له‌لى بكریه‌ید وه‌خاتر دامه‌زرانن كوردستان گه‌وراو یه‌كگرتگ . ئنجا گشت كه‌سیگ بایه‌سه‌ له‌وه‌ر خاتر ئه‌و ئامانجه‌ ته‌ماشاى هه‌رێم كوردستان بكه‌ن ك ناوچه‌یگ سه‌قامگیره‌ له‌ڕوى سیاسى و فریه‌یش پیشكه‌فتگه‌.

بیجگه‌ ئه‌وه‌یش دوینیم ك له‌باشوور عراق كرده‌وه‌یل رووژانه‌ى ترۆریستى و تون وتیژى چوین گشت باشوور و ناوڕاس عراق گرته‌سه‌و، وه‌لى له‌ هه‌مان وه‌خت نوڕید كوردستان عراق ك پیشكه‌فتنه‌گه‌ى به‌ڵگه‌یگ حاشا هه‌ڵنه‌گره‌ ئه‌را ئه‌وه‌ك ئه‌ندامێتى نه‌ته‌وه‌یل یه‌كگرتگ وه‌پى بدریه‌ید.

هه‌ر له‌وه‌ر ئه‌وه‌یش ئویشیم: پیكهاوردن كوردستان گه‌وراو سه‌روه‌خوه‌ى هه‌وه‌جه‌ وه‌ پشتگیرى وڵاته‌یل كه‌نداو دیرید وه‌رجه‌ پشتگیرى ناوده‌وڵه‌تى، چوینكه‌ وجوود كوردستان خاڵ خاس و نه‌فداریگه‌ ئه‌را ناوچه‌ى كه‌نداو و خوه‌رهه‌ڵات ناوین. وه‌لى ئایا خه‌و كورد تیه‌یده‌ دى یا ئه‌مریكا بووده‌ وه‌ربه‌س ئه‌ڕاى جوور ئه‌وه‌ك زویتر بریتانیا بویه‌ وه‌ربه‌س له‌سه‌ده‌ى گوزه‌یشت و بویه‌ بایس له‌باربردن خه‌وه‌یل نه‌ته‌وه‌یى كورد؟

موبارك محه‌مه‌د

ج . أ