ژنه‌يل قوربانی جه‌نگ و رووشنهويری كوومه‌ڵگا

شفق نيوز

ئه‌وه‌ك ئاده‌ميزاد دڵگران ئه‌كا ئه‌و جايه‌ڵه‌يل هه‌ڵكه‌فتگ و ئازاسه‌ ك له‌وه‌ختيگ ئه‌تويه‌نن بوونه‌ هيزيگ كار و داهينه‌ر ئه‌را وڵاته‌يليان ك وه‌بوونه‌ی شه‌ره‌فی وه‌رگری له‌ نيشتمان شه‌هيد بوون يا زه‌خمدار و كه‌مئه‌ندام بوون، وه‌لی ئه‌وه‌ك مايه‌ی گفتگووكردنه‌ ئه‌وه‌سه‌ ك ئه‌و ژنه‌يله‌ ك هه‌ميشه‌ جوور كاڵايگ له‌و ناونيه‌ ته‌ماشا ئه‌كريه‌ن و جوور ده‌سكه‌فتيگ جه‌نگ مامڵه‌ وه‌پيانه‌و ئه‌كريه‌يد ئازار و ژانيگه‌ فيشتر له‌ كه‌مئه‌ندامبوين.

جی داخه‌ ئه‌و ديده‌ له‌گشت جه‌نگه‌يل وه‌ ئاشكرا دوينريه‌يد و گشت وه‌ختيگ مه‌ته‌ڵ پڕ ئازار ئه‌و ژنه‌يله‌ له‌پشت شماره‌ی شه‌هيده‌يل بيڕه‌نگ ئه‌دێ و له‌لايگيشه‌و كوومه‌ڵگا خوازياره‌ كپيه‌و بكا.

كوردستان ئه‌زيز خوه‌مانيش له‌و تراژيديا وه‌ده‌ر نه‌ويه‌و بيجگه‌ ئه‌وه‌ك ئيمه‌ قه‌ت په‌لامار خاك كه‌س نه‌يايمنه‌و هه‌ڕه‌شه‌ نه‌ويمنه‌، وه‌لی دوينيد گشت وه‌ختيگ جه‌نگ ئيمه‌ جه‌نگ مقه‌يه‌تيكردن و وه‌رگری بويه‌.

ئه‌وه‌ك ئيسه‌ له‌ كوردستان وه‌ناو جه‌نگ دژ ترۆر ئه‌نجام ئه‌دريه‌يد نائنسانيترين كاره‌يليگ دژ وه‌ ژنه‌يل له‌لی كه‌فته‌و، ك وه‌ديلگرتن و رفانن سه‌دان دويه‌ت و ژن و ده‌سدريژيكردن له‌بانيان وه‌تايبه‌ت له‌ ژنه‌يل ئێزيدی ك گه‌وراترين تراژيديای ئنسانيه‌ته‌و بيجگه‌ ئه‌وه‌يش وه‌گووره‌ی ئه‌و سه‌ردانه‌يل مه‌يدانيه‌ ك خوه‌مان ئه‌نجامی دايمنه‌و وه‌گووه‌ری ئاماره‌يل فه‌رمی و نافه‌رمی ك كه‌فتنه‌سه‌ ده‌سمانن ئه‌وه‌ ده‌رخه‌ن ك له‌ دويه‌ت ٩ تا ١٠ ساڵ و ژنه‌يليش له‌ ٤٥ تا ٥٠ ساڵ له‌تيان بويه‌، ك جی داخه‌ له‌لايه‌ن ئه‌و چه‌كداره‌يل ئاژه‌ڵ سفه‌ته‌يله‌ ده‌سدريژی له‌ليان كرياگه‌و مامڵه‌ی سه‌ندن و فرووشتن وه‌پيان كرياگه‌.

يه‌يش يه‌كه‌مجار نيه‌ ك ژن كورد تويش له‌يوا ئازاريگ ئه‌دێ و چه‌نه‌ها ژنه‌يل تر له‌ كاره‌سات ئه‌نفال هه‌مان ئازار داشتنه‌، يه‌يش بيجگه‌ ئه‌وانه‌ك له‌ زيندانه‌يل سه‌دام ده‌سدريژی كريا بانيان، ك جی داخه‌ دويه‌ته‌يل پاكزاده‌ ئاماده‌ی گله‌وخواردن نين و بڕيگ له‌لیيان له‌لایه‌ن باوگ و كه‌س وكاريانه‌و وه‌بيده‌نگ مووم عومريان خامووش كردنه‌و وه‌ مه‌هانه‌ی عه‌يب وعار كوشيانه‌.

ئه‌وه‌ك ئيمه‌ خوازياريم جوور داواكارييگ له‌ كوومه‌ڵگا وه‌تايبه‌ت له‌ ريكخرياگه‌يل مه‌ده‌نی و ريكخرياگ ژنه‌يل بخه‌يمه‌ی ڕوی ئه‌وه‌سه‌ ك وه‌گشتكانه‌و وه‌ل ده‌زگايه‌يل ره‌سانن و ميديايه‌يل بويمنه‌ گاميگ رووشنهويری و ئه‌وه‌ له‌ مه‌ژگ كوومه‌ڵگا لاوه‌يم و يچه‌سپنيمه‌ی ك ئه‌و ژنه‌يله‌ تاوانبار نين و قوربانييگ لاشه‌يی و رووحی جه‌نگن، قوربانييگ ك بايه‌سه‌ ريز له‌ليان بگيريه‌يد و ئازاره‌يليان قه‌ره‌بوو بكريه‌يد.

وه‌ل ئه‌وه‌يشا خوه‌شاڵيم وه‌ گله‌وخواردن ئه‌و چه‌ن كه‌سه‌يله‌ ك تويه‌نستنه‌ له‌ده‌س زاڵمه‌يل داعش قورتاريان بدێ و دڵگرانيم له‌وه‌ك نه‌ك كوومه‌ڵگا ئازاريان چه‌ن ئه‌وه‌نه‌ی تر فيشتره‌و بكا. رووشنهويری كوومه‌ڵايه‌تی و فراوانبوين ديد مه‌ردم له‌ تاوان و ئازاره‌يل جه‌نگ كاريگه‌ ك ئمڕوو ئه‌رك گشتمانه‌، چوينكه‌ فريه‌ كه‌س هه‌ن مه‌ژگيان كليله‌و ناتويه‌نن ئه‌و ژنه‌يله‌ جوور قوربانی جه‌نگ بوينن، ئمجا با باوه‌ش گه‌رم كوومه‌ڵگا بدێده‌ ساڕيژكه‌ر ئه‌و زيه‌مه‌يل قويله‌ ك شايه‌ت تا له‌ژيان مه‌ندنه‌ ساڕێژه‌و نه‌دێ.

زيلا كه‌ريمی

ج . أ