چه‌وه‌یلیگ چه‌وه‌ڕى ئه‌و كویچه‌یله‌ ئه‌كه‌ن

شفق نيوز

بنویسم، خامه‌گه‌م له‌ده‌سم كه‌فت و له‌لیم واى، منیش چیمه‌ڕا لاى تا بیه‌رمه‌وه‌ى، وه‌لى دوباره‌ له‌ناو په‌نجه‌یل له‌رزیاگم واى.

 

منیشت ئه‌ڵڵاجه‌وییم هات و له‌لى پرسیم ئه‌ى خامه‌ى مه‌ویس له‌ من هه‌یواید یا له‌ده‌س چاره‌نویس دڵته‌نگمان؟ وه‌ خه‌م فره‌یگه‌و جوواومه‌و داو وت: شه‌كه‌ت بویمه‌ له‌ نویسانن مه‌ینه‌تیه‌یلدان و نویسانن خه‌م مه‌ردمان تر.

 

منیش وه‌ زه‌رده‌خه‌نه‌یگه‌و وتمه‌پى: ئه‌ى خامه‌ى دڵته‌نگ ..خه‌م و زامه‌یلمان جوور خوه‌ى هیلیدو ئشاره‌ت وه‌پى ناكه‌ید؟ وت: بچوو راز دڵ خوه‌د ئه‌را كه‌سیگ تر بویش ك له‌رووح خوه‌د ئه‌زیزتر بوود له‌جیاى ئه‌وه‌ك شه‌كه‌ت خوه‌د بكه‌ید و شه‌كه‌ت ئه‌و كه‌سه‌ بكه‌ید ك دڵ و رووح نه‌یرێد. منیش وتمه‌پى: ئه‌گه‌ر كه‌سیگ تر نه‌یاشتووم له‌ تن ئه‌زیزتر راز دڵ خوه‌م ئه‌ڕاى بویشم، بچمه‌ لاى كى؟ خامه‌گه‌م سه‌رگه‌ردان بوى و خوه‌ى فڕه‌دا بان لاپه‌ڕه‌ چه‌رمگه‌گه‌م، منیش هه‌ڵیگرتم و ئه‌ویش بیده‌نگ بوى، باوه‌ڕم ئیچنه‌ بوى ك گووش له‌لیم ئه‌گرێدو ده‌سمیه‌تم ئه‌یاد له‌نویسانن چشت كه‌میگ له‌و مه‌رامه‌ ك له‌دڵه‌و هس وه‌پى كه‌م جوور ژان و مه‌ویسى ك گشت وه‌خت و سه‌عاتیگ دڵم جه‌ڕه‌و داس ، وه‌لى مره‌كه‌و خامه‌گه‌م وه‌ تونى رشیاو ئه‌ڵڵاجه‌وى بوى له‌لام و ته‌ماشاى كردم و وته‌پیم: مه‌رامد چه‌س، من دڵ و رووح نه‌یرم؟ ئه‌خوازید خه‌مه‌یل دڵد بنویسم؟

 

خامه‌گه‌م گرتمه‌ ده‌س ئه‌را ئه‌وه‌ك خه‌مه‌یل كورد فه‌یلى بنویسم ك ئه‌گه‌ر له‌بان كویه‌یگیش دابنریاتاد وه‌رگه‌ى نه‌گرت.. خامه‌گه‌م وه‌رجه‌ چه‌وه‌یلم گیرست، مه‌ینه‌تیه‌یلمان وه‌ى جووره‌ بوى و چه‌وه‌یلم ئه‌سر فره‌یگ رشانن و چنه‌ هس كردم له‌لیمان نزیكه‌و خه‌مخوه‌رمانه‌.

 

مه‌ینه‌تیه‌یل ئیمه‌ ك گشت كه‌سیگ باسى كه‌ن، وه‌لى چاره‌سه‌ر نه‌كریاگه‌، گشت كه‌سیگ باس مه‌زڵومیه‌ت كورده‌یل فه‌یلى كه‌ن، له‌لیان هه‌س ئویشێد ده‌ركریان و ماڵ وموڵكیان زه‌فت كریاو له‌لیانیش ئویشن ئازار دریان و كوشیان و كاره‌سات هاوردنه‌ بان روڵه‌یل جایه‌ڵ جوانیان و خریانه‌ وه‌ر تاقیگاى كیمیاوى و مه‌ردمانیگیش وه‌ ده‌نگ پڕ له‌خمینه‌و ئویشن هه‌تك وه‌ دویه‌تیلیان كریا له‌وه‌رچه‌و پیاوه‌یلیان و هویچ ده‌سڵاتیگ نه‌یاشتن، ئنجا ئایا له‌ى زوڵمه‌ زیاتر هه‌س؟ وه‌لى ته‌نیا خه‌میگه‌و هویچ تر، ئیمه‌یش هه‌وه‌جه‌ وه‌و خه‌مخواردنه‌ نه‌یریم، به‌ڵكوو هه‌وه‌جه‌ ئه‌را وسیانیگ راسكانى دیریم ئه‌را هاوردنه‌وه‌ى هه‌قه‌یلمان ك وه‌ زوور له‌لیمان زه‌فت كریا.

 

مناڵه‌یل دویه‌كه‌ى كورده‌یل فه‌یلى له‌ده‌س به‌نه‌یى خوسه‌ى زه‌مانه‌و غوربه‌ت رووژگار قورتار بوین و ئه‌زره‌ت و دڵسووزى ئه‌و كویچه‌یله‌ خه‌یده‌ هویریان ك له‌تى گه‌مه‌ كردیان و خه‌نستیان، ئه‌و جانتا ك كردیانه‌ شاناو دڵخوه‌ش بوین وه‌پى له‌وه‌ختى وه‌ره‌و خوه‌ندنگا چییان و هویچ رووژیگ هویر له‌وه‌ نه‌كردن ك رژیم سته‌مكار ئه‌و خوه‌شى و خه‌نستنه‌ له‌لیان بشیونیدو بخریه‌نه‌ گووشه‌ى زندان یا وه‌ناو زه‌وى مینڕیژكریاگ مه‌رز ده‌ریان بكا ئه‌را وڵات هاوسا، ئایا له‌ى زوڵمه‌ زیاتر هه‌س له‌دونیا؟ راسه‌ بڕیگ له‌ ده‌وڵه‌ته‌یل سته‌م له‌روڵه‌یل وڵاته‌گه‌یان كردن وه‌لى نه‌ڕه‌سیه‌ ئه‌و راده‌ جوور زوڵم كورده‌یل فه‌یلى بوود.

 

كورده‌یل فه‌یلى ناتویه‌نن باب شێخ و عه‌گدلئه‌كرادو جه‌میله‌و جاده‌ى فلستین و شوونه‌یل تریان له‌هویره‌و بووه‌ن ك شوون نیشته‌جییان بوى و چه‌وه‌یلیان چه‌وه‌ڕى ئه‌و كویچه‌یله‌ كه‌ن، هه‌میشه‌ چه‌وه‌یلیان ته‌ماشاى ئى ناوچه‌یله‌ ئه‌كا، وه‌لى جى داخه‌ ئه‌وانه‌ك ئاده‌میزادن و زووان و گووش و چه‌و دیرن بیده‌نگ وسیانه‌و ته‌كجمیگ نایه‌نه‌ خوه‌یان و له‌لیانیش ماڵ كورده‌یل فه‌یلى وه‌ ده‌سكه‌فت زانێدو دڵخوه‌ش بوى وه‌ ئه‌وه‌ك هاته‌ سه‌ریان، دى له‌هویریان چى ك كورده‌یل فه‌یلى ستوین ئابوورى عراق بوین و له‌وه‌خت ده‌ركردنیان گشت خه‌یر وه‌لیانا ده‌ركریا، دى تاكه‌ى چه‌وه‌یلیان چه‌وه‌ڕى ئه‌و ناوچه‌یله‌ بكا.

 

ئسرا شاواز

ج