سیاسه‌ت و بڕیار ئه‌قڵانیه‌ت

شفق نيوز

 

ماناى ئه‌وه‌سه‌ ده‌رئه‌نجام ئى نه‌زریه‌ ك وه‌ فه‌لسه‌فه‌ى سیاسى ناسریاگه‌ ئه‌وه‌سه‌ ك بایه‌سه‌ ئه‌و چشته‌یله‌ چوین بوون و چوین نه‌ون، ك له‌ى دیده‌و باس له‌ كه‌سایه‌تیه‌یل سیاسه‌ت و له‌یه‌كه‌وده‌ره‌یل كه‌یم ك خوه‌یان وه‌ شاره‌زاو ئه‌زمووندار زانن و توایم ئه‌وه‌ بخه‌یمنه‌ روى ك ئایا ئیمه‌ تویه‌نیم سه‌ربكه‌فیم و زاڵ بویمنه‌ بان غه‌ڵه‌ته‌یل و له‌ هه‌مان وه‌خت وڵاتیش وه‌ره‌و خاستر بووه‌یم و له‌بان ئى بنه‌ما پلان دابنه‌یم؟

 

هویچ كه‌سیگ حاشا له‌ خاسسازى و شیوه‌یگ له‌ نادادگه‌رى كوومه‌ڵایه‌تى و سیاسى و له‌ ساى وجوود گه‌ناته‌كارى ناكا، وه‌لى ئیمه‌ بایه‌سه‌ یه‌كه‌مجار بویشیم به‌ڵى ئى دیارده‌یله‌ وجوود دیرن و دویاخر بویشیم چوین بتویه‌نیم چاره‌سه‌ریان بكه‌یم.

 

جوور فكره‌یگ له‌خوه‌ندنگاى نه‌زه‌ریه‌ى سیاسى ك ئویشید رویداگه‌یل چوینن بایه‌سه‌ بویشیم به‌ڵى ئى چشته‌ راسه‌و  هه‌وه‌جه‌ وه‌ خاسه‌وكردن دیرن و ته‌نیا ده‌سڵات و حكوومه‌ت ناگیرده‌و ، به‌ڵكوو گشتمان گریده‌و له‌هه‌ر پله‌و پۆستیگ بویچگ و گه‌ورا. هه‌ر له‌وه‌رئه‌وه‌یش بایه‌سه‌ گرنگى ئى باوه‌ته‌.

 

ئى مه‌سه‌له‌ له‌لاى گشتمان گرنگه‌، چوینكه‌ وڵات نیشتمان گشتمانه‌ نه‌ك هن گرووپیگ یا كه‌سیگ  یا لایه‌نیگ ، دى له‌بان ئى بنه‌مایشه‌ بایه‌سه‌ بجویلیه‌م و خزمه‌ت وه‌ وڵات بكه‌یم.

 

ئه‌فلاتۆن هویره‌و كردگه‌و فكر و هزر ئاده‌میزاد به‌شبه‌ش كردگه‌، به‌شیگ زه‌وق و خواست، به‌شیگ تواناو گه‌شه‌كردن، به‌شیگ ئه‌قڵانیه‌ت. ئه‌فلاتۆن ئویشید: ئه‌گه‌ر زه‌وق و خواست حوكم بكا ئه‌وه‌ نادادگه‌رى دروس بوود، وه‌لى ئه‌گه‌ر ئه‌قڵانیه‌ت حوكم بكا، ئه‌وه‌ كرده‌وه‌و بڕیار ئاقڵانه‌ له‌لى كه‌فیده‌و، ئنجا هه‌ر له‌وه‌ر ئه‌وه‌یش دویره‌وكه‌فتن له‌ زه‌وق و خواست تایبه‌ت ئه‌را هه‌ر وڵاتیگ و له‌جیاى ئه‌وه‌ ئه‌قڵانیه‌ت باریه‌یده‌ كار ماناى ئه‌وه‌سه‌ خوه‌شگوزرانى و خوه‌شه‌ویسى بووده‌ بنه‌ماى ژیان.

 

دانا جه‌زا

ج . أ