پشت له‌ به‌خت خوه‌د نه‌که

شفق نيوز

له‌يرا خوه‌شه‌ويسی و هاوسه‌رگيری و رزق و ڕووزی و مناڵ و شوون و كار و خوه‌نين و ته‌ندروسی و نه‌خوه‌شی و بازرگانی و كشتوكاڵی و سه‌ركه‌فتن و شكه‌ست و چشته‌يل تر ڕی وه‌پيان ئه‌دريه‌يد بچنه‌ ژير چه‌تر به‌خت، وه‌لی له‌يرا ئه‌خوازيم باس له‌ به‌خت بكه‌يم وه‌ ته‌نيا.

له‌ناو مه‌رم هووزه‌يل عه‌ره‌ب ئی وشه‌ له‌ ئه‌وساو ئيسه‌يش هه‌ر وه‌رده‌وام وجوود ديريد، ك وه‌ گووره‌ی هوير وڕای ئه‌وان ئی گوزاره‌ پيكهاتگه‌ له‌ چه‌ن ده‌رفه‌تيگ ك نه‌بايه‌د وه‌رده‌وام دوباره‌وه‌ بدێ و تايبه‌تمه‌نديه‌گه‌ی ئه‌وه‌سه‌ ك كه‌ی و چوين ئه‌و ده‌رفه‌ته‌ باريده‌ ده‌س وه‌رجه‌ ئه‌وه‌ك له‌ده‌س ده‌ربچوود.

ئمجا نزيكترين چشت ئه‌را هويره‌وكردن و پلان و ئازايه‌تی و خاسی وه‌كارهاوردن ده‌رفه‌ت و نه‌ف له‌لی وه‌رگرتن ئه‌وه‌سه‌ ك له‌ شانيه‌ت و بار ئاده‌ميزاد به‌رزه‌و ئه‌كا، ك هه‌ر وه‌و خاتريشه‌ جارجاريگ ژنه‌فيم ئويشن: فڵان به‌ختی هه‌ڵسيا، يا فڵانكه‌س به‌ختداره‌، وه‌لی وه‌ل ئه‌وه‌يشا ئويشن به‌ختيش وه‌ خوداسه‌ و كه‌سه‌يل فريه‌يگيش هه‌ن له‌ به‌خت خوه‌يان ترسيه‌ن و باس له‌ ده‌سكه‌فت و سه‌ركه‌فتن و كار و كرده‌وه‌يل نه‌فدار خوه‌يان ناكه‌ن له‌لای مه‌ردمان تر نه‌وه‌ك بكه‌فنه‌ ژير چه‌و حه‌ساده‌ت.

وه‌لی له‌ هه‌مان وه‌خت دانايه‌يل باس له‌وه‌ كردنه‌و ئويشن"پشت له‌ به‌خت خوه‌د نه‌كه‌"چوينكه‌ به‌خت له‌ قورئانيش ئاماژه‌ وه‌پی كرياگه‌و ته‌نانه‌ت دويا رووژ ئاده‌ميزاديش له‌ دونيای فانی ئه‌را مه‌ردمانيگ خاسكه‌رده‌ ك شوونيان به‌هه‌يشته‌ وه‌ به‌خت تاريف كرياگه‌، يه‌يش بيجگه‌ دارايی و له‌شساقی و مناڵ ساڵحان و زينه‌ته‌يل تر دونيايی ك وه‌ به‌خت دريه‌يده‌ قه‌ڵه‌م، ك له‌ڕاسی گشت ئی چشته‌يله‌ نعمه‌ت خوداييه‌، وه‌لی دوينيم له‌ كومه‌ڵگايه‌يليگ دوياكه‌فتگ ئه‌گه‌ردنه‌ شوون بڕيگ چشت خوارافی جوور كوچگ و زه‌نگيانه‌و به‌عزه‌ مادده‌يل تر ك گوايا ئی چشته‌يله‌ به‌خت ئه‌را ئاده‌ميزاد ئه‌يه‌ن! دی هوير له‌وه‌ ناكه‌ن به‌خت وه‌و خورافياته‌ نيه‌و له‌ خوداوه‌ نويسياگه‌ ئه‌را به‌نه‌يل خوه‌ی له‌بان ئی گووشه‌ی زه‌ويه‌و دانايی ئاده‌ميزاديش ئه‌وه‌سه‌ له‌ هاتن هه‌ر ده‌رفه‌تيگ خاس و گونجياگ پشت له‌ به‌خت خوه‌ی نه‌كاو پيشوازی له‌لی بكا تا له‌ده‌سی ده‌رنچوود و نه‌فه‌وتيه‌يد.

ئدريس جه‌ماع

ج . أ