ئه‌و مامۆستاى موسڵاويه‌..!!

خدر خه‌لات به‌حزانى

شه‌فه‌ق نيوز/ له ‌ناوڕاس ساڵه‌يل هه‌فتاى سه‌ده‌ى وه‌رين، مامۆستايگ ئافره‌ت له‌ خه‌ڵك شار موسڵ له‌ وه‌خته‌يل پشوو تاوسان وه‌ سه‌ياره‌ هاتياد ئه‌را ئاوايه‌گه‌مان "به‌حزانى" ده‌س دياده‌ دويه‌ت و ژنه‌يل نه‌خوه‌نه‌وار له‌ چوارچيوه‌ى به‌رنامه‌ى "نه‌هيشتن نه‌خوه‌نه‌وارى"له‌و وه‌خته‌يله‌.

 

ئه‌و مامۆستاى جوانه‌ فريه‌جار تيشێرتيگ نيم باڵ و ته‌نوره‌يگ تا خوار زرانيه‌يلى له‌وه‌ر كردياد، قژى كوڵ و سيه‌ى زوخاڵى بوى، زووانيشى فريه‌ شيرين بوى و هه‌ميشه‌ داوا له‌ ئيمه‌يش كردياد ك جارجاريگ چيايمنه‌ ناو خوه‌ندنگاگه‌و وتياد"ئه‌زيزم تويه‌نێد بچێد بيبسى سه‌رديگ ئه‌رام بارێد؟" ئمجا وه‌هه‌ر حاڵ به‌خت هه‌ركام له‌ ئيمه‌ خاس بوى هه‌ناى ئه‌و مامۆستاى موسڵيه‌ داواى سه‌ندن بيبسى له‌ليمان بكردێاد له‌و ئه‌سره‌يل تاوسانه‌ى گه‌رمه‌.

 

ئه‌و شه‌وه‌ ئى يادگاريه‌ كه‌فته‌ هويرم و له‌ دڵ خوه‌مه‌و ده‌سكردمه‌ به‌راوردكردن ئه‌و مامۆستاى جوانه‌ وه‌ل ژنه‌يل وه‌زيفه‌كار له‌ گشت عراق له‌ حاڵ حازر، ئمجا جياوازى فريه‌يگ داشت، يه‌يش بيجگه‌ ئه‌وه‌گ ئه‌و مامۆستا ئه‌را ماوه‌ى دو مانگ مه‌ينه‌تى چگن و هاتن فريه‌يگ كيشا له‌وه‌ر خاتر قورتاركردن دويه‌ته‌يل هاوڕه‌گه‌زى له‌ نه‌خوه‌نه‌وارى، يه‌يش له‌وه‌ختيگ ك هويچ جياوازييگ ئايينى يا نه‌ته‌وه‌يى يا مه‌زه‌وى له‌ وجوود نه‌وى و زوورم مه‌ردم ئاوايه‌گه‌مان ئێزيدى بوين.

 

باوه‌ڕم ئه‌وه‌سه‌ ك ئيسه‌ زه‌حمه‌ته‌ له‌بان هه‌ر مامۆستايگ تر موسڵى ك بچێد ئه‌را ده‌ورگرد موسڵ له‌وه‌ر ده‌رسداين له‌ ناوچه‌يل شوون نيشته‌جى كه‌مينه‌يل و غه‌يره‌ كه‌مينه‌يل، ئه‌ويش نه‌ك له‌وه‌ر هووكاره‌يل ئاسايشى، به‌ڵكوو زوورممان قه‌بول ناكه‌يم دويه‌تمان يا ژنه‌يلمان له‌ ناوچه‌يگ دوير ده‌وام بكا.

 

هه‌ر وه‌و خاتريشه‌ دوينيم ك جياوازييگ هه‌س له‌ گشت روييگه‌و، هووكاره‌گه‌يشى ئاشكراس ئه‌را گشتلايگ، وه‌لێ وه‌ل ئه‌وه‌يشا گشتمان له‌لى وايم تا ئسپاتى نه‌كه‌يم له‌ده‌يشت ئه‌و ڕزه‌يله‌ ك ئه‌چنه‌ ناو تنێليگ ك نازانيم كووتايه‌گه‌ى وه‌ره‌و كاملاس.

 

با ئه‌وه‌يش له‌ هويرم نه‌چێد ك سڵام بى پايانم ئه‌را ئه‌و مامۆستاى موسڵيه‌ ك ناوى نازانم، وه‌لێ ته‌مه‌نى شايه‌ت ئيسه‌ ها ناونى 65 تا 70 ساڵ و له‌ خودا داواكارم ساق و سه‌ڵامه‌ت بژيه‌يد، چوينكه‌ خزمه‌ت خاسيگ پيشكه‌ش كرده‌ خوه‌يشگ و داڵگه‌يلمان وه‌رجه‌ نزيكه‌ى 40 ساڵ.

خدر خه‌لات به‌حزانى