كه‌س لويتبه‌رز و ده‌وروه‌ر

شفق نيوز

  جوور ئه‌وه‌ك ئاشكراو دیاره‌، ئاده‌میزاد لویتبه‌رز په‌سه‌ن و خوه‌شه‌ویس نیه‌ له‌ناو مه‌ردم، چوینكه‌ مه‌ردم وه‌گشتى مه‌یله‌و تیكه‌ڵبوین و مامڵه‌كردن نین وه‌ل كه‌سه‌یل لویتبه‌رز مه‌گه‌ر له‌ حاڵه‌تیگ ك ناچار بوون.

كه‌سه‌یل لویتبه‌رز هه‌میشه‌ كه‌ڵك له‌ كه‌سه‌یل ده‌روین كز و كه‌سه‌یل كز وه‌رگرن، چوینكه‌ ئى جووره‌ كه‌سه‌یل كز و ده‌روین كزه‌یله‌ وه‌رده‌وام وه‌ شان و باڵاى ئه‌وانا هه‌ڵده‌ن و ئه‌وه‌نه‌ى تر هس وه‌ گه‌ورایى له‌لاى كه‌سه‌ لویتبه‌رزه‌گه‌ تووختره‌و كه‌ن.

گشت ئه‌و كه‌سه‌یل لویتبه‌رزه‌ وه‌رده‌وام حه‌ز وه‌ مامڵه‌كردن ئه‌و جووره‌ كه‌سه‌یله‌ كه‌ن ك باس له‌ شانیه‌تیان بكه‌ن، چوینكه‌ خوه‌یان له‌بان ئه‌و ئاده‌میزاده‌یل دره‌وین كزه‌ نیشان ده‌ن و ئه‌وانیش وه‌ چه‌و كه‌سه‌یل گه‌وراو كه‌موینه‌و هه‌ڵكه‌فتگ نوڕنه‌ پیان.

هه‌ر وه‌و خاتریشه‌ دوینیم ك كه‌س لویتبه‌رز خوه‌ى دویر گرید له‌و په‌یوه‌ندى و هه‌ڵویسته‌یل كوومه‌ڵایه‌تیه‌ ك ره‌خنه‌ ئه‌یه‌ریده‌ تویشیان، یا جوور كه‌سیگ نه‌خوه‌ش ته‌ماشاى ئه‌كا نه‌ك كه‌سیگ گه‌ورا.

وه‌ل ئه‌وه‌یشا كه‌سه‌یل لویتبه‌رز جه‌هانیگ تایبه‌ت وه‌ خوه‌یان دیرن و هه‌میشه‌ ئه‌یاده‌ تویش جه‌هانه‌گه‌ى ده‌وروه‌ر خوه‌ى، ك وه‌و خاتریشه‌ وه‌رده‌وام هه‌وڵ دروسكردن ئه‌و كه‌ش و باره‌یله‌ ئه‌یاد ك له‌ جه‌هانه‌گه‌ى خوه‌ى نزیكه‌و هه‌وڵ دروسكردن په‌یوه‌ندى كومه‌ڵایه‌تى ئه‌یاد وه‌ل ئه‌و ئه‌كته‌ره‌یلا ك نه‌خش دوینن له‌و جه‌هان تایبه‌ت ئه‌وه‌.

كه‌س لویتبه‌رز ناتویه‌نید وه‌ل كه‌سه‌یل لویتبه‌رز و هاوشیوه‌ى خوه‌ى هه‌ڵبكاو بگونجیه‌ید، چوینكه‌ هه‌ر یه‌كیگ له‌لیان باوه‌ڕى ئه‌وه‌سه‌ ك گه‌ورایى خوه‌ى ها بان گه‌ورایى گشت كه‌سه‌یل تر.

ئنجا له‌یرا خاكیبوین چه‌واشه‌ى لویبه‌رزیه‌، له‌وه‌ر ئه‌وه‌یش هه‌میشه‌ دوینید كه‌سه‌یل خاكى رووح سووكتر و خوه‌شه‌ویسترن له‌لاى كه‌سه‌یل ده‌وروه‌ر و ئاماده‌ن قوربانى بیه‌ن و به‌رژه‌وه‌ندى گشتى له‌وه‌رچه‌و بگرن و فیشتر كه‌سیلیگن واقعى.

سامان سیوه‌یلى

ج . أ