سه‌رمه‌د قه‌ڵه‌وڵسى: یانه‌ى كورده‌یل فه‌یلى ئازاد له‌بان نازناو خوماسى ڕكابه‌رى ئه‌كا

شفق نيوز

كومه‌ك و پشتگیرى كه‌میگ له‌لى كریه‌ید، وه‌لى له‌بان نازناو خول نایاب تووپ خوماسى له‌ى وه‌رز یا موسمه‌ ڕكابه‌رى ئه‌كا.

سه‌رمه‌د له‌ دیداریگ وه‌ل شه‌فه‌ق ئه‌وه‌یشه‌ ئاشكراكرد ك ئى بازیه‌ بازییگ تازه‌س له‌ عیراق و له‌ لایه‌ن میدیاوه‌ ئه‌وه‌نه‌ بایه‌خ وه‌پى نه‌دریاس.

*له‌باوه‌ت حاڵ و ڕووژگار ئى بازیه‌ و ئاكامه‌یل یانه‌ى كورده‌یل فه‌یلى ئازاد وه‌ خوماسى تووپان، و كاروان ئى بازیكه‌ره‌ وه‌لیه‌و له‌ى دیداره‌ ناوبریاگ ئویشێد:

- كاروان من وه‌ل ئى بازیه‌ وه‌ل تیمه‌یل مللى شار سه‌دره‌و ده‌س وه‌پى كردیه‌ و ئه‌را چه‌ن ساڵیگ وه‌ل تیم مللى ڕافده‌ین له‌ كه‌رت یا قه‌تاع 13 بازى كردمه‌ و له‌ شوون ئه‌وه‌یشه‌ له‌ ساڵ 2005 چویمه‌سه‌ ڕزه‌یل یانه‌ى كورده‌یل فه‌یلى ئازاد و تائمڕوو ئه‌راى بازى كه‌م.

* به‌شداریكردن یانه‌گه‌دان له‌ خول یا ده‌ورى خوماسى چوین هه‌ڵسه‌نگنید( تقییم كه‌ید)؟

- هه‌رچه‌نى ك كوومه‌ك و پشتگیریمان كه‌مه‌ و ستاد یا بازیگایگ ڕێك و پێك نه‌یریمن، وه‌لى تویه‌نستیمن خوه‌مان بڕه‌سنیمنه‌ خول نایاب له‌ شوون ئه‌وه‌گ له‌ ڕزبه‌ند یانه‌یل پله‌ یه‌ك یه‌كم ده‌رچویمن، و ئاست خاسیگیش له‌ خول نایاب دیریمن و وه‌ئومید خودا بویمنه‌ ڕكابه‌ر قه‌وه‌تداریگ له‌ بان نازناو خول نایاب.

* هووكار كه‌مى جه‌ماوه‌ر ونه‌هاتنیان ئه‌را ته‌ماشاكردن خول خوماسى چه‌س؟

- بازى خوماسى تووپان بازییگ تازه‌یه‌ له‌عیراق و وه‌ده‌س كه‌مى كوومه‌ك و پشتگیرى میدیایى و نه‌وین بازیگایه‌یل تازه‌ى پله‌دار و گه‌ورا ناڵنید.

* خاڵه‌یل نه‌رێنى وه‌رزش له‌ى وه‌خته‌ چه‌س؟

- لاوازى و كه‌مى پشتگیرى و كوومه‌كه‌یل دارایى و میدیایى، و كه‌مى بازیگایه‌یل تایبه‌ت وه‌ بازیه‌یل جیاجیا.

* چه‌ بایه‌د ئه‌را پیشخستن ئى بازیه‌ بكریه‌ید؟

- كاروه‌ده‌سه‌یل و په‌یوه‌ندیداره‌یل وه‌ وه‌رزش له‌ى وڵاته‌ بایه‌ته‌ وه‌ شیوه‌یگ جددى  بكه‌فنه‌ شوون  ئى بازیه‌، ئه‌وه‌ بیجگ له‌ بایه‌خ داین میدیایى وه‌ چالاكیه‌یل ئى بازیه‌ و بیناكردن بازیگایه‌یل تۆكمه‌ى تایبه‌ت ئه‌راى.

* ئه‌و مه‌شقكاره‌یله‌ كین ك قه‌رزار خاسییانید؟

-له‌ ناو تیمه‌یل مللى و هه‌ر له‌یوا له‌ یانه‌ى كورده‌یل فه‌یلى ئازاد منه‌تبار مامۆستا ره‌عه‌د سه‌لمان ( باوگ سوعاد) م و هه‌رله‌یوا (حاجى جه‌واد)، ئه‌وه‌ بیجگ له‌ عه‌لى ناسر و عه‌لى جه‌وهه‌ر.

*جوانترین بازیه‌یلد كامه‌؟

- بازیه‌گه‌ى یانه‌گه‌مان دژ وه‌ یانه‌ى نه‌فت ك وه‌ چوار گۆڵ به‌رانبه‌ر دو گۆڵ له‌ به‌رژه‌وه‌ندى ئیمه‌ ته‌واو بوى.

* جوانترین گۆڵد له‌ بان كى تۆمارى كردیده‌؟

- گۆڵیگ بوى له‌ بان یانه‌ى نه‌فت له‌ چواچیوه‌ى خول نایاب.

* بازیكه‌ر له‌ چه‌ن ڕزیگ:

- سه‌رمه‌د عومران شامراد قه‌ڵه‌وڵسى

- له‌ ساڵ 1979 په‌یا بویمه‌

- له‌ یانه‌ى كورده‌یل فه‌یلى ئازاد بازى كه‌م.

-ئاماده‌یى پیشه‌سازى ته‌واو كردمه‌.

 

ن:موشتاق ڕه‌مه‌زان

ت: ماجد سوێره‌مێرى