خه‌یرى له‌یه‌ بوود!!

شفق نيوز

 

جوور دابمان له‌ى گووشه‌ و لاپه‌ڕه‌ هه‌میشه‌ په‌نا به‌یمنه‌ وه‌سه‌رهات وقسه‌یل نه‌سته‌ق باوگ وباپیره‌یلمان ئه‌را پشتڕاسكردن ئه‌و ڕا و ئه‌ڕایچوینه‌یل ساده‌ و ئاسانه‌ ك هه‌وڵ ده‌یمن بخه‌یمنه‌ى وه‌رده‌س خوانه‌واره‌یلمان تا كه‌میگ له‌ سه‌ختیه‌یل ژیان له‌ى وڵاته‌ دویریانه‌و بخه‌یمن ئه‌گه‌ر وه‌خه‌یاڵیش بویه‌.

به‌ڵێ ئیجاریشه‌ ئى وه‌سه‌رهاته‌ ك له‌ زووان وهویر عه‌قڵ ومیرات پیشینه‌یلمانه‌و هاتیه‌ ئه‌رادان باس كه‌یمن ك ئویشێ:

یه‌كى له‌ پادشایه‌یل مه‌مڵه‌كه‌تیگ، وه‌زیریگ فره‌ دانا وعاقڵ داشت، وئى پادشا وه‌زیره‌گه‌ى فره‌ له‌خوه‌ى نزیكه‌وكردیاد و ئه‌را هه‌ركووره‌ بچیاتاد وه‌ل خوه‌یه‌و بردیاده‌ى.

هه‌رجارى ئى پادشا تویش گیچه‌ڵیك بهاتیاد یا كار گه‌نیگ روى بیاتاد، وه‌زیره‌گه‌ هه‌میشه‌ ودایم وتیاده‌ پى (خه‌یرى له‌یه‌ بوود) و وه‌ى شیوه‌ پادشا ئارامه‌و بویاد و ئسراحه‌ت كردیاد.

رووژیگ له‌ رووژان پادشا له‌ ناكاوا له‌ عان و وه‌خت ڕاوكردن له‌ چاره‌واگه‌ى كه‌فته‌ خوار و یه‌كیگ له‌ په‌نجه‌یل ده‌سى بڕیا.. جوور گشت جارى وه‌زیره‌گه‌ وت (خه‌یرى له‌یه‌ بوود)، وه‌لى ئى جاره‌ پادشا وه‌ى قسه‌ فره‌ تویڕه‌ بوى و وت چ خه‌یریگ له‌ بڕین په‌نجه‌ى منه‌و باد؟ و فه‌رمان دا وه‌زیره‌گه‌ بخه‌نه‌ زندان، وه‌هه‌مان شیوه‌ وه‌زیره‌گه‌ وت (خه‌یرى له‌یه‌ بوود) و وه‌ى جووره‌ وه‌زیره‌گه‌ ماوه‌یگ دریژ له‌ زندان مه‌نه‌و.

رووژیگ له‌ رووژان پادشا دوباره‌ مه‌یل راوكردن داشت و چوى ئه‌را ده‌یشته‌ى مه‌مڵه‌كه‌ته‌گه‌ى ئه‌را ڕاو، وه‌لى له‌ عان راوناین شكار فره‌ له‌ پاسه‌وانه‌یلى دویره‌وكه‌فت و له‌لى نوقمه‌و بوین ودیار نه‌مه‌نن، له‌ى عانه‌ وه‌لاى تایفه‌یگ بتپه‌رسته‌و ره‌د بوى و ئه‌وانیش ده‌سگیرى كردن و بردنه‌ى تا بكه‌نه‌ى قوربانى بته‌گه‌یان و له‌وه‌رپاى سه‌رى بووڕن، وه‌لى وه‌ختى نووڕستن په‌نجه‌ى ده‌سیگى بڕیاس، وڵى كردن، پادشایش وه‌ختى له‌ سه‌ربڕین، خودا نه‌جاتى دا، له‌خوه‌شیا وه‌خته‌ باڵ ده‌ربكردیاد و وه‌ هه‌ڵه‌په‌ڵه‌ روى كرده‌ شاره‌گه‌ى خوه‌ى... تا ره‌سیه‌ كووشك شاهانه‌، فه‌رمان دا پاسه‌وانه‌یلى بچن وه‌زیره‌گه‌ ئه‌راى بارن تا داواى وه‌خشین له‌لى بكا ئه‌را ئه‌و كردار وره‌فتاریه‌ وه‌ل ئى وه‌زیر دانا وخاسیه‌.. وه‌ختى هاوردنه‌ى وته‌ پى من ئیسه‌ وه‌خه‌یر بڕین په‌نجه‌گه‌م زانستم، وه‌لى له‌لى پرسى: وه‌ختى من فه‌رمان دام زندانى بكریه‌ید تو وه‌تید (خه‌یرى له‌یه‌ بوود) ئه‌ى چ خه‌یریگ له‌ زندانى كردن تنه‌وبوى؟ وه‌زیره‌گه‌یش جوواوى دا و وت : ئه‌گه‌ر له‌ زندان نه‌ویاتام و وه‌ل تنا بهاتیام ئه‌را راوكردن جوور گشت جارى، ئه‌و تایفه‌ من گردیان وكردیانه‌مه‌ قوربانى بته‌گه‌یان له‌جیاتى جه‌نابد و وه‌ى جووره‌ ئى زندانه‌ ئه‌را منیش بویه‌ خه‌یر و له‌ سه‌ربڕین قورتارم كرد!!

ماجد سوره‌میرى