وه‌رز كوردكوشتن

شفق نيوز

وه‌رزه‌یل كوردكوشى وه‌رده‌وام ریكخریا جوور قه‌ده‌ریگ نویسریاگ و رژیمه‌یل و هویچ مه‌ردمانیگیش له‌لیان جیاوازییگ له‌بانى نه‌یاشتن هه‌ر له‌ كپه‌وكردن شووڕش بارزان یه‌كه‌م و كوشتن شێخ عه‌بدولسه‌لام بارزانى 1918 بگر تاره‌سیه‌ شووڕش سمكۆ شكاك 1923و شووڕش شێخ سه‌عید پیران 1925و شووڕش ده‌رسیم 1938و شووڕش بارزان دویه‌م 1030و مهاباد 1945و بارزان سێیه‌م 1945و شووڕش ئه‌یلوول 1961و شووڕش 1976 و دویاى ئه‌وه‌یش په‌لاماره‌یل ئه‌نفال و له‌ناوبردن وه‌جه‌م و شووڕشه‌یل وه‌رده‌وام كورد ئه‌را فیشتر له‌ سێ ده‌یه‌ له‌ كوردستان باكوور و بیجگه‌ ئه‌وه‌یش كووچ وه‌پیكردن و ده‌ركردن فیشتر له‌ مه‌ردم په‌نج هه‌زار ئاواى كوردنشین و هه‌زاران قوربانى و تا جمشت وه‌رگرى ئیسه‌ى خوه‌رئاواى كوردستان"سوریا" له‌بان ئه‌و كورده‌یله‌ ك تویش تاوانه‌یل كوشتن و بڕین تیه‌ن له‌بان ده‌س ئه‌وانه‌ك خوه‌یان وه‌ وه‌رگیریكه‌ر له‌ ئایین موسڵمان و موسڵمانه‌یل زانن.

ئنجا له‌وه‌ر خاتر وه‌ردامێتى وه‌رز كوردكوشى، ریككه‌فتن سعه‌د ئابادو ریككه‌فتن ته‌هران و هاوپه‌یمانێتى به‌غداو ریككه‌فتن جه‌زایر و ریككه‌فتن دولایه‌نه‌ى ناونى پایته‌خته‌یل ناوچه‌گه‌ ئه‌نجام دریا له‌باوه‌ت راوناین و كوردكشى له‌لایه‌ن لایه‌نیگه‌و له‌ناوخود مه‌رز ده‌وڵه‌تیگه‌و ئه‌را لایه‌نیگ تر و هیمان تائیسه‌یش ئى جووره‌ ریككه‌فتنه‌یله‌ له‌ناونى عراق و توركیا وه‌رده‌وامه‌ ك هه‌رچه‌نى رژیم دیكتاتۆرى به‌غدایش رمیا!

ئیسه‌یش ئه‌وه‌سه‌ له‌ سوریا ده‌س كریاسه‌ كوردكوشى، ك هه‌رچه‌نى خودا ملله‌ت و ئاده‌میزاد دروس كردگه‌ ئه‌را ئه‌وه‌ك ئاشناى یه‌كترى بوون و له‌ جوورایه‌تى پیكهاته‌و مه‌ردمیش جووره‌ حكمه‌تیگ هه‌سه‌و ملله‌ت كوردیش هه‌ر له‌وه‌ختیگ هاتنه‌سه‌ ناو ئسلام خزمه‌ت وه‌پى كردگه‌و هه‌زاران قوربانى شه‌هید داگه‌ له‌وه‌ر خاتر ئسلام و سه‌ده‌ها كتاو له‌بان ئسلام و موسڵمان بڵاوه‌و كردنه‌و فكرمه‌نه‌یل و زانایه‌یلیش هه‌ر له‌ خزمه‌ت ئسلام بوینه‌. ئنجا جى داخه‌ گشت ئى تاریخ پاك و بیگه‌رده‌ له‌وه‌رچه‌و ئه‌و گرووپه‌یل ئسلامیه‌ نیه‌ ك وه‌ناو ئسلامه‌و ده‌س كردنه‌سه‌ كوردكوشى و روى تفه‌نگ و چه‌كه‌یلیان كه‌نه‌ كوردو ژن ومناڵ و پیره‌یل كورد كوشن!!

سه‌د ساڵه‌ كورد راو نریه‌ید و كوشیه‌ید و تاوانه‌یل دڕنده‌ ده‌رهه‌قى ئه‌نجام دریه‌ید، سه‌د ساڵه‌ كاره‌سات و په‌لاماره‌یل له‌ناوبردن وه‌جه‌م و كوشتن له‌بان ناسنامه‌ له‌بانیان جیوه‌جى كریه‌ید، سه‌د ساڵه‌ زوڵم و سته‌م فره‌یه‌یگ له‌لیان كریه‌ید و ئه‌و هه‌قه‌یلیانه‌ زه‌فت كریه‌ید ك شه‌ریعه‌ت خوداو یاسایه‌یل وه‌پیان حه‌ڵاڵى كردگه‌، وه‌ل ئه‌وه‌یشا وه‌رز كوردكوشى هه‌ر وه‌رده‌وامه‌، وه‌لى گه‌رده‌لویل ئاڵشتكارى ها ڕیه‌وه‌و هویچ گومانیگ له‌تى نیه‌و هه‌ر بایه‌سه‌ وه‌رز كوردكوشى كووتایى داشتوود.

سه‌ربه‌ست بامرنى

ج .أ