خشت بنه‌ڕه‌ت(شۆرجه‌)ى به‌غدا فه‌یلیه‌یل دایمه‌زرانن

شفق نيوز

تاریخنویس!! له‌وه‌یش زیاتر دوینید خیانه‌ت گه‌وراگیش كریه‌یگ له‌دزین و چه‌واشه‌كردن تاریخ و ده‌سكاریكردن بنه‌ڕه‌ت هه‌ر راسییگ ، هه‌ر له‌وه‌ر ئه‌وه‌یش دوینیم جاریگ كه‌سایه‌تیه‌یل و ناوداره‌یل كوردمان وه‌ قه‌ڵه‌م ناحه‌زه‌یل كریه‌نه‌ بیگانه‌و جاریگ خاك وئاومان ته‌عریب كریه‌یگ و فره‌جاریش ناو ئه‌و شوون و بازاڕه‌یله‌ ك وه‌ده‌س كورد دامه‌زریانه‌و تاریخ ره‌سه‌نایه‌تى دیرن.

بازاڕ شۆرجه‌ له‌به‌غدا، ئه‌و بازاڕه‌سه‌ ك تائیسه‌یش هه‌ر تام كورده‌وارى وه‌پیه‌وه‌ دیاره‌و زوورم دوكانداره‌یل و خاوه‌ن باڵه‌خانه‌(عماره‌)یلیش هه‌ر كوردن. ئنجا ئیمه‌ر له‌یرا بیلا وه‌گووره‌ى ئه‌قڵ هویره‌و بكه‌یم، چوینكه‌ گشت راسییگ له‌چوارچیوه‌ى ئه‌قڵه‌وه‌ خوه‌شه‌.

من له‌یرا پرسم له‌وانه‌ك تاریخ شیونن، ئایا هیز داگیركه‌ر چ په‌یوه‌ندییگ دیرى وه‌دامه‌زرانن بازاڕه‌وه‌؟ چ وه‌ختیگ و له‌چ زه‌مانیگ بویه‌ مه‌ردم وڵات خوه‌ى باریگ و شوونیگ یا بازاڕیگ له‌وڵاتیگ تر دامه‌زرنیگ ئه‌گه‌ر مه‌ردم ڕه‌سه‌ن خود ناوچه‌گه‌ نه‌ود؟ له‌وه‌خت ده‌سڵات عوسمانلى و داگیركارى تورك له‌به‌غدا، ئه‌و كاره‌یله‌ ك ئه‌نجامیدانه‌ ته‌نیا ئه‌وه‌زكردن و لاوردن ناوه‌یل كویه‌ن و تاریخى بویه‌و ئاڵشتى كردنه‌ ئه‌را ناوه‌یله‌ ك موور سه‌ڵته‌نه‌ت عوسمانى وه‌پیه‌وه‌ بویه‌و ئامانجیان له‌ى كاره‌یلیشه‌ ته‌نیا داگیركردن و له‌ناوبردن ره‌سه‌نایه‌تى تاریخمان بویه‌!

ئاشكراس ك ئیمه‌ى كورد، دوشمنه‌یلمان دووس یه‌كن و له‌تاریخ یه‌كترى دانیه‌وڕن جویر ئه‌وه‌ك له‌تاریخ ئیمه‌ دزى كه‌ن! چوینكه‌ چه‌واشه‌كردن تاریخ و كلتوور ئیمه‌ گرنگى یا ئه‌همیه‌ت تایبه‌تیگ له‌لایان دیرى، هه‌ر له‌وه‌ر ئه‌وه‌یش تویه‌نیم بویشیم: بازاڕ شۆرجه‌ له‌به‌غداى پاینه‌خت و دڵ عراق كورده‌یل فه‌یلى دایمه‌زراننه‌، نه‌ك بیگانه‌یل عوسمانلى و ده‌لیلیش له‌دامه‌زراننى ئه‌وه‌سه‌ ك ده‌وروه‌ر ناوچه‌ى شۆرجه‌ شوون نیشته‌جاى كورده‌یل فه‌یلى بویه‌ وه‌تایبه‌ت له‌ خوه‌رهه‌ڵاتى ك جویر ئاوایه‌یل بویچگ و باخ و بوسانیش داشتنه‌، ئنجا یه‌كیگ جویر جه‌لال حه‌نه‌فى ئویشیگ : ئاویگ  شووره‌كات وه‌ شۆرجه‌یا گوزه‌ كردگه‌و ئى وشه‌ى(شۆرجه‌) له‌و(شوره‌كات)ه‌وه‌ هاتگه‌ ك ماناى ئاو شوور ده‌یگ .

له‌ڕوى تاریخه‌وه‌ كورده‌یل فه‌یلى بیجگه‌ ئه‌وه‌ك حوكمڕانى وڵاته‌گه‌ كردنه‌ ئه‌را ساڵه‌یل فره‌یگ ، وه‌لى وه‌ل ئه‌وه‌یشا هویچ وه‌ختیگ وجوودیان له‌بازاڕیگ جویر شۆرجه‌ نه‌وڕیاگه‌ ك سه‌رچه‌وه‌ى ئابوورى عراق بویه‌و فه‌یلیه‌یل له‌ بنیاتناینى نه‌خش یا ده‌ور سه‌ره‌كى داشتنه‌. وه‌لى مه‌سه‌له‌ى سیاسه‌ت چه‌فت كووچ وه‌پیكردن زووره‌ملى و دوشمنایه‌تیكردن بازرگانه‌یل له‌یوا كرد ئه‌را ماوه‌ى چه‌ن ده‌یه‌یگ كورد فه‌یلى كه‌متر خوه‌یان بخه‌نه‌ وه‌رچه‌و.

شۆرجه‌ بیجگه‌ ئه‌وه‌ك بازاڕه‌یل جیاجیایگ دیرى وه‌ك: بازاڕ سابوون، بازاڕ مامر، بازاڕ ده‌هانه‌...هتد، له‌هه‌مان وه‌خت شوونه‌واره‌یل فره‌یگیش له‌تى كریه‌یگه‌دى هه‌ر له‌ خان بگر ك شوون به‌تاڵكردن كاڵاى ده‌یشته‌كى وهاوریاگ و شوون وچانداین بازرگانه‌یل بویه‌ تا ڕه‌سیگه‌ شوونه‌وار جویر مزگفت حه‌یده‌رخانه‌و مه‌دره‌سه‌ى مه‌رجانیه‌و مزگفته‌ كویه‌نه‌گه‌ى قه‌سر ك تاریخى دروسكردنى چووگه‌وه‌ ئه‌را سه‌رده‌م ئیڵخانیه‌یل له‌سه‌ره‌تاى جاده‌ى جمهوورى و دویاى ئه‌وه‌یش مزگفت و مه‌دره‌سه‌ى ئه‌حمه‌دى نزیك وه‌ شۆرجه‌، گشت ئى شوونه‌واره‌یله‌ موور كوردى وه‌پیانه‌وه‌ بویه‌. ماناى ئه‌وه‌سه‌ بنه‌ڕه‌ت شۆرجه‌ى به‌غدا دامه‌زرنه‌ر خوه‌ى دیریگ ، ك ئه‌ویش كورده‌یل فه‌یلیین.

 

حسێن برابویچگ