با كوردستان وه‌ جوانى خوه‌ى بمینێ

شفق نيوز

له‌كویه‌نه‌وه‌ شوونیگ ستراتیجى گرنگ بویه‌، هه‌ر له‌وه‌ر ئه‌وه‌یش گه‌شتكه‌ره‌یل بیگانه‌ ڕوى له‌لى كردنه‌و له‌بانى نویسانه‌. كوردستان له‌ سه‌ره‌تا بویه‌سه‌ شوون گه‌شتیارى موسڵمانه‌یل ك به‌شیگ له‌تاریخ گه‌شت ئه‌را كوردستان توومار كردنه‌. ئنجا له‌و گه‌شتكه‌ره‌یل خوه‌رئاواییه‌ ك هاتنه‌سه‌ كوردستان(ماركۆپۆڵۆ)ى ئیتالى بویه‌ ك له‌سه‌ده‌ى 12 و 13زایینى هاتیه‌سه‌ كوردستان.

دكتۆر كه‌مال مه‌زهه‌ر ئویشیگ: ماركۆپۆڵۆ نزیكه‌ى سێ ساڵ و شه‌ش مانگ ڕى ناونى فینیسیاى ئۆرپاو به‌كین ئاسیا بڕیه‌ تا ڕه‌سیه‌سه‌ كوردستان، وه‌و جووره‌ دویاى 16 ساڵ گه‌ردین وه‌ وڵاته‌یل خوه‌رهه‌ڵاتا، گه‌شتنامه‌ى خوه‌ى نویساگه‌ ك بویه‌سه‌ سه‌رچه‌وه‌یگ گرنگ یاموهم تاریخى ڕووژهه‌ڵات، ئه‌ویش له‌ژیر ناونیشان (كتاو ئه‌ڵڵاجه‌وى)ه‌یل، ك ناوچه‌ى ڕووژهه‌ڵات وه‌پى له‌یه‌كه‌و داگه‌.

بیگومان جویر ئه‌وه‌ك سه‌رچه‌وه‌یل تاریخى باس كه‌ن، ده‌یه‌ها تاریخنویس و گه‌شتكه‌ر بیگانه‌ باس له‌ جوانى و ده‌وڵه‌مه‌نى كوردستان كه‌ن و له‌باوه‌ت داب ونه‌ریت و ڕه‌فتار كورده‌وه‌ زانیارى فره‌یگ نویسانه‌ بیجگه‌ لایه‌ن سه‌ربازى و سیاسى و جوگرافى. گه‌شتكه‌ره‌یل بیگانه‌ كار خاسیگ پیشكه‌ش كردنه‌ له‌باوه‌ت مه‌سه‌له‌ى كوردناسیه‌وه‌، یه‌یش له‌وه‌ر ئه‌وه‌ك سروشت جوان كوردستان و هه‌ڵكه‌فته‌ جوگرافیه‌گه‌ى له‌یوا كردگه‌ فره‌ترین شماره‌ى ئه‌و گه‌شتكه‌ر و تاریخنویسه‌یله‌ ڕوى بكه‌ن نیشتمانه‌گه‌مان و له‌بان مه‌یدانه‌یل جووراوجوور كورد بنویسن.

كوردستان له‌ڕوى جوانیه‌وه‌ ناوچه‌یگ بیوینه‌و سروشتیه‌ ك خوداوه‌ند به‌خشاسه‌ى كورد، وه‌ل ئه‌وه‌یشا خاكه‌گه‌ى پڕ پیت و به‌ره‌كه‌ته‌و سه‌رچه‌وه‌ى سامانه‌یل سروشتیه‌، ك هه‌رچه‌نى وه‌ دریژایى ساڵه‌یل فره‌یگ كه‌فته‌سه‌ ژیر ده‌س داگیركاره‌یل و ئیمه‌ جویر میوان له‌تى دانه‌سه‌ قه‌ڵه‌م، وه‌لى خوه‌شبه‌ختانه‌ به‌ش باشوورى كه‌فته‌وه‌ر شووڕش ئازادى و ئه‌وه‌سه‌ خوه‌شگوزرانى و ئاوه‌دانى له‌تى كریه‌یگه‌ دى.

تویه‌نیم بویشیم كوردستان شوونیگ ئه‌وه‌نه‌ گرنگ یا ئه‌همیه‌تدار بویه‌ خوه‌رهه‌ڵاتناسه‌یل هه‌میشه‌ هساو تایبه‌ت ئه‌ڕاى كردنه‌، هه‌ر له‌وه‌ر ئه‌وه‌یش بایه‌سه‌ ئیمه‌ى كوردیش ك نیشتمانمان كوردستانه‌و هه‌وڵ ئازادى و سه‌روه‌خوه‌یى ئه‌راى دیایم و شووڕشه‌یل فره‌یگ له‌وه‌ر خاترى به‌رپا كریاو ئیسه‌یش په‌رچه‌مه‌گه‌ى وه‌ئازادى له‌ریه‌یگه‌وه‌، نه‌یلیم ئى جوانى و سروشت خودایى و سه‌روه‌ت و سامان كوردستانه‌ بفه‌وتیه‌یگ و ڕه‌نج چه‌ن ساڵه‌ى خه‌باتمان وه‌زاى بچووگ. ملله‌ت كورد بایه‌سه‌ وه‌ سه‌ركرده‌و حزب و هاووڵاتیه‌یلیه‌وه‌ هه‌وڵ مقه‌یه‌تیكردن ده‌سكه‌فته‌یل بیه‌ن و ته‌قلاى زیاتر بكه‌ن ئه‌را وه‌ده‌سهاوردن چشته‌یل تر، چوینكه‌ ئى نیشتمانه‌ وه‌خوین پاك شه‌هیده‌یل و هه‌وڵ ته‌قلاى پێشمه‌رگه‌و شووڕكاره‌یل هاته‌سه‌وه‌. ئنجا ئایا بیگانه‌یگ ئه‌گه‌ر ماوه‌ى سێ ساڵ و شه‌ش مانگ ڕى بڕویگ تا ڕه‌سیه‌سه‌ كوردستان و كتاویگ له‌بان جوانى و سروشت كوردستان نویساویگ ، ئه‌ى ئیمه‌ چوین نیه‌تویه‌نیم وه‌ یه‌كده‌نگى و یه‌كدڵیه‌وه‌ مقه‌یه‌تى له‌لى بكه‌یم؟ هه‌ر له‌وه‌ر ئه‌وه‌یش ئویشیم: با كوردستان وه‌جوانى خوه‌ى بمینیگه‌وه‌، چوینكه‌ شوونیگ تر نه‌یریم بیجگه‌ خاكه‌گه‌ى خوه‌مان و بیلا قه‌در ئه‌و جوانیه‌ بگریه‌یگ تا نه‌شیویه‌یگ.