له‌ عراق تازه‌.. قه‌سه‌ميگ وه‌ ٨ مليار دۆلار

شفق نيوز

 

مێژوو قه‌سه‌مخواردن ئه‌چێده‌و ئه‌را سه‌ره‌تای دروسبوين ئاده‌ميزاد له‌شوون ياخيبوين شه‌يتان و قه‌سه‌مخواردنی وه‌ گه‌ورايی خودا، له‌لايگ تريشه‌و خودای په‌روه‌ردگار ٤٠ جار له‌ قورئان كه‌ريم قه‌سه‌م خواردگه‌، جاريگ وه‌ سه‌وزی و ميوه‌جات و جاريگ وه‌ ئاساره‌و خوه‌ر و چشته‌يل تر.

دی ئاساييه‌ ك جياوازی فراوانيگ وجوود داشتوود له‌ناونی قه‌سه‌مخواردن خودايی و قه‌سه‌م ئاده‌ميزاد، قه‌سه‌م خودا له‌وه‌ر ترس يا چه‌سپانن ماف نه‌ويه‌، به‌ڵكوو له‌ ديد زانست ريننمايی و يادخستن و چه‌سپانن راسيه‌يل گه‌ردوونه‌، وه‌لی قه‌سه‌م بريگ ئاده‌ميزاد وه‌خاتر ده‌رخستن هه‌قه‌يل حاشاكرياگه‌و دوياخريش ئه‌دێده‌ هه‌ڵويستيگ و ئه‌كاده‌ی خواستيگ له‌ ملله‌ت وه‌گشتی، يه‌يش وه‌تايبه‌ت ئه‌رگه‌ر مه‌سه‌له‌گه‌ په‌يوه‌س بوود وه‌ خاڵيگ بنه‌ڕه‌تی جوور ئه‌وه‌ك مه‌ردمان فريه‌يگ روی له‌لی ئه‌كه‌ن وه‌خاتر ره‌سين وه‌ مه‌رام و ئامانجه‌يليان.

ئامانج له‌ی پيشه‌كيه‌ ئه‌وه‌سه‌ ك له‌ عراق تازه‌مان وه‌ تايبه‌ت له‌ ئه‌نجوومه‌ن بريارداين ك ڕيڕه‌ويگه‌ وه‌ره‌و حكوومه‌ت، كانديده‌يل هه‌وه‌جه‌ وه‌ قه‌سه‌مخوادرن ديرن دويای وه‌ده‌سهاوردن لايه‌نگری بڕيارده‌ره‌يل و داين متمانه‌ وه‌پی، يه‌يش جوور ئه‌وه‌ك رويدا وه‌ل كانديده‌يل كورد ك ره‌سينه‌ پۆست حكوومه‌ت و پۆسته‌يل وزاری دويای ٤٠ رووژ له‌ دامه‌زرانن حكوومه‌ت تازه‌، يه‌يش دويای ئه‌وه‌ك عبادی جوور مه‌رجيگ چه‌سپانه‌ی ئه‌را بنه‌ڕه‌ت داين مافه‌يل دارايی له‌ مووچه‌يل كوردستان.

ئمجا جوور ئه‌وه‌ك ئاگاداريم له‌لی، فريه‌يگ له‌ مه‌ردم روی له‌ قه‌سه‌مخواردن ئه‌كه‌ن وه‌ مه‌هانه‌ی جوراوجوور، له‌ليان هه‌س له‌وه‌ر قانجازيگ ئاسايی و له‌ليانيش هه‌س قه‌سه‌مه‌گه‌ی هويچ چشتيگ وه‌پی ناوه‌خشيد ياد بكريه‌يد، ته‌نيا قه‌سه‌مخواردن وه‌زيره‌يل كورد نه‌دێ ك ٨ مليار دۆلاره‌ وه‌خاتر جيوه‌جيكردن مه‌رج سه‌رۆك وه‌زيره‌يل و كووتايی ئه‌يه‌ريده‌ قه‌يرانيگ وه‌رته‌نگ ك ئه‌را ماوه‌ی ساڵيگه‌ دريژه‌ داشت له‌وه‌ر مه‌يل و خواسته‌يل سياسی.

دوياخريشه‌ باوه‌ڕ ناكه‌م ك قه‌سه‌ميگ له‌ مێژوو ئی بڕه‌ پويله‌ خه‌رجی بويه‌، ٨ مليار دۆلار له‌ وه‌رانوه‌ر قه‌سه‌ميگ تا ماف مه‌ردم باريده‌و، ك وه‌چه‌واشه‌ی ئه‌وه‌ ئی قه‌سه‌مه‌ ئه‌خريه‌يده‌ خانه‌ی شكه‌ست له‌وه‌ر پيشبينيكردن مليۆنه‌ها كه‌س له‌ ملله‌ت كوردستان وه‌خاتر هووكار بيبه‌شكردنيان له‌ مافه‌يل سروشتی خوه‌يان.

عه‌لی حسێن فه‌يلی

ج . أ