حكوومه‌ت غه‌ريبی
ته‌نيا لايه‌ن كز و ناتوانايش له‌بان ئاڵشتكردن گفت و برياره‌يل ئه‌را كرده‌وه وه‌خاتر مقه‌يه‌تيكردن ئاسايش و سه‌قامگيری و وه‌رگری له خاك و هاووڵاتی، حكوومه‌ت به‌غداس وه شيوه تازه‌گه‌ی ك باس له وه‌خت له‌ده‌سچگ و باس له جمداين دوسيه‌يل ئه‌كا جوور هه‌ر جاريگ وه ئه‌وه‌ك جاده گووشه‌قه‌ڵاخه‌و بكاو گرژی فيشتره‌و بكاو ئه‌نگه‌مه بخاده ئه‌و جموجويل سياسيه ك جوور ته‌نيا چاره‌سه‌ر مه‌ندگيگ ئه‌را قورتاربوين له قه‌يران زانيمنه‌ی.
له‌ی بار ئيسه دوينيم هه‌ر ناوچه‌يگ يا شاريگ يا كويچه‌يليگ سيستميگ هاوشيوه‌ی سيستم حكوومه‌ت و سه‌ركرده‌يل حزب و هووزه‌يل و مير تايفه‌يل ديريدو مه‌شق زاڵبوين ئه‌كه‌ن له‌بان مه‌ردم وه‌بی چه‌وديری و ترس له سزاداين، چوينكه حكوومه‌ت ناوه‌ندی ساڵه‌يليگه بويه‌سه قه‌واره‌يگ تايبه‌ت و پيكهاتگه له سه‌رۆك ئه‌نجوومه‌ن وه‌زيره‌يل و ئه‌و راوێژكاره‌يليه ك ده‌سڵات گرتنه بان دام و ده‌زگايه‌يل ده‌وڵه‌ت، وه‌لی وه‌گووره‌ی ياسا مامڵه ناكه‌ن و دگان نه وه په‌رله‌مان و نه‌يش وه باقی ئه‌و لايه‌نه‌يل تر په‌يوه‌نديداره نانه‌ن ك په‌يوه‌ندی وه قه‌واره‌يگ تر ديرن و ناوی ده‌وڵه‌ت بوی وه دريژايی ساڵه‌يل وه‌رين و هه‌ر خه‌ريك داناين نه‌زه‌ريه‌يگ بوين ئه‌را پلان.
هه‌ر له‌وه‌ر ئه‌وه‌يش مادام ده‌سكه‌فتيگ له وجوود حزب و فراوانبوين شێخه‌يل ئه‌شاير و قه‌واره‌يل مه‌ده‌نی و چه‌ك و ته‌قه‌مه‌نی فريه‌و كاروانه‌يل بی كووتای قوربانيه‌يل هه‌س، هه‌ر بايه‌سه هه‌قيش بدريه‌يده كووچبه‌ره‌يل و ده‌ركرياگه‌يل ك حكوومه‌ت له‌ژير سای خه‌يوه‌ت غه‌ريبی ساز بكه‌ن، وه‌تايبه‌ت ئه‌وانه‌ك ك ئه‌كه‌فنه وه‌ر كوشتار ترۆر و حكوومه‌تيش فرامووشيان ئه‌كاو مه‌ردميش وه قسه‌و درووشم دڵسووزی ئه‌رايان ديرن و گله‌وخواردنيان ئه‌را شاره‌يليانيش جوور خه‌ويگ وه‌پی هاتگه، ك ئايا ماف خوه‌يان نيه هوير له خاك تازه‌يگ بكه‌ن و قه‌واره‌و دام و ده‌زگای تازه له‌تی دامه‌زرنن، ك ئه‌وانه ملله‌ته‌يليگن خاوه‌ن ئايين و ده‌وڵه‌مه‌ن له‌ڕوی مێژوو و تاريفكردن ئه‌و زه‌ره‌ده‌يل گيانی و لاشه‌ييه ك هاته تويشيان؟
وه‌ل ئه‌وه‌يشا سه‌ركرده‌يل سياسی توانای ئه‌وه ديرن ئه‌زموونه‌يليان جيواز بكه‌ن ئه‌را باقی ده‌وڵه‌ته‌يل، وه‌لی نه‌ك ئه‌را بنياتناين، به‌ڵكوو ئه‌را ئه‌و عبره‌ته ك عراق و خاك و ملله‌ته‌گه‌ی وه‌پی رسانن له حاڵيگه‌و ئه‌را ئی حاڵه ك گشتمان ئيسه له‌تی ژيه‌يم. ك هه‌ر له‌وه‌ر ئه‌وه‌يش بايه‌سه له‌بان وه‌رپرسه‌يل ئی وه‌خته ئه‌وه بزانن ك هه‌ق ئه‌وه نه‌يرن شانازی وه ده‌سكه‌فته‌يل چه‌سپياگيان بكه‌ن، به‌ڵكوو بايه‌سه له‌بانيان دگان وه غه‌ڵه‌ته‌يل پڕ كاره‌سات و دريغيكردنيان بنه‌ن له‌گشت بواريگه‌و.
عه‌لی حسێن فه‌يلی
ج . أ
