ئه‌قڵیه‌ت مه‌ركه‌زى

شفق نيوز

  ئمزاكردن ریككه‌فتنه‌یل كلكردن نه‌فت وه‌ل حكوومه‌ت توركیا له‌ لایه‌ن حكوومه‌ت هه‌رێم كوردستانه‌و، هس ناسیۆنالیستى و مه‌ركه‌زیخوازى حكوومه‌ت به‌غدا جویلانه‌سه‌و تا راده‌یگ ك وه‌ نایاسایى ده‌نه‌ى قه‌ڵه‌م.

باوه‌ڕ ناكریه‌ید ئه‌و ریككه‌فتننامه‌یله‌ نایاسایى و ده‌ستوورى بوون، چوینكه‌ وڵاتیگ جوور توركیا ك خاوه‌ن تاریخیگ دویر و دریژ ده‌وڵه‌تداریه‌، ناكریه‌ید هساو یاسایى و نایاسایى ئه‌را ئه‌و ریككه‌فتنه‌یل نه‌كردوید.

ده‌وڵه‌ت عراق هه‌میشه‌ نه‌فت جوور وه‌سیله‌یگ سه‌ركوتكردن هاورده‌سه‌ كار و ده‌سكه‌فته‌یل فرووشتن نه‌فتیش ئه‌را سه‌ندن چه‌ك و جبه‌خانه‌ى سه‌ربازى وه‌كار هاوردگه‌، ك هه‌میشه‌ دژ كورد هاورده‌سه‌ى كار و خه‌ڵك عراق هویچ قانجاز خاسیگ له‌لى نه‌كردنه‌ ته‌نیا ماڵویرانى نه‌ود ئه‌را گشت عراقیه‌یل، وه‌تایبه‌ت ئه‌را كورد.

حكوومه‌ت هه‌رێم كوردستانیش دویاى پرس وڕا وه‌ شاره‌زایه‌یل سیستم فیدراڵى و ریككه‌فتننامه‌یل نه‌فتى و دڵنیابوین له‌ ده‌ستوورى و یاساییبوین ئمزاكردن ئه‌و ریككه‌فتننامه‌یله‌، دیاره‌ ئه‌و گامه‌یله‌ ناگه‌.

یه‌یش له‌وه‌ختیگه‌ ك ئه‌و نه‌فت و غازه‌ له‌ خاك كوردستان دراوریه‌یدو موڵك مه‌ردم كوردستانه‌ 83% ى دریه‌ید حكوومه‌ت عراقى و ته‌نیا 17% ى ئه‌را هه‌رێم كوردستانه‌، ئنجا وه‌ل ئه‌وه‌یشا هیمان ئه‌وانیش له‌ به‌غدا ناڕازیین و گشت ئى ریككه‌فتننامه‌یله‌ وه‌ نایاسایى ده‌نه‌ قه‌ڵه‌م.

ئنجا به‌و له‌سامان ژیر زه‌وى وڵاته‌گه‌ى خوه‌د به‌ش شیر بیه‌ حكوومه‌ت و گشت مه‌ردم عراق و دوینید وه‌و به‌ش كه‌م هه‌رێمیشه‌ رازى نیه‌ون و ئه‌خوازن گشت ده‌سكه‌فت نه‌فت و غاز بچووده‌ گیرفان به‌غداو ئه‌وانیش وه‌ ئاره‌زوو خوه‌یان ره‌فتار وه‌لیا بكه‌ن، ك دیارترینیان وه‌كارهاوردن ئه‌و پویله‌سه‌ جوور كارت فشار ئه‌یه‌رنه‌ى كار ئه‌را بان حكوومه‌ت هه‌رێم و خه‌ڵك كوردستان.

هه‌ر وه‌و خاتریشه‌ حكوومه‌ت هه‌رێم كوردستان بایه‌سه‌ مكوڕ بوود له‌بان یاساییبوین ئه‌و ریككه‌فتنه‌یله‌ له‌ به‌غداو داكووكى بكا وه‌ل وه‌رپرسه‌یل حكوومه‌ت فیدراڵى، وه‌لى گرینگ له‌یرا هه‌ڵویست په‌رله‌مان و حزبه‌یل كوردستانى خوه‌مانه‌ ك بایه‌سه‌ ئه‌وانیش وه‌بى گووشداین وه‌ جیاوازى هویرو ئه‌ڕاى چوین سیاسى پشتگیرى له‌ حكوومه‌ت و ریككفه‌تننامه‌یلى بكه‌ن و هان مه‌ردم كوردستان بیه‌ن چشتگیرى له‌ حكوومه‌ت هه‌رێم بكه‌ن.

بیجگه‌ ئه‌وه‌یش بایه‌سه‌ میدیایه‌یل خوه‌مانییش له‌ى مه‌سه‌له‌ى چاره‌نویسسازه‌ وه‌ ئیجابى باس ئى ریككه‌فتننامه‌یله‌ بكه‌ن و جوور هه‌قیگ ره‌واى ملله‌ته‌ خه‌باتكه‌ر و قوربانیده‌ره‌گه‌مان بزاننه‌ى و مه‌ترسى ئه‌قڵیه‌ت مه‌ركه‌زى ئه‌را مه‌ردم ئاشكرا بكه‌ن.

سه‌ڵام عه‌بدوڵڵا

ج . أ