نابینا بوو تا بوێنى

شفق نيوز


ئێ چێشتخانه‌ تایبه‌ت وه‌ مێوانه‌یل نابینا نییه‌ ، به‌ڵكم مێواندارى له‌ ئایمه‌یل بینایش كه‌ێگ ، وه‌لێ وه‌مه‌رجێگ ك شاێه‌د كه‌مێگ ئه‌ڵاجه‌ێو بووگ ، مه‌رج خاوه‌ن ڕستوران ڕوشن دڵه‌یل ئه‌وه‌سه‌ ك ناو چێشتخانه‌ تیه‌ریك و چه‌و چه‌و نه‌وێنێگ و میوانه‌یل هه‌ له‌ ده‌م ده‌ر بچنه‌ ناو تیه‌ریكستان و باێه‌د له‌ تیه‌ریكى نانه‌گه‌یان بخوه‌ن ، تا میوانه‌یل ناچار بوون یاى بگرن چوێن له‌ ناو چێشتخانه‌گه‌ گام ئه‌ڵگرن و چوێن خوراكه‌یل بان مێزه‌گه‌ ئه‌ڵوژنن و بوه‌ینه‌ى ئه‌ڕا ده‌میان وه‌بێ ئه‌وه‌گ ته‌نانه‌ت چوكوڵێگیش ده‌م بیه‌ن . ئامانج له‌ێ كاره‌ ئه‌وه‌سه‌ ئایمه‌یل بینا هه‌س وه‌ براى نابیناى خوه‌ێان بكه‌ن و بزانن ئێ چینه‌ له‌ كومه‌ڵگا چ ڕه‌نج و مه‌ینه‌تێگ كیشن.  
وه‌ل ژنه‌فتن ئێ خه‌وه‌ره‌ له‌ ڕادێو "مونتى كارلو" نوڕستیامه‌ هه‌واڵ سه‌ردان به‌عزێ له‌ كاروه‌ده‌سه‌یل عراقی ئه‌را كه‌مپ ئاواره‌یل شار ڕومادى له‌ به‌غدا له‌ یه‌كێگ له‌ تلفزیونه‌یل ، نیه‌زانم ئه‌ڕا وێنه‌ یا ڕه‌سم ئه‌و جوانه‌ له‌ زهنم نه‌خش به‌سا ، وه‌ختێگ ووته‌ جێگر سه‌روك وه‌زیره‌یل : چه‌ بوێشم ، كه‌مێگتر تون و ئوسكورته‌گاند و كامیره‌ى تلفزیونه‌گه‌ چینه‌ ڕێدانه‌و تا م  سه‌رله‌نوو  وه‌ ته‌نیا له‌ێره‌ بمینم ، ته‌نانه‌ت ئه‌گه‌ر به‌غدا درانه‌یلێ له‌ ڕوێم واز بكه‌ێگ و كه‌فیل یا زامن له‌لیم نه‌تواێگ ، ئایا یه‌ توێه‌نێگ ئه‌وه‌گ له‌ زێد خوه‌م له‌ ده‌س دامه‌ ئه‌ڕام بارێگه‌و؟
گشتمان باس كێشه‌ و ڕه‌نج و مه‌ینه‌ت ئاواره‌یل جه‌نگ كه‌یم ، وئێ مه‌سه‌له‌ بوێه‌سه‌ گنێگ كه‌ره‌ ، كاروه‌ده‌سه‌یل قوڕگێان وه‌پێ چه‌ور كه‌ن ، وه‌ختێگ وه‌ل ده‌زگاێه‌یل ڕاگه‌یاندن قسه‌ كه‌ن ، ره‌نج و مه‌ینه‌ت ئاواره‌یل بوێه‌سه‌ دروشمێگ ئه‌ڕا ڕێكخراوه‌یل كومه‌ڵگاى مه‌ده‌نی و بڕگه‌ێگ ئه‌ڕا به‌رنامه‌ و سمیناره‌گانیان ، بێجگه‌ ئه‌وه‌یش ئاواره‌یی مه‌ردم بێ په‌نا بوێه‌سه‌ سه‌رچاوه‌ێ ڕزقێگ ئه‌ڕا ئه‌وانه‌گ ملیونان دینار وه‌ناو ئاواره‌یل ته‌پننه‌ گیرفان.
یه‌ منه‌ێگه‌ داستانه‌گه‌ێ (ئلهام شاهین) له‌ یه‌كێگ له‌ فلمه‌یل ك له‌ ڕیكلام جاجگیگ به‌شدارى كه‌ێگ و له‌ ڕى تیروپشك شوقه‌ یا ئاپارتمان شیكێگ له‌ ناوچه‌ێگ ده‌وڵه‌مه‌ن نشین شار به‌ێگه‌و ، دوێاخر ك ده‌زگایه‌یل ڕاگه‌یاندن و تلفزیونه‌یل وه‌لیا دیمانه‌ ساز كه‌ن ، ئه‌ڕاى ده‌ركه‌فێگ ك ئاپارتمانێگ كویه‌نه‌ وه‌ل گرێبه‌س ئجار (قه‌رارداد ئیجار) له‌ ناوچه‌ێگ هه‌ژار نشین ئه‌ڕاێ ده‌رچیه‌ ! وه‌ل ئه‌وه‌یشا وه‌قسمه‌ت خوه‌ێ ڕاز بووگ ، وه‌لێ ئه‌وه‌گ توێش شوكێ كه‌ێگ ئه‌وه‌سه‌ ك وه‌پێ ئوێشن گرێبه‌سه‌گه‌ ته‌نیا ئه‌ڕا سێ مانگه‌ و باێد له‌ شوون ماوه‌ێ دیارى كریاگ شوقه‌گه‌ چوڵ بكه‌ێگ.
به‌ڵێ ژیان و گوزه‌ران ئاواره‌یل جه‌نگ له‌ عراق جیاوازى وه‌ل داستان ئه‌و فلمه‌ نه‌ێرێ ، گشت ئه‌و به‌ڵینه‌یل دروكینه‌ و ئه‌و هاورده‌ردی و هاوكاری ڕواڵه‌تیه‌ ك ته‌نیا وه‌قسه‌ وه‌لیانا كرێه‌ێ ، هوێچ له‌ ڕه‌نج و مه‌ینه‌ته‌گه‌یان كه‌مه‌و یه‌كه‌ێگ ، وه‌ختێگ ئایمێگ له‌ چه‌و نوێقانێگ مال و كار و دارایی ژیانێ له‌ ده‌س بێه‌یگ قسه‌ چ سوودێگ ئه‌ڕاێ دێرێگ.
ڕاسیه‌گه‌ێ ئه‌وه‌سه‌ ك كیشه‌ و گرفتاری ئاواره‌یل ته‌نیا تایبه‌ت وه‌خوه‌یان نییه‌ ، به‌ڵكم ڕه‌نج و مه‌ینه‌ته‌گه‌یان وه‌ل خوه‌یان ئه‌ڕا ئه‌و پارێزگایه‌یلیشه‌ به‌ن ك كوچ ئه‌ڕایان كه‌ن ، ئمرَوژه‌ ئاواره‌یل عراقی نیاز وه‌ سه‌ردان كاروه‌ده‌سه‌یل یا كومه‌ك خوراكی یا چادر نه‌ێرن ، به‌ڵكم نیاز وه‌ئه‌وه‌ دێرن كاروه‌ده‌سه‌یل ته‌نیا یه‌ك ڕوژ له‌ كه‌مپه‌یل و له‌ ژێر چادر وه‌لیانا بژیه‌ن ، تا وه‌ڕاسى هه‌س وه‌ ڕه‌نج و مه‌ینه‌تیان بكه‌ن و بزانن چه‌ وه‌سه‌ر مه‌ردم ئێ وڵاته‌ هاوردنه‌.


بوشرا هلالى


ج ك