ئینترنێت ؛ یا كوشیده‌مان یا زینگمان ئه‌كا؟

شفق نيوز

نیاز وه‌ ئه‌وه‌ نیه‌ ك بویشیمن هێمان له‌ ناو ئى ئوقیانووسه‌ كه‌ناره‌یل ئارامى و مه‌رزیان له‌ ئاسوو دویره‌ و شمار كوشیایه‌یل ئى هه‌مگه‌ى جه‌نگ ناو ئینترنێته‌ و جه‌نگه‌یل ئاینده‌ى نادیاره‌!
من وه‌ختیگ سه‌ردان دنیاى ئینترنێت ئه‌كه‌م و له‌ ناو سایته‌یل وه‌ زووان نه‌رم و نووڵ یا سه‌خت و زوێر و تیه‌ڵ و شیرین فكر نویسیاگ مه‌ردم ئه‌خوه‌نم! وه‌خته‌ێلێگ ك هزاران وینه‌ له‌ بان باوه‌تێگ دوینم یا ده‌نگه‌یل ئه‌شنه‌فم ك بانگ همێد و ناهمێدى ئه‌ڵارن، رووژه‌یل نه‌دارى خوه‌مان له‌ ئه‌شنه‌فتن و خوه‌نستن و دوینستن كه‌فێده‌ هویرم، ئمجا زانم ك ساڵه‌یل قه‌حتى زانیارى ته‌مام بیه‌!
ئه‌وانه‌ى ئى رووژه‌یله‌ له‌ ناو گه‌وراترین مه‌مڵه‌كه‌ت تاریخ ئنسان (ئینترنێت) بى په‌ساپۆرت و ئازاد گه‌ردن، له‌وه‌ر رووشناى نعمه‌ته‌یل فراوان زانیاریه‌یل ك وه‌ گشت زووانێگ تیه‌ریفه‌وداین یا خراوداین ها له‌تى بڕێگیان دوونه‌ كه‌سه‌یل ئیماندار و بڕێگیش ده‌ور كافر دوینن! بڕێگ نیشتمان په‌روه‌ر و بڕێگیش دشمن ملله‌ته‌یل خوه‌یان! ئمڕوو ئویشن شوڕشه‌یل راسكانى له‌ناو (فیس بوك) و (تویتر) ده‌س وه‌پى ئه‌كا و شوڕشگێڕه‌یل ناو جاده‌یل ئه‌وانه‌ن ك خاس مه‌س و سه‌رخوه‌ش نووڕستن و خوه‌نین و ئه‌شنه‌فتن له‌ ناو دیواخان ئى ته‌كنۆلۆجیایه‌!
هه‌م ئویشن ك گشت دیواره‌یل شه‌رم و حه‌یا رمانیه‌ و رابه‌رى جه‌نگه‌یلیگ ئه‌كا فره‌جار پیرووز و ره‌وا نین، جه‌نگاوه‌ره‌یلى ده‌لێر و جوامیر نین! دیاره‌ ملله‌ته‌یل خوارده‌س له‌ناو ئینترنێت بیناز كه‌فتنه‌ و شاڵاو فه‌رهه‌نگ و زووان بیگانه‌ سه‌روه‌خوه‌یى هویر و فكر ئه‌رایان نه‌هیشتیه‌ و له‌ى ناونیه‌ رووژانه‌ وه‌ ملیون كه‌س له‌ ناو ئى وڵاته‌ شوون گومه‌و بوون و زووان و تاریخ و ناسنامه‌ى خوه‌یان له‌ هویره‌و به‌ن و باوه‌ڕیلیان هه‌راج ئه‌كه‌ن!
هه‌میش ئویشن ك كه‌س ئى تاوانبار تاوانه‌یل خامووشه‌ سزا نادا!! ئیمه‌ نازانیمن ك چه‌ن كه‌س له‌ خێر وه‌ریهاتگه‌یل یا بیسه‌روشوونه‌یل ناو ئینترنێت له‌ رووڵه‌یل ملله‌ت خوه‌مانن!؟ راسه‌ كه‌س چه‌نه‌ دیكتاتور و زوورداره‌یل له‌ى به‌ڵاى تكنۆلۆجیه‌ زه‌ردمه‌ن نه‌بیه‌ و كه‌س چه‌نه‌ مه‌ردمێگ ك هانه‌ شوون ره‌سانن په‌یام خوه‌یان سوود نه‌بردیه‌، وه‌لى ئایا ئیمه‌ رێوره‌وه‌ن دروس وه‌كار هاوردنى ئه‌زانیمن!؟
وه‌ باوه‌ڕم مه‌ردم خوه‌رئاوا تویه‌نستنه‌ ك فیشتر لا خاسه‌گه‌ى ئى ده‌سكه‌فته‌ وه‌ كار بارن و ئیمه‌ شه‌رقیه‌یل ك هیمان باوه‌ڕه‌یل ئى دنیامانه‌ یه‌كلاو نه‌كردیمنه‌ و دینه‌یل ئاسمانیمان وه‌ زه‌وى نه‌هاوردیمنه‌، له‌ ناو ئینترنێت فیشتر دڵمان ها وه‌لاى یاخى بوین و كوده‌تا دژ گشت پیرووزیه‌یل، بى ئه‌وه‌ ك هه‌میشه‌ هه‌وه‌جه‌ وه‌ى جه‌نگ پڕ زیان و فره‌جار ناڕه‌وا داشتویمن!! كورد له‌ وه‌كارهاوردن ئینترنێت نواڕه‌و ملله‌ته‌یل نیه‌ وه‌لى دڵنیام له‌ خراو وه‌كارهاوردنى ها نواى فره‌ له‌ ملله‌ته‌یل و یه‌ ترس گه‌وراى ئمڕوومانه‌ و ئه‌گه‌ر له‌ خراوداین و به‌دناو كردن و چه‌واشه‌كردن راسیه‌یل ك لاى بڕێگ كه‌س بیه‌سه‌ عاده‌ت و ئه‌لان باڵاده‌سه‌ وه‌رده‌وام بویمن، ناتویه‌نیمن له‌ ئاینده‌ رووشنایێگ زینگ داشتویمن ك ماڵ كورد یه‌ك بخا و ناونى ملله‌ت و رووڵه‌یلمان نه‌شیونێ.

 

علی حسين فه‌يلی