سه‌ید ره‌زا چوين گيرياو دريا له‌سێداره‌؟

شفق نيوز

له‌ وه‌هار ساڵ 1937 زایینى له‌وه‌ختيگ ك ده‌سڵات توركی ده‌س ئه‌كاده‌ چه‌ككردن مه‌ردم و له‌ چه‌ن شوونيگ جه‌نگ و مرافه‌ په‌یا ئه‌دێ، هه‌ر له‌ هه‌مان وه‌هار ئه‌و ساڵه‌ كوڕیگ سه‌ید ره‌زا ئه‌چێده‌‌ قه‌رارگاى توركه‌یل ئه‌را ئه‌وه‌ك داوا له‌لیان بكا ده‌س زوڵم و زوور هه‌ڵگرن و ئه‌زیه‌ت مه‌ردم نه‌كه‌ن.

توركه‌یل له‌وه‌خت گله‌وخواردن كوڕه‌گه‌ى سه‌ید ره‌زا كه‌مین ئه‌راى دانه‌ن و كوشنه‌ى، سه‌ید ره‌زايش داواى وه‌ده‌سه‌وداين بكوش كوڕه‌گه‌ى ئه‌كا، وه‌لى بكوشه‌یل له‌لايه‌ن توركه‌یله‌وپاداش ئه‌كريه‌ن و له‌و ناونیيشه‌ چه‌ن جه‌نگیگ رويدا، دی توركه‌یل وه‌ هه‌ڵه‌په‌ڵه‌ هیزیگ له‌ 7 سوپا دامه‌زرنن و وه‌ پشتگیرى هیز ئاسمانى له‌ ئازه‌ربایجان ده‌س كه‌نه‌ په‌لامار .

سه‌ید ره‌زا جاریگتر په‌یوه‌ندى ئه‌كادهه‌ جه‌نراڵ"ئالپ دۆغان"و داوا له‌لى ئه‌كا ئه‌گه‌ر مقه‌یه‌تى له‌ مافه‌يل ملله‌ت كورد بكا و بكوشه‌یل كوڕه‌گه‌ى بدریه‌نه‌ دادگا، ئه‌وه‌ گشت ئه‌و ئه‌فسه‌ره‌یل و سه‌ربازه‌یل وه‌ديلگيرياگه‌و ئه‌و چشته‌یله‌ ك گرته‌سه‌ى ته‌سليمی بكاده‌‌ ده‌وڵه‌ت، ئمجا "عه‌لى شیر" ك خه‌ڵك عمرانیه‌ى كۆچكرى بوى و "شووڕش كۆچكر" سازكرد و زاناو فكرمه‌ن بوى و هه‌وڵ فره‌یگيش دا ئه‌را یه‌كه‌وگرتن كورده‌یل، له‌وه‌ر خاتر گرده‌‌وكردن مه‌ردم له‌ ده‌ور سه‌ید ره‌زا هه‌وڵ فريه‌يگ دا.

عه‌لى شیر له‌ ساڵ 1937 ك بڕیار بوى ئه‌را نواگرتن له‌ جه‌نگ و خوینڕشیان و په‌یوه‌ندیكردن وه‌ل فره‌نسا یا ئنگلیز، سه‌ردان ئیران یا عراق بكا، وه‌رجه‌ ئه‌وه‌ك سه‌ردانه‌گه‌ی، شه‌ویگ له‌ ئه‌شكه‌فت"ئاگدات"وه‌ده‌س برارزایگ سه‌ید ره‌زا كوشیا.

كوشیان عه‌لى شیر زه‌ره‌د فريه‌یگ ره‌سانه‌ شووڕش و توركه‌یليش هه‌رچى دارستانه‌ سزانن و ئاگریش وه‌ردانه‌‌ ده‌م ئه‌و ئه‌شكه‌فته‌یلیشه‌ ك هه‌زاران ژن و مناڵ له‌تیان ژیان، له‌ ئاكاميش خيزانه‌يل فريه‌يگ سزيان و هه‌ركه‌سیگيش له‌لیان ده‌سگير بكرديان ده‌سوه‌جی كوشتیانه‌ى.

سه‌ید ره‌زايش هه‌نای چوارده‌ورى گیریه‌ید له‌ لایه‌ن توركه‌یله‌و هه‌وڵ ئه‌ياد له‌و ته‌وقه‌ خوه‌ی قورتار بكا، وه‌لى وه‌ كاره‌سات گه‌ورا‌یگ ته‌مام ئه‌دێ و هه‌زار كه‌س فه‌وتيه‌ن و ژنه‌گه‌ى و یه‌كیگ له‌ كوڕه‌یليشى و سێ نه‌وه‌یشى گيان له‌ده‌س ئه‌يه‌ن و سه‌ید ره‌زایش ده‌سگير ئه‌كريه‌يد، وه‌لى وه‌ قسه‌ى كورده‌یل والى ئازه‌ربایجان قه‌وڵ وه‌پى داگه‌، ئه‌گه‌ر خوه‌ى به‌یده‌ ده‌سه‌و ئه‌زیه‌تى نه‌دريه‌يد، دى سه‌ید ره‌زا له‌ 5 سپته‌مبه‌ر ساڵ 1937 زایینى گیریاو له‌ 18ى نۆڤه‌مبه‌ر هه‌مان ساڵ دریا له‌ سێداره‌.

به‌شير عه‌زيز

ج . أ