فره‌ هاوخه‌مه‌!!

شفق نيوز

چه‌وه‌یلى جوور ترومپه‌ى ئاویگ ك یه‌چه‌ن ڕووژیگه‌ شكیایه‌ خوڕه‌ى هاتیاد وه‌رجله‌وه‌گ كه‌سیگ هویر له‌ خاسه‌وكردنى بكه‌ید، له‌ ئه‌حواڵى پرسى و ئه‌ویش وته‌ پى:

- وه‌ خودا سه‌عید نیه‌زانم چه‌بویشمه‌پید، چوینكه‌ قوته‌یگ سه‌ختتر له‌ بۆمبه‌ عه‌نقودیه‌گان ئسرائیل له‌بان غه‌زه‌ و لوبنان ده‌ید له‌ قوڕگم.

سه‌عید خه‌مباره‌و بوى و وت:

- سه‌ڵامه‌تیید ئه‌زیزه‌گه‌م.. به‌ڵا دویره‌.

ژنه‌گه‌یش وه‌ده‌م قوته‌ى فره‌یگه‌و جوواوى دا و وت:

- خودا خوه‌شد بكه‌ى گیانه‌گه‌م، ئه‌و ده‌رمانه‌یلیشه‌ خواردم ك له‌ هه‌رچى كه‌ناڵه‌یل ته‌له‌فزیۆنیه‌ دعایه‌ ئه‌رایان كه‌ن و ئویشن وه‌ یه‌ك حه‌ب هه‌رچى ژانه‌ باڵه‌وگرید، یه‌كجار بخوه‌یده‌ى هیلیده‌د جوور ئه‌سپ تاوبیه‌ید...، ئه‌وه‌سه‌ دوینید یه‌ هه‌فته‌یگه‌ شه‌و و ڕووژ  له‌ لیان خوه‌م و هویچ فایده‌یگ نه‌یاشتن، خودا وه‌كیله‌ ئى حه‌به‌یله‌ میننه‌ وتاره‌گان سه‌رۆك وڵاته‌یل عه‌ره‌بى ك وه‌شیوه‌یگ سحرى چاره‌سه‌ر هه‌رچى گیروگرفته‌ كه‌ن،: گه‌ناته‌كارى له‌ناوبه‌یمن، قه‌یران نیشته‌جابوین چاره‌سه‌ركه‌یمن، ماڵئاوا له‌ بیكارى، له‌ ئاخریشه‌و  هه‌ر له‌شوون خوه‌یان خوڵ خوه‌ن.

سه‌عید وه‌گشت دڵسووزییگه‌وه‌ ده‌س هاورده‌ بان شان ژنه‌گه‌ى و وه‌بزگه‌یگه‌و وته‌پى :

- یه‌ڵا گوڵه‌گه‌م په‌نا بوه‌ خودا و خوه‌د بگر، هه‌ر جوور ئه‌و ملله‌ته‌یل عه‌ره‌بیه‌ ك وه‌ل قه‌وڵ و گفته‌یل حاكمه‌یلیانه‌و خوه‌یان گونجنن و ژیه‌ن، تونیش بایه‌ته‌ وه‌ل ئى بیماریه‌و بگونجیه‌ید و بژیه‌ید.

ژنه‌گه‌ جوواو دا :

- خودا وه‌كیلى، له‌لایگه‌و بیمارى و له‌ولایشه‌و مناڵه‌یل و دریژى ڕووژگار ئه‌یاكه‌یان ده‌ید له‌واكه‌یان، ئه‌یه‌ ڕازى بوود ئه‌واكه‌ عاجز بوود، میننه‌ ئه‌نجوومه‌ن وه‌زیره‌یل لوبنان... و منیش مینمه‌ به‌رژه‌وه‌ندى هاووڵاتى به‌سه‌زووان بویمه‌سه‌ ژیر پایانه‌و .

سه‌عید خه‌نست و وت :

- خودا موعیند بوود، ئه‌ى هاوسایه‌یل چوینن؟ ژنه‌یلیان ده‌سمیه‌تد دان تا نه‌؟

ژنه‌گه‌ وه‌ دڵیگ ڕه‌نجیایه‌و وت:

- ده‌سمیه‌ت؟ خودا له‌لید ڕازى بوود، ده‌سمیه‌ت چه‌؟ یانه‌ هاوخه‌مى و دڵسووزییان وه‌ل ئایه‌م بیمار جوور هاوخه‌مى عه‌ره‌به‌یله‌ وه‌ل خه‌ڵك غه‌زه‌، تاتووزیگ خوه‌م ده‌مه‌ زه‌وییا تا كه‌میگ به‌ده‌نم ره‌حه‌ت بوود؛ دریه‌ید له‌ زه‌نگ درانه‌، به‌شكه‌م كه‌میگ شه‌كه‌ر، به‌شكه‌م كێلوویگ برنج، به‌شكه‌م 10 دینار وه‌ قه‌رت، له‌گشتى خوه‌شتر یه‌كیگیان هات گله‌یى ئه‌وه‌ له‌لیم كرد ك ئه‌نفه‌وه‌نزا له‌ قوتى شه‌كه‌ره‌گه‌مان گردیه‌ ك دامه‌سه‌ى پى!!

سه‌عید ڕویى درژه‌و بوى و وت:

- خودا داد ! وه‌ڕاسى یانه‌ مه‌ردم بى حس و شعووریگن، و نیه‌زانن ك بیمار تواید كه‌مى ئسراحه‌ت بكه‌ید تا بتویه‌نید زاڵ بووده‌ بان بیماریه‌گه‌ى؟

وه‌ده‌م ژانیگه‌و ژنه‌گه‌ وت:

- خوه‌د عاجز مه‌كه‌ ئه‌زیزه‌گه‌م، بیلا هه‌ڵسم نان نیمه‌ڕووئه‌را ئاماده‌ بكه‌م.

سه‌عید كوومه‌كى كرد تا هه‌ڵسیده‌ پا و وت:

- نان نیه‌خوه‌م ئه‌زیزه‌گه‌م، چوینكه‌ له‌ ده‌یشت وه‌ده‌م ڕییه‌و تووزى نان خواردمه‌.

ژنه‌گه‌ وه‌ مه‌منوونیه‌و بزگه‌ گرده‌ى وت:

- سه‌عید گیان، دیاره‌ نیه‌تواید شه‌كه‌تم بكه‌ید له‌وه‌ر بیمارییم؟ خودا له‌شد ساغ بكه‌ید

سه‌عید خه‌نست و وته‌ ژنه‌گه‌ى:

- له‌ش ساغى تو دنیا گشتى تیه‌رزى له‌لام، وه‌لى وه‌ڕاسى من نیه‌توام خه‌ریكد بكه‌م ئه‌را ئاماده‌كردن شام ئیواره‌ ئه‌را ئه‌و ڕه‌فیقه‌یلمه‌ ك ئمڕوو وه‌ل ژنه‌یلیانه‌و سه‌رده‌نه‌لیمان، و چوینكه‌ من هاوخه‌م ژان و بیمارییدم له‌ 10 كه‌س زیاتر  مكیس نه‌كردمه‌، یه‌ڵا گیانه‌گه‌م ئازایى بیه‌ خه‌رج و خوراكیه‌یل خوه‌شد نیشانمان بیه‌!!.