هه‌ناى هاووڵاتى باج هه‌ڵه‌ى سياسيه‌يل ئه‌ياد

رائد ئه‌لهاشمى

شه‌فه‌ق نيوز/ بار خراو ئابوورى ك هاته‌سه‌ تويشمان له‌ ئاكام هووكاره‌يل فريه‌يگ ئاشكرا و دياريكريايه‌ له‌گشت لايگه‌و، له‌وانه‌يش داوه‌زين نرخه‌يل نه‌فت جه‌هانى و خراوى ئداره‌ى حكومى ئه‌را گشت دوسيه‌يل و له‌وانه‌يش دوسيه‌ى ئابوورى و بڵاوبوينه‌وه‌ى گه‌ناته‌كارى له‌ گشت دام و ده‌زگايه‌يل ده‌وڵه‌ت.

 

من له‌يرا خوازيارم باس ئه‌و هووكاره‌يله‌ بكه‌م ك ره‌سانه‌مانى ئى حاڵه‌ته‌، وه‌لێ ئه‌خوازم بويشم ك هاووڵاتى عراق يه‌كيگ له‌و هووكاره‌يله‌ نه‌ويه‌، ئمجا له‌ڕوى گفت و دادگه‌ريه‌و ئه‌وه‌سه‌ ك تاوان هه‌ڵه‌يل كه‌سه‌يل تر هه‌ڵنه‌گريد و باج ئه‌و جورمه‌ نه‌يه‌ێد، وه‌لێ ژان ها له‌ورا ك له‌ڕاسى ئى چشته‌ روێ ئه‌ياد و سياسيه‌يل هه‌ڵه‌ ئه‌كه‌ن و دزى ئه‌كه‌ن و هاووڵاتييش رووژانه‌ ناڕه‌حه‌ت بوون و باج ئه‌و هه‌ڵه‌يله‌ ئه‌يه‌ن، دى له‌ كه‌مى گشت خزمه‌تگوزاريه‌يل سه‌ره‌كى بگر تا ره‌سيده‌ تواناى سه‌ندن و نه‌وين ده‌رفه‌ت كار و كه‌مه‌وكردن مووچه‌يل و به‌رزه‌وبوين نرخ كرايه‌ و باجه‌يل تازه‌ى به‌رزه‌وكرياێ له‌ گشت بواره‌يل ژيان له‌يوا له‌ هاووڵاتى ئه‌كا روى له‌ هه‌ركوورا بكا ئه‌و باجه‌ بيه‌ێد جوور ئه‌وه‌گ خه‌زينه‌ى قارون داشتوود، ئايا ئه‌يه‌ دادگه‌رى وه‌پى ئويشن؟

 

ئه‌وه‌گ سه‌رم له‌لى سوڕمينێد ئه‌ويش هه‌ڵويست حكومه‌ته‌ ك وه‌گشت ئازايه‌تى و مه‌كريگه‌و دقه‌ت له‌بان يه‌ك لايه‌ن كرد، ك ئه‌ويش چوينێتى كه‌مكردن ئه‌و كه‌ميه‌ بوى له‌ بودجه‌و چوينێتى ده‌سكه‌فتن داهات تازه‌يگ ئه‌را بودجه‌گه‌ وه‌ل چوينێتى له‌وه‌رگرتن ڕى وشوون و رينمايه‌يليگ ك شايه‌ت جيوه‌جى ئى ئامانجيه‌ وه‌پى بكاو ئه‌را ته‌نيا جاريگيش هوير له‌وه‌ نه‌كرد گشت ئى رى وشوونه‌يله‌ ك وزاره‌ته‌يل و دام وده‌زگايه‌يل حكومييش جيوه‌جيى كرديان ئه‌و داراييه‌ له‌ هاووڵاتى ئاسايى ئه‌كه‌فێده‌ ده‌سى له‌وه‌ختيگ ك بايه‌سه‌ حكومه‌ت وه‌ شيوه‌يگ سه‌ره‌كى هوير له‌ هاووڵاتى بكردياد و هه‌زاران جار هوير له‌ ڕيه‌يل راسيگ بكردياد ئه‌را كه‌مه‌وكردن مه‌ينه‌تى له‌بان هاووڵاتى و له‌وانه‌يش هوير له‌ كه‌مه‌وكردن نرخ به‌رز هه‌وه‌جه‌يل بنه‌ڕه‌تى ئه‌را ژيان هاووڵاتى و له‌وانه‌يش مادده‌ى خوارده‌مه‌نى و ته‌ندروسى و داوه‌زانن نرخ كرايه‌ى هاتوچوو و كرا ماڵ و چشته‌يل تر سوزه‌مه‌نى جوور ئه‌وه‌گ له‌ گشت وڵاته‌يل تر دونيا جيوه‌جى كريه‌ێد، ئه‌ويش وه‌ بوونه‌ى داوه‌زين نرخ نه‌فت، وه‌لێ هاووڵاتى عراقى هيمان گاز و به‌نزين و نه‌فت وه‌ نرخ به‌رزيگ سينن.

 

له‌يرا ئويشمه‌ حكومه‌ت و چين سياسيه‌يل وه‌گشتى هاووڵاتى مه‌كه‌نه‌ كه‌لپه‌لدانيگ ئه‌را ئه‌وه‌گ هه‌ڵه‌يلدان وه‌پيا هه‌ڵواسين، بايه‌سه‌ له ‌باندان رى وشوونه‌يل گورج بگرينه‌ وه‌ر و چاره‌سه‌ره‌يل سه‌ركه‌فتگيگ په‌يا بكه‌ين له‌وه‌ر كه‌مه‌وكردن فشار له‌بان هاووڵاتيه‌يل له‌ گه‌شت مه‌ينه‌تيه‌يل رووژانه‌يان له‌وه‌ر ده‌سكه‌فتن تيكه‌ى نان ئه‌را بژيوى ژيان و بايه‌سه‌ ئى راسيه‌ بزانين ك شايه‌ت هوير له‌لى نه‌كردينه‌، ك ئه‌ويش ئه‌وه‌سه‌ قه‌يران مه‌ترسيداريگ روى له‌ى وڵاته‌ كردگه‌و نه‌بايه‌د وه‌ ئاسانى قورتار له‌لى بويمن مه‌گه‌ر وه‌ زه‌مانه‌ت هاوكارى هاووڵاتى وه‌ل حكومه‌ت و ئه‌گه‌ريش ئيوه‌ ئه‌خوازين ئه‌و هاوكاريه‌ زه‌مانه‌ت بوود بايه‌سه‌ نيه‌تدان وه‌ليانا پاك بدێ و كار ئه‌را بنيتنانه‌وه‌ى پيه‌ڵه‌يل متمانه‌ بكه‌ين ك ويران بويه‌و وه‌ ته‌مامى گوم بويه‌ له‌ ئاكام ئه‌و زوڵمه‌يل فريه‌ ك رووژانه‌ ئه‌ياده‌ تويش هاووڵاتى له‌بان ده‌س ئيوه‌و له‌ ئاكام ئه‌و گه‌ناته‌كاريه‌ ك بووى دونيا گرته‌سه‌وه‌و له‌ ئاكام ئه‌و خوه‌شگوزه‌ريه‌ ك ئيوه‌ له‌تى ژيه‌ن وه‌بان دارايى ملله‌ت.

رائد ئه‌لهاشمى