به‌خته‌وه‌رى خێزان ها ده‌س ژنه‌

شفق نيوز

 

 

له‌ رووژگار ئمڕوو كوومه‌ڵگامان فره‌یگ له‌ ریكخریاگ و ده‌زگایه‌یل ره‌سانن بانگه‌واز  هه‌ق ژنه‌یل كردنه‌سه‌ باس و خواست، چوینكه‌ شایه‌ت زویتر ئه‌و باسه‌یله‌ وجوود نه‌یاشتگه‌ وه‌ى شیوه‌ى ئیسه‌و یه‌یش چشت تازه‌یگه‌ له‌ كوومه‌ڵگا، وه‌لى جى داخه‌ ئیسه‌ كیشه‌یل خیزان فیشتره‌و بویه‌و به‌شیگ له‌ تاكه‌یل كوومه‌ڵگا نیه‌زانن ئه‌و ئازادیه‌ ك باس كریه‌ید وه‌ چ شیوه‌یگ بارنه‌ى كار!!

 

بیگومان یه‌یش كێشه‌ى خێزانى له‌لى كه‌فێده‌و تا ره‌سێده‌ راده‌ى جیابوینه‌وه‌ یا ته‌ڵاقتداین، ئمجا له‌یره‌ چه‌ن خاڵیگ خه‌یمنه‌ ڕوى ئه‌را ژنه‌یل وه‌و ئومیده‌ ك بتویه‌نیم له‌ كێشه‌یل كه‌مه‌و بكه‌یم و به‌خته‌وه‌رى بایده‌و ئه‌را خێزانه‌یل، چوینكه‌ ژنه‌یل ستوین به‌خته‌وه‌رى خێزانن.

1- گرنگى بیه‌ هاوسه‌ره‌گه‌د و گووش له‌ قسه‌یلى بگر و جوور سه‌روه‌ر خوه‌د بزانه‌ى، چوینكه‌ وه‌ى ره‌فتاره‌ مهره‌بانى و خوه‌شه‌ویسى هاوسه‌ره‌گه‌د تیه‌ریده‌ ده‌س.

2- وه‌جوانى گووش له‌ قسه‌یلى بگر و فه‌رمانه‌یلى بژنه‌ف، چوینكه‌ وه‌ى كاریشه‌ بویده‌ مایه‌ى گرنگیداین هاوسه‌ره‌گه‌د و ئه‌ویش له‌ كاره‌یلى پرس وه‌پید ئه‌كا.

3- نه‌یل چه‌وه‌یلى ره‌فتار خراو له‌لید بوینن، ئه‌و كاره‌ مه‌كه‌ ك ئه‌و ناخوه‌شه‌ وه‌پى، چوینكه‌ ئه‌گه‌ر ئیچنه‌ نه‌ود متمانه‌ى خوه‌د له‌ده‌س ده‌ید له‌لاى ئه‌و.

4- هویچ وه‌ختێگ نه‌یلید هس وه‌ تویڕه‌یى و ناڕه‌حه‌تى بكا له‌ ده‌سد و هه‌میشه‌ ئاگادار هسكردنى به‌.

5- گرنگى بیه‌ پاك و ته‌میسى شه‌وخه‌ف و شوون خه‌فتن و جنگه‌یلى، چوینكه‌ گووش نه‌داین وه‌ى چشته‌یله‌ بووده‌ مایه‌ى ناڕه‌حه‌تى ده‌روینى.

 

7- مقه‌یه‌ت ماڵه‌گه‌د به‌و مناڵه‌یلد وه‌شیوه‌ى خاسیگ ئمایه‌ت بكه‌و داڵگ خاسیگ به‌ ئه‌ر مناڵه‌یلدو ژنیگ دڵسووز به‌ ئه‌را هاوسه‌ره‌گه‌د و حورمه‌ت كه‌س وكارى بگر ئه‌را ئه‌وه‌ك ئه‌ویش حورمه‌ت له‌ كه‌س وكارد بگرید، چوینكه‌ بووده‌ مایه‌ى ئه‌وه‌ك شانازى وه‌پیده‌و بكا.

8- ئازا به‌ له‌ وه‌ڕێه‌وبردن ماڵ و قه‌ناعه‌ت بكه‌ وه‌و بڕه‌ خه‌رجیه‌ ك هاوسه‌ره‌گه‌د په‌یاى ئه‌كا و ئاگادار به‌ له‌خه‌رجكردنى و هویچ وه‌ختیگ داواى چشتیگ له‌ هاوسه‌ره‌گه‌د مه‌كه‌ تواناى نه‌یاشتوود، چوینكه‌ پیاگ وه‌ى چشته‌ تویش ناڕه‌حه‌تى ده‌روینى تیه‌ید.

9- هویچ وه‌ختیگ سه‌رپیچى فه‌رمانه‌یلى مه‌كه‌و مقه‌یه‌ت رازه‌یلى به‌، چوینكه‌ ئه‌گه‌ر ئیچنه‌ نه‌وید ئه‌وه‌ بویده‌ مایه‌ى تویڕه‌كردنى و كیشه‌ دروس كه‌ید، هه‌ر له‌وه‌ر ئه‌وه‌یش بایه‌سه‌ كه‌م وكوڕیه‌یلى بپووشید، له‌وه‌ر ئه‌وه‌ك هه‌ر عه‌یبیگ داشتوود نیمه‌ى كه‌فیده‌ به‌شد، چوینكه‌ ئیوه‌ هاوسه‌ر ژیان و ته‌واوكه‌ر یه‌كتریین.

10- دڵخوه‌ش و كه‌یفخوه‌ش مه‌و له‌وه‌ختیگ هاوسه‌ره‌گه‌د كیشه‌یگ دیرید، وه‌ل ئه‌وه‌یشا له‌هه‌مان وه‌خت زوور له‌لى مه‌كه‌ هووكار بیتاقه‌تى خوه‌ى ئه‌ڕاد بویشید، چوینكه‌ هه‌ر وه‌ختیگ تر ئه‌ڕاد باسى ئه‌كا، وه‌لى له‌و وه‌خته‌ ك زوور له‌لى بكه‌ید شایه‌ت كیشه‌یگ وه‌لدا دروس بكاو تویش گیچه‌ڵ باید.

 

هۆشدار ئسماعیل

ج . أ