ئێڵه‌يل كورد له‌وڵات فارس

شفق نيوز

 

ئمجا فه‌سا، قه‌ڵاى چه‌رمگ فريه‌ سه‌ختیگ داشت، ك له‌شكر ئسلام 300 ساڵ دویاى ئه‌وه‌ داگیرى كردن و له‌وه‌ر چه‌رمگى قه‌ڵاگه‌ ناوى نان بیچا‌و. كابرایگيش ك ناوى تیرى بوى پاسه‌وان قه‌ڵاگه‌ بوى. پاپه‌ك كوڕ ساسان كوڕیگ ئه‌راى بوى ناوى نا ئه‌رده‌شیر، هیمان ئى كوڕه‌ باڵغ نه‌وید ك پاپه‌ك باوگى داوا له‌گوزه‌هر كرد بكاده‌‌ى قه‌ڵاوان و هووكاره‌ى تيروه‌شاننى بكا، ئه‌وه‌ بوى ك ئه‌رده‌شیر دویاى چه‌ن ساڵیگ ده‌سڵات په‌یاكرد و بویه‌ دژ گوزه‌هرو وڵاته‌گه‌ له‌لى داگیر كرد و ناو خوه‌ى نا پاشاو تاج پاشایه‌تى ناسه‌ر.

ئه‌رده‌وان په‌نجم ، ك دويا شاى تیره‌ى ئه‌شكانى بوى نامه‌یگ ئه‌را ئه‌رده‌شیر نویساو له‌تى وت "كابرا ت پاد له‌ئاست خوه‌د فيشتر دریژه‌و كردیده‌و ت وه‌ده‌س خوه‌د قه‌ور ئه‌را خوه‌د هه‌ڵكه‌نید ئه‌ى كورد ئمایه‌تكریاگ ناو سیه‌ماڵ كورده‌یل! كى وته‌پید تاج بنه‌یده‌ سه‌رو ده‌س بكه‌یده‌ داگیركردن وڵاته‌یل ؟".

وه‌ى قسه‌یله‌ ئه‌رامان ده‌ركه‌فید ك له‌سه‌ره‌تاى زایین ئێڵه‌یل كورد له‌ وڵات فارس فره‌ بوینه‌و ده‌سڵات داشتنه‌و فه‌رمانڕه‌وایى دامه‌زراننه‌ ، وه‌لى ئه‌رامان ئاشكرا نیه‌ ئایا هه‌خامه‌نشینه‌یل ئى كورده‌یله‌ وه‌ زوور له‌وڵات ماده‌و هاوردنه‌سه‌ ئى هه‌ریمه‌یله‌ ، یا به‌دبه‌ختى و كوشتن وبڕین بویه‌سه‌ هووكار ئه‌وه‌ك كووچه‌ره‌یل كورد جیواز بوون ئه‌را ئى هه‌ریم فارسه‌، یا جه‌نگ و مرافه‌ى ناونى داریووش هه‌خامه‌نشین و ئه‌سكه‌نده‌ر بویه‌سه‌ هووكار ئه‌وه‌ك كورده‌یل هه‌ریم موسڵ و هه‌ولێر جیواز بكه‌ن ئه‌را ئه‌وه‌ك مقه‌یه‌تیكردن پایته‌خته‌گه‌یان وه‌ ئه‌وان بسپارن. ئمجا ئه‌و ئێڵه‌يليشه‌ ئه‌یانه‌ بوین:

1- ئێڵ حسێن كوڕ گیله‌وه‌یه ، ك ناوى بازه‌نگانى بویه‌ : ئى ئێڵه‌ 14 فه‌رسه‌خ له‌ شیرازه‌و دویر بويه‌.

2- ئێڵ ئه‌ردام كوڕ جوانا : 36 فه‌رسه‌خ له‌ شیرازه‌و‌ دویره‌.

3- ئێڵ قاسم شه‌هریار، ك وه‌پیان ئویشن "گۆریان" و شایه‌ت گۆران بوود.

4- ئێڵ حسێن كوڕ ساڵح سواران: ك دویر نیه‌ سۆران بوود.

ئمجا ئبن به‌لخى له‌ كتاو"فارس نامه‌"نویساگه‌: له‌ رووژگار كویه‌ن كورده‌یل وڵات فارس په‌نج ره‌مه‌ یا ئێڵ بوینه و هه‌ر ره‌مه‌یگیان 100 هه‌زار حه‌ومه‌ بویه‌ (دیاره‌ مه‌رام له‌" حه‌ومه‌ " خیزان بويه‌وئه‌و په‌نج ئێڵیشه‌ ئه‌یانه‌ بوینه‌: ئێڵ گیله‌وه‌یه، ئێڵ دێوان، ئێڵ لۆلۆه‌یل، ئێڵ كاریان، ئێڵ بازه‌نگان .

دياره‌ ئه‌و ره‌نگ و گه‌ورایى و هیز له‌شكر فارسيشه‌ ئى كورده‌یله‌ بوینه‌ ك شماره‌یان یه‌كجارى فريه‌ بویه‌، وه‌لى له‌سه‌ره‌تاى ئسلام وه‌جاریگ قڕان كریان و بڵاوه‌و بوینه‌ جه‌هان كه‌س له‌لیان قورتارنه‌وى بیجگه‌‌ كابرایگ ك ناوى "عه‌لك" بوى ‌و سه‌ر ئه‌را ئسلام چه‌مان و ئايین موسڵمان په‌سه‌ن كرد‌و تا ئیسه‌یش نه‌ته‌وه‌ى هه‌ر مه‌ندنه‌، وه‌لى كورده‌یلیگ ك ئیسه‌ نیشته‌جى ناوچه‌ى فارسن وهه‌ر له‌ورا ژیه‌ن، ئه‌وانه‌ كورده‌یلیگن ك عه‌زودولده‌وله‌ى ئال بووه‌یه "بووه‌یهى"له‌ ده‌ورگرد ئسفه‌هانه‌و هاورده‌سه‌یانه‌ شیراز و مه‌ردم‌یان په‌ره‌ سه‌ندگه‌.

مه‌حموود ئه‌مين

ج . أ