په‌روین موشیر وه‌زیری

شفق نيوز

ئازیه‌تی له‌ وه‌ركرد.

خانمێ "په‌روین موشیر وه‌زیری" پیشكه‌شكارێ وه‌ ناوبانگێ ده‌یه‌یلێ 70 ی به‌رنامه‌یلێ رادیۆ كرماشان له‌ سنێ 69 ساڵی له‌ وڵاتێ بریتانیا كووچێ دویایی كرد.

په‌روین موشیر وه‌زیری له‌ساڵى 1941 له‌شارێ سنه‌ له‌داڵگ بووی و هه‌ر له‌و شاره‌ خوه‌ندن ده‌سوه‌پیكرد و ده‌وره‌ی ناوه‌ندی و دویاناوه‌ندیش(ده‌بیرستان) له‌وره‌ دومایی وه‌پیهاورد.

(موشیر وه‌زیرى) ك له‌ بنه‌ماڵه‌یلێ ناودارێ ناوچه‌ی ئه‌رده‌ڵانن هه‌ر له‌ سه‌رده‌مێ جه‌وانی و دومای ته‌مام كردنێ ده‌بیرستان ئڕا یه‌كه‌مجار، له‌ساڵێ 1958 له‌به‌شێ كوردى ڕادیۆ ته‌یران ـ چوی موته‌رجم و پیشكه‌شكارێ پرۆگرامه‌یلێ ئه‌ده‌بی و هونه‌ریی ده‌سوه‌كار بووی.

خانمێ په‌روین موشیر وه‌زیری وه‌ بووتێ لیهاتگی و كارامه‌یی تویه‌نست له‌ماوه‌یگ كه‌م چوی پیشكه‌شكاریگ سه‌ركه‌فتی ناوده‌ربكه‌یدن و بناسریه‌یدن.

خوه‌ندنه‌وه‌ی شێعرێ شاعره‌یلێ كورد له‌به‌رنامه‌ی وه‌ناوبانگێ (به‌زمى هه‌ینى) كه‌ (شێخ ئه‌سعه‌د سراجه‌دینى) هاوسه‌ری ئاماده‌ی كردیادن و له‌ ڕادیۆ كرماشان په‌خش بوویاد یه‌كیگ له‌و به‌رنامه‌یله‌ بووی ك خانمێ موشیر وه‌زیری وه‌ مه‌ردم ناسان و بوویه‌ مدووی ناوده‌ركردنی و له‌ ناو گشت كوردستان لاگره‌یلێ ده‌نگی رووژ وه‌ رووژ له‌ زیادبووین بووی. وه‌رده‌وامی خانمێ موشیر وه‌زیری له‌ كاره‌یلێ ڕادیۆیی وه‌تایوه‌ت له‌ به‌شێ ئه‌ده‌بی له‌وانه‌ خوه‌ندنه‌وه‌ی په‌خشانه‌یل و نویسراوه‌یلێ شاعرێ نووخوازێ كورد"سواره‌ی ئیڵخانی زاده‌" له‌ده‌یه‌یلێ هه‌فتای زایینی ئه‌و قه‌ره‌ی تره‌ك ده‌نگی ناسانه‌ بژنه‌فه‌یلێ به‌رنامه‌یلێ ڕادیۆی كوردی كرماشان و تا ساڵى 1980 له‌و كاره‌ وه‌رده‌وام بووی. بیجگه‌ خوه‌ندنه‌وه‌ی بابه‌ته‌یلێ ئه‌ده‌بی له‌ به‌رنامه‌یلێ تره‌كێ ڕادیۆیی وه‌ تایوه‌ت به‌رنامه‌ی "چیرۆكی شه‌و" یش كاركردیادن.

دویایی له‌ خوه‌رهه‌ڵاتێ كوردستانه‌و رووی له‌ ده‌ره‌وه‌ی وڵات كرد و له‌ شارێ له‌نده‌ن له‌ وڵاتێ بریتانیا نیشته‌جیبووی. وه‌گه‌ردێ غه‌ریبی و دویره‌ وڵاتی له‌وره‌یش سه‌رله‌نوو كاره‌یلێ هونه‌ری خوه‌ی ده‌سوه‌پیكرد و له‌ ساڵێ 1991ه‌و، له‌ به‌شێ كوردی ڕادیۆى (سپێكترۆم)ێ له‌نده‌ن دامه‌زریا و به‌رنامه‌ پیشكه‌شكرد.

مانگێ چوارێ 2010 سه‌ردانێ كوردستان كرد و وه‌داخه‌و بوویه‌ دوما سه‌ردانی ئڕا خاكیگ ك دووسی داشت و ساڵیانێ ساڵ وه‌ سووزێ ده‌نگێ وه‌ سووزێ خوه‌ی لاوانیادنه‌وه‌ی.

خانمێ موشیر وه‌زیری له‌ زوورمێ كاره‌یلێ هونه‌ری و ئه‌ده‌بی خوه‌ی له‌ (شێخ ئه‌سعه‌د سراجه‌دینى) هاوسه‌ریی ده‌سمیه‌ت گردیادن و ده‌سمه‌یه‌تده‌ر و پشتیوانیگیش بووی ئڕا هاوسه‌ره‌گه‌ی له‌ گشت بواره‌یلێ ژیان وه‌ تایوه‌ت له‌ كاره‌یلێ هونه‌ری و ئه‌ده‌بی.

له‌18ى دیسامبرى 2010 وه‌ بووتێ نه‌خوه‌شی دڵ له‌ خاكێ غه‌ریبی له‌ وڵاتێ بریتانیا كووچێ دویایی كرد و ئڕا هه‌میشه‌ فه‌رهه‌نگ و ئه‌ده‌بێ كوردی و لاگره‌یلێ ده‌نگێ ماڵئاوایی كرد.

نموونه‌ی زیاد و روحیی وه‌ به‌هه‌یشت به‌رین شاد بوودن