كيشه‌يل ده‌نگده‌ر عراقی

شفق نيوز

كاريگه‌ری نا و شوونه‌واره‌يل خراويگ له‌ گشت ئاسته‌يل وه‌جی هيشت و هاووڵاتی عراقی ئه‌را سه‌رله‌نوو خاسه‌وكردن ئه‌و خراويه‌يله‌ هاندريا ئه‌را به‌شداری كردن له‌ هه‌ڵوژاردن عراق وه‌شيوه‌ی گشتی و وه‌تايبه‌ت هه‌ڵوژاردن په‌رله‌مان ك له‌ مانگ ئايه‌نده‌ جيوه‌جی كريه‌يگ . له‌چوارچيوه‌ی ئه‌ی ديارده‌ی خه‌مناكه‌ بايه‌د ته‌قالا بكريه‌يگ ئه‌را ئاگادار كردن هاووڵاتی عراقی له‌ نه‌تيجه‌يل ئه‌ی ديارده‌ی مه‌ترسيداره‌ و له‌لی بتوايم ك جوور يه‌كيگ له‌ گرنگترين پێكهاته‌يل وڵات له‌ هه‌ڵوژاردنه‌يل به‌شداری بكا و بزانيگ ئايا ده‌نگه‌گه‌ی ده‌سمه‌يه‌ت ده‌يگ ئه‌را ده‌ركردن عراق له‌ی سه‌ختيه‌يله‌ ك تويشی هاتگه‌و چاره‌سه‌ركردن گشت كيشه‌يل سياسی و نه‌ته‌وه‌يی و حزبی يا نه‌ ...؟

ديارده‌ی دويری گرتن له‌ هه‌ڵوژاردنه‌يل و به‌شداری نه‌كردن له‌تی ته‌نيا بووده‌ بايس زياتره‌وبوين حاڵه‌ته‌يل گه‌ناته‌كاری و موحاسسه‌ و به‌رژه‌وه‌نديه‌يل نيشتمانی له‌وه‌رچه‌و نيه‌گريه‌گ و ته‌نيا گرنگی دريه‌يگه‌ به‌رژوه‌نديه‌يل لايه‌ن تايبه‌تيگ .. وه‌ی خاتره‌ سه‌ختيه‌يل عراق كوتايی وه‌پی نيه‌تيه‌يگ مه‌گه‌ر له‌ڕيگه‌ی ته‌قالای هاووڵاتی و وسيان له‌وه‌راوه‌ر لايه‌نه‌يل سياسيگ ته‌قلا كه‌ن هاووڵاتی جوور ئامێريگ وه‌كار بوه‌ن ئه‌را مه‌نين له‌ ده‌سه‌ڵات .

عراق بايه‌د بزانيگ ك ته‌نيا وه‌گووره‌ی دوو ته‌وه‌ر تويه‌نيگ له‌ قه‌يرانه‌يل خوه‌ی نجات په‌يا بكا، يه‌كيگ به‌شداری بته‌و له‌ هه‌ڵوژاردنه‌يله‌و ئه‌واكه‌ی تريش هه‌ڵوژاردن گونجياگه‌ ...

ته‌وه‌ر يه‌كم جوور ته‌وه‌ريگه‌ ئه‌را لاوردن به‌نده‌يل زاڵمانه‌يگ له‌ ياسای هه‌ڵوژاردنه‌يل ك ته‌نيا له‌ڕيگه‌ی به‌شداری بته‌و زامن كريه‌يگ .

له‌لايگتره‌و هاووڵاتی عراقی بايه‌د وه‌رجله‌ گشت چشت خاس هوير بكا ك وه‌چ كه‌سيگ ده‌نگ ده‌يگ و له‌ گشت به‌رژوه‌نديه‌يل و خراوه‌يل ئه‌و كانديده‌‌ و ئه‌و پارت يا لايه‌ن يا كوتله‌ی سياسيه‌ ك كانديده‌گه‌ ئه‌نداميه‌ ئاگاداری بياشتوود تا بتويه‌نيگ نوێنه‌ر ده‌سپاك و نيشتمانپه‌روه‌ر و وه‌توانايگ ئه‌را خوه‌ی له‌ په‌رله‌مان دياری بكا .