یه‌كه‌مجار دادگایى خوه‌د بكه‌ ئیجا مه‌ردمان تر!!

شفق نيوز

دادگاییكردن خوه‌مان؟ یا وه‌لاى كه‌مه‌وه‌ چه‌ن جار پرسیار له‌خوه‌مان كه‌یم؟ ئایا چه‌ن جار دانیشیم ئه‌را دادگاییكردن مه‌ردمانتر و ره‌خنه‌گرتن له‌لیان و باسكردنیان له‌دانیشتن و دیداره‌یلمان؟ دڵنیایم ك جواو ئى پرسیاره‌یله‌ جیاوازى فره‌یگ دیرن. بیگومان ئیمه‌ ئاده‌میزادیم و له‌هه‌مان وه‌خت ئاده‌میزادیش هه‌ر غه‌ڵه‌ت ئه‌كا، وه‌لى ئى قانوونه‌ ئه‌را گشت ئاده‌میزادیگه‌ له‌گه‌ورا تا بویچگ، له‌ یه‌كه‌م كه‌سه‌وه‌ تا ئاخرین كه‌س ك تیه‌یگه‌ دونیا، جیاوازى ئه‌را هویچ كه‌سیگ نه‌یرى، ته‌نانه‌ت په‌یامبه‌ره‌یلیش(سڵام خودا له‌لیان)، وه‌لى ئه‌وان له‌وه‌ر ئه‌وه‌ك كه‌سه‌یلیگ گه‌ورا بوینه‌و په‌یام خوداى گه‌ورا ڕه‌ساننه‌ ئه‌را ئنسانیه‌ت، هه‌ر له‌وه‌ر ئه‌وه‌یش خوداى گه‌ورا راسه‌وخۆ له‌لیان خوه‌ش بویه‌و بوینه‌سه‌ ئه‌هل به‌هه‌یشت وه‌ك پاداش یا خه‌ڵاتیگ ئه‌را ئه‌و كاره‌یل گه‌ورا ك له‌ژیانیان ئه‌نجامیدانه‌، وه‌لى ئه‌ى ئیمه‌ى چه‌؟ ئیمه‌یش هایمنه‌ ته‌ما غه‌ڵه‌ت نه‌كه‌یم و ئه‌گه‌ریش غه‌ڵه‌ت كردیم وه‌ك ئه‌وان خوداى گه‌ورا ئاگادارمان بكا ڕاسه‌وخۆ؟

ئیمه‌ى ئاده‌میزاد هه‌ر غه‌ڵه‌ت كه‌یم و خوداى گه‌ورایش ڕه‌حمى فره‌س، وه‌لى ئیمه‌ تا چه‌نیگ هس كردیمه‌ وه‌و چشته‌؟ بنوڕنه‌ چوارده‌ور خوه‌دان ك مه‌ردمان فره‌یگ هه‌ر خه‌ریك لومه‌كردن كه‌سه‌یل ترن و خوه‌یان له‌هویره‌و بردنه‌، ك خوه‌یشى له‌ بنه‌ڕه‌ته‌وه‌ چه‌واشه‌سه‌و ئه‌وه‌ك بایه‌سه‌ وه‌مه‌ردم بویشیگه‌ى بایه‌سه‌ وه‌ خوه‌ى بویشیگه‌ى و بیجگه‌ ئه‌وه‌یش له‌یوا بژیه‌یگ ئه‌گه‌ر مه‌ردمانیگ غه‌ڵه‌تیگ كردن بتویه‌نیگ ئه‌ڕایان راسیه‌و بكاو ئاگاداریان بكا له‌و غه‌ڵه‌ته‌ ك كردنه‌سه‌ى، ئه‌گه‌ریش هه‌ر گووش وه‌پى نه‌دریا ئه‌وسا گام تر بنه‌یگ وه‌ك ئاگاركردنه‌وه‌ى كه‌سه‌یل تر تاده‌سیان بگرن و له‌و غه‌ڵه‌ت و تاوانه‌ بارنه‌یانه‌ ده‌یشت. ئاده‌میزاد بایه‌سه‌ وه‌ل خوه‌یا دڵسووزانه‌ بژیه‌یگ ، له‌ شه‌رع ئسلامیش ئویشیگ : یه‌كه‌مجار لومه‌ى خوه‌دان بكه‌ن و هه‌میشه‌ ئاگادار خوه‌دان بوون و ئه‌گه‌ر كه‌فتینه‌ غه‌ڵه‌تیگه‌وه‌ زوى په‌شیمانه‌و بوون، دویاى ئه‌وه‌یش ئیمه‌ بایه‌سه‌ هه‌وڵ بیه‌یم غه‌ڵه‌ت كه‌سه‌یل تریش راسه‌و بكه‌یم.

ئیمه‌ هه‌وه‌جه‌ وه‌ئه‌وه‌ دیریم له‌وه‌خت ئه‌نجامداین هه‌ر كاریگ  یا هه‌ر وه‌ختیگ  چیمنه‌ ده‌یشت ئه‌را بازاڕ یا زانكۆ یا شوونیگ تر، له‌و وه‌خته‌ هویرمان له‌خوه‌مان بووگ ووه‌هویچ شیوه‌یگ نه‌كه‌فیمنه‌ ناو تاوان، خوداى گه‌ورا یه‌ك زووان و دو گووش به‌خشاسه‌ پیمان، یه‌یش ماناى ئه‌وه‌سه‌ ك چه‌نیگ ئویشیم و قسه‌ كه‌یم دو ئه‌وه‌نه‌یش بایه‌سه‌ بژنه‌فیم.

ئیمه‌ى ئاده‌میزاد بایه‌سه‌ وه‌رده‌وام خه‌ریك باسكردن مه‌ردمان تر نه‌ویمن و خوه‌مان دویره‌و بخه‌یم له‌وانه‌ك قسه‌ وه‌مه‌ردم كه‌ن، وه‌ل ئه‌وه‌یشا بایه‌سه‌ ئیمه‌ ره‌فتار و هه‌ڵسووكه‌فتمان له‌ى لایه‌نه‌وه‌ په‌سه‌ن بووگ و بتویه‌نیم متمانه‌ى خاسیگ وه‌ده‌س باریم له‌لاى كه‌سه‌یل تر.

بیگومان ئه‌و قسه‌و كرده‌وه‌یله‌ ك ئویشیمنه‌ى وه‌ كه‌سیگ تر، بایه‌سه‌ یه‌كه‌مجار خوه‌مان ئه‌نجامى به‌یم، با یه‌كه‌مجار فایله‌یل خوه‌مان یه‌منه‌ یه‌كاو بخه‌یمنه‌ى نوا له‌وه‌خت دادگاییكردن وه‌رجه‌ مه‌ردمانتر.