وه‌بى ئئتلاف كوردستانى حكوومه‌ت دانیه‌مه‌رزیه‌ى

شفق نيوز

نیشتمانى ئه‌و نه‌خش و ده‌ور گرنگه‌ ئاشكراكرد ك كورد له‌ى باوه‌ته‌ بازیى كه‌ید و و هاتنه‌وه‌ى ئه‌را مه‌یدانه‌گه‌ جوور بازیكه‌ر سه‌ره‌كى و گه‌ورایگ له‌ دامه‌زرانن حكوومه‌ت چه‌وه‌ڕیكریاى عیراق، و دى هویچ لایه‌نیگ له‌ لیست و هاوپه‌یمانیه‌یل عیراقى نیه‌تویه‌نى وه‌بى پشتگیرى و لایه‌نگرى كورد بچوود ئه‌را په‌رله‌مان تا ڕیككه‌فتننامه‌ى پیشوه‌خته‌ وه‌لیا ئمزا نه‌كه‌ید.

نوێنه‌ر هه‌ڤاڵبه‌ندى یا ئئتلاف فراكسیۆنه‌یل كوردستانى موحسن سه‌عدوون له‌ په‌یوه‌ندییگى وه‌ل ماڵپه‌ڕ شه‌فه‌ق وه‌ى جووره‌ گوزارش له‌ ئه‌راى چوین خوه‌ى كرد ك گریه‌كووره‌ى كاندیدا یا مرشح ئه‌را دامه‌زرانن حكوومه‌ت وه‌ كاندید كردن مالكى له‌ لایه‌ن هاوپه‌یمانى نیشتمانى چاره‌سه‌ر كریا و وت :" ئیسه‌ له‌ شوون چاره‌سه‌ر كردن ئى كێشه‌، ئیمه‌ دى ده‌س كه‌یمنه‌ گفتوگوو ورد و فراوانیگ، و تاكه‌ په‌یمانه‌ یا معیارمانیش ئه‌و كارنامه‌مانه‌سه‌ ك جوور نه‌خشه‌ى ڕیگه‌ له‌ گفتوگووه‌گانمان داینایمن و ئى كارنامه‌یشه‌ داواكاریه‌یل جه‌ماوه‌ره‌گه‌مانه‌ و وه‌ى زوى ده‌سكه‌یمنه‌ گفتوگوو وه‌ل هاوپه‌یمانى نیشتمانى و ئومیدواریمن بڕه‌سیمنه‌ ئاكامه‌یل خاسیگ له‌ خاتر دامه‌زرانن حكوومه‌ت هاوبه‌شى نیشتمانى، وه‌لى ئیمه‌ هه‌ڵوێست خوه‌مان ئاشكرا نه‌كردیمن ك وه‌ل كام فراكسیۆنه‌و هاوپه‌یمانیه‌تى كه‌یمن".

له‌ باوه‌ت گرنگى ئه‌و نه‌خش و ده‌وره‌ ك لیست كوردستانى بازیى كه‌ید له‌ دامه‌زرانن حكوومه‌ت ئاینده‌ موحسن سه‌عدوون ئه‌وه‌ ئاشكرا كرد ك :" په‌یوه‌ندیه‌یل خاس و گرنگیگ وه‌ل زوورمى فراكسیۆنه‌یل سیاسیه‌و دیریمن هه‌ر له‌و سه‌رده‌مه‌ ك ئۆپوزیسۆن بویمن دژ وه‌ دیكتاتۆریه‌ت، جوور پارت ده‌عوه‌ و ئه‌نجوومه‌ن باڵا و دكتۆر ئه‌حمه‌د چه‌له‌بى و هه‌رله‌یوا ئه‌و لایه‌نه‌گانتر جوور دكتۆر ئبراهیم جه‌عفه‌رى و پارت فه‌زیله‌، وه‌لى گفتوگوو و دیالۆگه‌یلمان بایه‌سه‌ له‌ ژیر چه‌تر ده‌ستوور بوود، و له‌وه‌یشه‌ زیاتر نیه‌توایمن ك له‌ كارنامه‌گه‌مان هاتیه‌؛ و ئیمه‌ هیمان له‌ لایه‌نه‌یل تر داواكه‌یمن وه‌رده‌وامى بیه‌نه‌ گفتوگوو له‌ خاتر دامه‌زرانن حكوومه‌ت".

له‌ باوه‌ت هه‌ڵوێست یا موقف لیست عیراقیه‌ له‌ به‌شدارى نه‌كردن له‌ هه‌ر حكوومه‌تیگ نورى مالكى سه‌رۆكایه‌تى بكه‌ید، و داواكردنى له‌و فراكسیۆنه‌گانتر ك هاوپه‌یمانى وه‌لیه‌و بكه‌ن ئه‌را دامه‌زرانن حكوومه‌ت، سه‌عدوون وت:"له‌ گفتوگووه‌گانمان  وه‌ل هاوپه‌یمانى نیشتمانى داوا له‌ ئه‌و لایه‌نه‌گانتریش كه‌یمن به‌شدارى بكه‌ن له‌ دامه‌زرانن حكوومه‌ت و هه‌میشه‌ له‌ ژیر چه‌تر ئۆپه‌راسیۆن سیاسى بوون ئه‌را خزمه‌تكردن هاوڵاتى عیراقى ك ده‌نگ داپیان".

هاوپه‌یمانى نیشتمانى هه‌ڵوێست خوه‌ى له‌ داواكاریه‌گان ئئتلاف فراكسیۆنه‌یل كوردستانى له‌ سه‌ر زووان نوێنه‌ر خالد ئه‌سه‌دى نیشان دا ك له‌ په‌یوه‌ندییگه‌ى وه‌ل ماڵپه‌ڕ شه‌فه‌ق ئویشى:" گفتوگووه‌یل وه‌رینمان زه‌مینه‌ خوه‌ش كردن ئه‌را یه‌كلاكردن ڕه‌وت یا مه‌سار گفتوگوو له‌ ناوبه‌ین لایه‌نه‌یل سیاسى، و ئیمه‌ هه‌وه‌جه‌مان وه‌ گفتوگوو ڕى خوه‌شكه‌ر و ته‌مهیدى نیه‌، وه‌لى یه‌كسه‌ر گفتوگوو كه‌یمن ئه‌را دامه‌زرانن هه‌رسێ سه‌رۆكایه‌تى وه‌زیره‌یل و كۆمار و په‌رله‌مان ، و هه‌رچه‌نى گفتوگووه‌گان خێرا و گورجتر بوون زویتر حكوومه‌ت دامه‌رزیه‌ید ئه‌را خزمه‌تكردن ڕووڵه‌یل نیشتمانه‌گه‌مان".

ئه‌سه‌دى زیاتریش ئه‌وه‌ ئاشكراكرد :" گفتوگووه‌یلمان وه‌ل لایه‌ن كوردى قویل و به‌رهه‌مداره‌ و شایه‌ت بڕه‌سیمنه‌ هه‌ڵوێست یه‌كلاكه‌ریگ وه‌بى ته‌گه‌ره‌ و سه‌ختى، و له‌ باوه‌ت داواكاریه‌گانیشى ئیمه‌ ئویشیمن ك گشت فراكسیۆنه‌گان داواكاریه‌یل خوه‌یان دیرن ك ئیمه‌ ڕێز له‌ لیان گریمن و وه‌گووره‌ى په‌یمانه‌ یا معیاره‌یل ده‌ستوورى و ریككه‌فتنه‌یل سیاسى نووڕیمنه‌ پیانه‌و".

له‌لاى خوه‌یه‌و جه‌مال به‌تیخ نوێه‌ر لیست عیراقیه‌ له‌ په‌یوه‌ندیه‌گه‌ى وه‌ل ماڵپه‌ڕ شه‌فه‌ق له‌ى باوه‌ته‌و ئویشى:" له‌ یه‌كحالى بوین یا ته‌فاهمات پیشینیگ وه‌ل لیست كوردستانیه‌و دیریمن، چوینكه‌ ئه‌وان نووڕنه‌ به‌رژه‌وه‌ندیه‌یل ڕاسه‌قینه‌ى خوه‌یان ك په‌یوه‌سن وه‌ لیست عیراقیه‌، وه‌ تایبه‌تى ك لیسته‌گه‌مان له‌ زوورمى ناوچه‌یل ناكووكى دار وجوود دیرى".

به‌تیخ له‌ كووتایى قسه‌گانى زیاتریش وت:" زوورمى فراكسیۆنه‌یل سه‌ركه‌فتى له‌ لیست عیراقیه‌ خه‌ڵك نه‌ینه‌وا و سه‌لاحه‌دین و كه‌ركووكن، هه‌ر له‌وه‌ر ئه‌وه‌یشه‌سه‌ ك كورده‌یل تویه‌نن كیشه‌یلیان له‌ى ناوچه‌یله‌  وه‌ل لیست عیراقیه‌وه‌ چاره‌سه‌ر بكه‌ن".