هه‌ق ئابوورى

شفق نيوز

 

ئمڕوو له‌ وڵاته‌یل خوه‌رئاوا ك وه‌ پیشكه‌فتگ و لانه‌ى داناین فكر هه‌ق هاووڵاتیبوین هاوچه‌رخ دانریه‌ید له‌ ڕوى یاساییه‌و هه‌ق یه‌كسان هه‌س وه‌ل هه‌قه‌یل سیاسى و فكر و هویر وڕاى سیاسى.

 

وه‌ل ئه‌وه‌یشا له‌ڕوى كوومه‌ڵایه‌تى و ته‌نانه‌ت فه‌رهه‌نگى و زانستییشه‌و هه‌ق تاكه‌یل كه‌م تا فره‌ وه‌ گووره‌ى یاسا مقه‌یه‌تى كریاگه‌. له‌ خوه‌رئاوایش هه‌ق ئابوورى جوور هه‌قیگ هاووڵاتیبوین  تا وه‌رجه‌ 3-4 ده‌یه‌ وه‌جددى له‌وه‌رچه‌و نه‌گیریاوید، وه‌لى ئمڕوو  تا راده‌یگ له‌ خوه‌رئاوا هه‌ق ئابوورى جوور هه‌قیگ هاووڵاتیبوین دگان وه‌پیا نریاگه‌ وه‌ گووره‌ى یاساو له‌ڕى دامه‌زریاگه‌یل ده‌وڵه‌تى و سه‌ندیكایه‌یل و چه‌نه‌ها ریكخریاگ ناوده‌وڵه‌تیه‌و مقه‌یه‌تى له‌لى كریه‌یدو تائیسه‌یش له‌وه‌ر خاتر ته‌واوكردنى هه‌ر خه‌بات ئه‌ڕاى كریه‌ید.

 

ره‌سینه‌وه‌ له‌ هه‌ق ئابوورى هاووڵاتیبوین تا ئه‌و هه‌قه‌یل ئابوورى ریژه‌ییه‌ هه‌س جوور هه‌قیگ هاووڵاتیبوین له‌ خوه‌رئاوا، ئه‌وه‌ بیگومان وه‌گووره‌ى ئاڵشتكارى له‌ فامستن فۆرم ژیان ئاڵشت بوود وه‌ل وه‌ختاو بڕیگ پرسیار گریده‌ خوه‌ى، وه‌لى وه‌ل ئه‌وه‌یشا ئه‌گه‌ر  وه‌ چه‌و ریژه‌یى له‌ڕوى تاریخ سیاسى و كوومه‌ڵایه‌تى و جوگرافى فكر سیاسى و فه‌رهه‌نگى و شارستانیه‌ته‌و ته‌ماشا بكریه‌ید، ئه‌وه‌ له‌ تاریخ له‌یه‌ خاستر وه‌دى نیه‌كریه‌ید له‌وه‌ك ئیسه‌ هه‌س له‌ خوه‌رئاوا.

 

وه‌بى هه‌ق ئابوورى، هه‌ق هاووڵاتیبوین له‌ هه‌ر وه‌خت و شوونیگ  له‌ دروو فیشتر هویچ تر نیه‌.ئنجا ئه‌و وه‌خته‌ هه‌ق هاووڵاتیبوین وجوود دیرید ك هاووڵاتى نه‌ك ته‌نیا به‌شدار بوود له‌ ژیان سیاسى و له‌ڕوى یاساییه‌و جووریگ له‌ هه‌ق داشتوود، به‌ڵكوو بایه‌سه‌ به‌شدار و چارلاك و مقه‌یه‌تیكه‌ر بوود له‌ پایه‌یل ئابوورى و هاوردنه‌كار داهاته‌یل وڵات وه‌ شیوه‌یگ دیار و دروس.

 

هه‌ق هاووڵاتیبوین جوور هه‌قیگ سروشتى و ره‌وا له‌هه‌ر شوونیگ له‌ى دونیا په‌یمانه‌س ئه‌را خوه‌شبه‌ختى هاووڵاتیه‌یل و تاكه‌یل و ده‌سڵاتدارێتى مه‌ردم، وه‌لى جى داخه‌ تا ئمڕوویش به‌ش فره‌ى مه‌ردم جه‌هان نه‌ك ته‌نیا هه‌ق ئابوورى و هاووڵاتیبوین نه‌یرن وه‌تایبه‌ت له‌ ئاسیا و ئه‌فریقیاو ئه‌مریكاى لاتینى، به‌ڵكوو هه‌ق ژیان و مه‌ندن له‌ ژیانیانیش نیه‌، ئنجا له‌جیاى ئه‌وه‌ك خه‌بات ئه‌را خوه‌شگوزرانى و پیشكه‌فتن زانستى و فه‌رهه‌نگ شارستانى و ره‌سین وه‌ ژیانیگ خاس ئنسانى بكه‌ن، دوینید گشت خه‌باتیان ئه‌را ئه‌وه‌سه‌ له‌ ژیان بمینن ك هه‌رچه‌نى ئى ژیانیشه‌ كوڵه‌مه‌رگیش بوود.

 

د. محه‌مه‌د ئه‌مین گه‌ناوى

ج . أ