چه‌وه‌ڕێكردن له‌ وجوود ئاده‌میزاد

شفق نيوز

 

* وجوود له‌ناو جه‌هان: ئه‌گه‌ر ئاده‌میزاد وجوود داشتوود ئه‌وه‌ هه‌وه‌جه‌ وه‌ شوون یا جه‌هانیگ دیرێد ك له‌تى نیشته‌جى بوود، ئاده‌میزاد له‌هه‌ركووره‌ بوود هه‌وه‌جه‌ وه‌ شوونیگ دیرێد له‌تێ نیشته‌جێ بوود.

 

* وجوود وه‌ل كه‌سه‌یل تر: ماناى ئه‌وه‌سه‌ ئه‌گه‌ر ئاده‌میزاد وجوود داشتوود، بایه‌سه‌ وه‌ل كه‌سه‌یل تر بوود، چوینكه‌ كه‌سه‌یل تر هووكارن ئه‌را وجوود من، ئمجا ژیان وه‌ل كه‌سه‌یل تر وه‌و مانا نییه‌ ك ئه‌وان وجوود تۆ داگیر بكه‌ن و هه‌ق ئازادى له‌لید زه‌فت بكه‌ن، به‌ڵكوو له‌وه‌ختیگ هاید وه‌ل ئه‌وان هس وه‌ ئاسایش و ئارامى كه‌ید.

 

* نگه‌رانى: ماناى ئه‌وه‌سه‌ ئه‌گه‌ر ئاده‌میزاد بوود بایه‌س نگه‌ران بوود، ئه‌یه‌ قسه‌ى خود "هایدگه‌ر"ه‌، هووكار ئى نگه‌رانى ئاده‌میزادیشه‌ وجوود مردنه‌و سه‌رچه‌وه‌ى زانین یه‌یش ئاگاییه‌و یه‌یش جیاكه‌ر ره‌گه‌ز ئنسانیه‌ له‌ دروسكریاگه‌یل تر .

* فامستن: ئاده‌میزاد ره‌سه‌ن وه‌ فامستنه‌وه‌ نووڕیده‌ وجوود خوه‌ى نه‌ك وه‌شیوه‌ى كه‌مفامى. ئاده‌میزاد ره‌سه‌ن خوه‌ى بڕیار خوه‌ى ئه‌یاد.

 

د. محه‌مه‌د كه‌مال له‌ كتاوه‌گه‌ى له‌ژیر ناونیشان  "وجوود و داهێنان" بێجگه‌ ئه‌وه‌ مه‌رجه‌یله‌ مه‌رجیگ تر ئه‌را وجوود ئاده‌میزاد دانه‌ید ك ئه‌ویش داهێنانه‌، ئاده‌میزاد ره‌سه‌ن مه‌به‌س له‌لى ئه‌و ئاده‌میزاده‌یل ژیرده‌سه‌ نییه‌و خوه‌ى وجوودد خوه‌ى ئسبات ئه‌كا له‌كار و داهێنان.

 

ئه‌وه‌ك له‌یره‌ ئه‌خوازیم ئاماژه‌ وه‌پى بكه‌یم، هێزیگ تر و روحیگ تر و سحریگ تره‌  ك وه‌ قویلى له‌ وجوود ئاده‌میزاد هه‌س، ئه‌ویش "چه‌وه‌ڕێكردن"ه‌. چه‌وه‌ڕێ به‌شێگه‌ له‌ وجوود ئاده‌میزاد، ئمجا دوینید ئاده‌میزاد چه‌وه‌ڕێ خوه‌شییگه‌ یا چه‌وه‌ڕێ ته‌نگییگه‌ یا چه‌وه‌ڕێ وه‌دیهاتن خه‌ویگه‌، وه‌ل ئه‌وه‌یشا ترس وه‌دینه‌هاتن ئه‌و خه‌ویشه‌ دیرێد، ك یه‌یش ئاسوو چه‌وه‌ڕێكردن فراوانتر ئه‌كاو فیشتر به‌سێده‌مانه‌ چه‌وه‌ڕێكردنه‌و.

 

ئمجا فره‌جار چه‌وه‌ڕێكردن ئاده‌میزاد چه‌وه‌ڕێیگه‌ پڕ له‌ ئومید و ئاره‌زوو گه‌وراو ره‌سین وه‌ خوه‌شبه‌ختى و دوینید فره‌جاریش خه‌وه‌یلمان تیه‌یده‌ دى و بووده‌ راسى و ئاره‌زووه‌یلمان جیوه‌جى بوود ك چه‌نه‌ها ساڵ له‌ چه‌وه‌ڕێ بویمنه‌ ئه‌ڕاى.

 

محه‌مه‌د نه‌بى

ج.ا