ئيمه ئه‌سزيه‌يم كی هس وه‌پيمان ئه‌كا؟
ئيمه دڵسووزه‌يل فريه‌يگ ديريم له‌وانه‌گ هه‌وڵ فريه ئه‌يه‌ن له گه‌وراو بويچگ وه‌تايبه‌ت له‌وانه‌گ خيزان فه‌يلی پيك ئه‌يه‌رن، فريه‌جاريش ئه‌وانه له‌و خيزانه‌يله‌نه بوينه ك وه خوه‌شاڵی ژيانه جوور باقی عراقيه‌يل تر، وه‌لی مه‌سه‌له‌ی كار و خووگرتن وه‌پيه‌و له‌وه‌رانوه‌ر گووشنه‌دان و گرينگی نه‌داين وه ناسنامه‌و زووان و شيوه‌زووان و مێژوو جوور ئه‌وه‌گ وه‌سفيان ئه‌كريه‌يد مه‌سه‌له‌يگه هه‌وه‌جه وه ئوميد و په‌يكردن ديريد له‌ی رووژگارمانه.
له‌يرا قسه له‌بان ئه‌وانه‌گ ئه‌كه‌يم ك ئوميد گه‌ورا ديرن و دڵئارامی نه‌يرن و ئارامه‌و نيه‌ون و له خوه‌شی و ته‌نگی په‌شيمان دڵته‌نگی نيه‌ون، هه‌ر وه‌و خاتريشه فه‌يليه‌يل ئه‌وساو ئيسه‌يش هه‌ر وه‌و جووره بوينه‌و مينن ك مێژوومان شانازی وه‌پيانه‌و ئه‌كاو هويچ جياوازييگ له‌ی باوه‌ته‌و له‌ناونی ژن وپياو يا له‌ناونی پير و جايه‌ڵ نيه‌و نه‌وه‌يلمان وه‌ی شيوه په‌روه‌رده بوينه‌و له‌يوا فه‌زيله‌تيگ ديرن له مه‌ندنه‌وه‌و ئه‌زره‌ت و قوربانيدان و خووگرتن له‌بان ده‌سميه‌ت مه‌ردمان تر و حاشاكردن له خود، ك هه‌ر له‌وه‌ر ئه‌وه‌يش كار خواستيگه ك بگه‌رديم له‌شوون له‌يوا نه‌وه‌يگ يا نه‌وه‌يگ په‌روه‌رده بكه‌يم ئه‌و ئيراده داشتوون و وه‌ناو فه‌يليه‌يل و ناسنامه‌يان تيكه‌ڵ كومه‌ڵگا بوون و شانازی بكه‌ن وه‌و كرده‌وه‌يله ك باوگ و باپيره‌يليان ئه‌نجامی دانه له قوربانی و ده‌سكه‌فته‌يل له گشت بواريگه‌و.
ئه‌زه‌رت و راسی و ئامار و شماره‌يليگ خه‌ن ئاماژه وه خه‌ير ناكه‌ن له‌باوه‌ت ئاينده‌ی ئيچنه گه‌شبينی و خاسه‌يليگ، يه‌يش دژ مه‌سه‌له‌ی ته‌جه‌نوس و كيشمه‌كيشه‌يل موڵكداری و مه‌سه‌له‌ی ئنتماو لايه‌نگری نيه وه ئه‌وه‌گ هه‌ر وه‌و جووره بمينيم نه ئاواره‌يی و نه‌يش له نيشتمان، وه‌لی ئه‌تويه‌نيم ئاگر به‌رپا بكه‌يم له چه‌و كينه‌تداره‌يل و ده‌نگه‌يل نه‌شاز كپه‌و بكه‌يم، ك هه‌ر له‌وه‌ر ئه‌وه‌يش هه‌ميشه روودگايگ ئه‌را ئوميد و ده‌رفه‌تيگ ئه‌را به‌رزه‌وبوين و چه‌سپانن وجوود ديريد و باوه‌ڕ وه‌پی دريم و ئويشيمنه‌ی. يه‌يش بڕيگ له‌و خاڵه‌يله‌سه:
١- ئيمه مه‌نديمنه له‌بان روی وه‌ڕوی بوينه‌وه‌و ته‌ڵاقداين په‌شيمانی و ئه‌و چشته له‌هويره‌و برديمه ك ناوی "ناتوانايی"ه.
٢- ئاده‌ميزاد فه‌يلی له غوربه‌ت و ئاواره‌يی و هه‌ر شوونيگ هه‌ن و ده‌سيانيش به‌تاڵ بدێ، هه‌ر ئسپات خوه‌ی كردگه ك وجوود ديرن وه‌بی پشتبه‌سانن وه مه‌زڵوميه‌ت و وه‌رپرسيارێتی بی ده‌سكه‌فت.
٣- فه‌يليه‌يل مه‌ردمانيگن ك تائيسه هويچ قه‌ره‌بوويگ ماددی و گيانی نه‌كريانه، وه‌لی وه‌ل ئه‌وه‌يشا باس خراوی كه‌سه‌يل تر ناكه‌ن ك هه‌رچه‌نی دوسيه‌يليان له ئه‌رشيف خرياسه كنار.
٤- ئاده‌ميزاد فه‌يلی له‌و پيكهاته‌يله‌سه ك له‌ڕوی جه‌سه‌ييه‌و له گووشه‌يگ له‌ی زه‌ويه ئه‌ژيه‌يد وه‌پی ئويشن عراق، وه‌لی له‌ڕوی رووحيه‌و لانه‌ويزه‌و هس وه سه‌قامگيری ناكا له‌سای كوشتار برايه‌يلی له نه‌ته‌وه‌و ئايين و نيشتمان.
٥- ئويشن ك ته‌نانه‌ت له ئامار قوربانيه‌يل ئی پيكهاته ئاماريگ يه‌كگرتگ نيه له‌بانی كووك بوون، وه‌لی باس له‌وه ناكه‌ن ئه‌يانه مه‌ردمانيگن وه‌رده‌وام له چه‌وه‌ڕی ئه‌ژيه‌ن و له قاپيه‌گه‌ی نيشتنه، وه‌ل ئه‌وه‌يشا دڵه‌يليان سزياگه ئه‌را هه ردڵسزياگيگ له‌ی وڵاته‌و سه‌خی ته‌بيعه‌تن له يادكردن كيشه‌ی مه‌ردمان تر وه‌بی ئه‌وه‌گ كه‌سه‌يل تر هوير له كيشه‌يليان بكه‌ن يا هه‌وڵ ئه‌را چاره‌سه‌ركردنی بيه‌يد.
دروو نيه ئه‌گه‌ر بويشيم ك فه‌يله‌يل يه‌كه‌مين و هه‌قدارترين كه‌سن له‌وانه‌گ ئويشن ئيمه سته‌مديده‌يم، ئمجا له‌وه‌خت دابه‌شكردن ده‌سكه‌فت و هاوردنه‌وه‌ی مافه‌يل و بڕيار چاره‌نويس پيكهاته‌يل هه‌ر ئيمه زوڵمليكرياگ و نادياريم و هويچ ترويسكه‌يگ روشنايی نيه باس له يه‌كلاكردنه‌وه‌ی دوسيه‌ی فه‌يليه‌يل بكاو ته‌نانه‌ت بويه‌سه دويا دوسيه‌يگ ئه‌را ته‌ماشاكردن.
ليست شه‌هيده‌يل بی سه‌روشوون ليست دريژيگه‌و كووچ وه‌پيكرياگه‌يليش هيمان هانه غوربه‌ت له وه‌ختيگ ك گشت عراقيه‌يل مافه‌يل كه‌س وكار خوه‌يان دو وه‌رانوه‌ر و فيشتريش له ده‌زگايه‌يل كيمشه‌كيش موڵكداری و مافه‌يل ئاده‌ميزاد و ده‌زگای شه‌هيده‌يل و ده‌زگای زيندانيه‌يل سياسی و ده‌زگايه‌يل ره‌گه‌زنامه له حكومه‌ت وه‌رگرتنه، وه‌لی تائيسه‌يش دوسيه‌ی فه‌يليه‌يل يه‌كلاوه نه‌كردنه‌و جوور ده‌روازه‌ی وه‌رده‌واميگه ئه‌را رزق وڕووزييان وه هه‌ر شيوه‌يگ بوود و دوينيم ك له‌وه‌رچه‌و ره‌سانن و له كۆنگره‌و سيمينار و يادگاريه‌يليش له‌يوا باس ئه‌كه‌ن روخسار حكومه‌ته‌يل يه‌ك له‌شوون يه‌ك وه‌پی چه‌رمگ ئه‌كه‌ن له‌ڕی پيشكه‌شكردن ئامار درووكانی و بنديواری له‌باوه‌ت ئه‌و چشته‌يله ك گوايا پيشكه‌شی كردنه‌سه ئی پيكهاته، وه‌لی توانای ئه‌وه نه‌يرن وه وژدانه‌و گوزارش له ئاده‌ميزاديگ سزياگ بكه‌ن وه‌ی هه‌مگه ژانه‌و.
سوندس ميرزا
ج . أ
