دروو نوێنه‌ر و خوه‌شباوه‌ڕى ملله‌ت

شفق نيوز

  ئمڕوو له‌ى وڵات عراقه‌ دو چشت ریشگ كوتاو بویه‌سه‌ باو، یه‌كه‌میان: دروو ده‌له‌سه‌ى وه‌رپرس و نوێنه‌ره‌یل، دویه‌میش: خوه‌شباوه‌ڕى و په‌ند وه‌رنه‌گرتن ملله‌ت له‌ ژیان.

ئیمه‌ له‌ى باوه‌ته‌ نیه‌خوازیم باس له‌ یه‌كه‌ یه‌كه‌ى ئه‌و دروو ده‌له‌سه‌یله‌ بكه‌یم ك ئه‌را ماوه‌ى ده‌ ساڵه‌ گشت جاریگ نوێنه‌ره‌یل له‌وه‌ر خاتر به‌رژه‌وه‌ندى وه‌رته‌نگ خوه‌یان له‌كه‌دار خوه‌یان وه‌پى كه‌ن و هویچ متمانه‌یگ ئه‌را جاریگ تر له‌تى نایلنه‌و .

ئاشكراس ك مه‌رد ئه‌وه‌سه‌ قه‌وڵ خوه‌ى وه‌جى بارید و ڕى راسى و مه‌ردایه‌تى بگریده‌ وه‌ر، وه‌لى له‌یوا دیاره‌ له‌ى عراقى ئه‌وه‌نه‌ ده‌رده‌سه‌رى و كاولكارى و ماڵویرانى فریه‌ بویه‌، دى ملله‌تیش ئه‌وه‌نه‌ له‌گیان جاڕس بوینه‌و متمانه‌ى ژیان له‌ده‌س دانه‌ وه‌ل ئه‌وه‌یشا نوڕنه‌ ئه‌و تووزه‌ ئومیدو ئاره‌زووه‌ ك هویچ وه‌ختیگ له‌ خه‌ویش نه‌ینه‌سه‌ى چه‌و و ئویشن به‌شكه‌م ئیجاره‌ به‌ختمان خاس بارید و نوێنه‌ره‌یلمان لاوه‌ له‌ حاڵمان بكه‌ن و حورمه‌ت له‌ مووره‌ په‌نجه‌و ده‌نگه‌یلمان بگرن و له‌ ڕوى وژدانه‌و بنوڕنه‌ مه‌ویسى و ناله‌بارى ژیانمان و له‌ى جه‌ور و سته‌مه‌ قورتارمان كه‌ن ك له‌تى ژیه‌یم!!

وه‌لى بیگومان خه‌و ساڵه‌یل دویرو دریژ ملله‌ت سته‌مدیده‌ى ئى عراقه‌ مه‌گه‌ر رووژیگ بایده‌ دى ك حاكم مه‌حكووم بوودو گه‌ناته‌كار سزا بدریه‌ید، ك یه‌یش مه‌حاڵه‌ له‌ى جووره‌ وڵاتیگ ك پڕه‌ له‌ دز و جه‌رده‌و گه‌ناته‌كار په‌یجوورى و پرس وپرسكارى ئه‌ڕایان دامه‌زریه‌ید و ته‌لبه‌ن و زیندان چه‌و له‌لیان زاقه‌و بكاو دادگا سه‌ر وه‌خوه‌ى بوود و ریڕه‌و خوه‌ى بگریده‌ وه‌ر له‌ژیر دروشم ئازادى و دیموكراسى، وه‌نا دروو نوێنه‌ر و خوه‌شباوه‌ڕى ملله‌ت مه‌حاڵه‌ عراق بڕه‌سنیده‌ كنار ئارامى و ئاوه‌دانى و سه‌قامگیرى.

محه‌مه‌د ئه‌كبه‌ر

ج . أ