كۆنگره‌ى نه‌ته‌وه‌یى و پرووژه‌یگ ئه‌را چاره‌سه‌ر

شفق نيوز

و رووشنهویرى له‌ دید هویروڕاى تایبه‌ت خوه‌یانه‌و ده‌نه‌ى له‌یه‌ك و شیه‌وكردن ئه‌راى كه‌ن، یه‌یش ئاساییه‌و هه‌ق گشت لایه‌ن و كه‌سیگه‌و له‌هه‌مان وه‌خت گرینگیداینیشه‌ وه‌ى مه‌سه‌له‌ ك هه‌وه‌جه‌ وه‌ هویر وئه‌ڕاى چوین جیاواز دیرید.

 

له‌ گام ئمڕوو ئه‌را سازكردن كۆنگره‌ى نه‌ته‌وه‌یى، ئه‌وه‌ك گرینگه‌و بایه‌سه‌ بووده‌ سه‌رچه‌وه‌ى لێدوان و تاوتویكردن وه‌ مه‌رام رووشنه‌وكردن فیشتردیدو ئاراسته‌یل ئه‌و پرووژه‌، ئه‌ویش ئه‌و په‌یام سه‌رۆك مه‌سعود به‌رزانیه‌سه‌ ك له‌دانیشتن حزبه‌یل سیاسى هه‌رچوار پارچه‌ى كوردستان له‌ هه‌وڵیر ئاشكراى كرد جوور ره‌نگڕیژكردن و دياريكردن بنه‌ڕه‌ت، ك ئه‌ویش ئاكام گفتگوو و تاوتویكردن فكره‌و هویروڕاى چه‌نه‌ها ساڵه‌ى ناونى حزبه‌یل سیاسى كورده‌ له‌ كوردستان وه‌گشتى.

له‌يرا تويه‌نيم بويشيم ئامانج كۆنگره‌ى نه‌ته‌وه‌یى كورد، چه‌نه‌ها خاڵ سه‌ره‌كى گریده‌ خوه‌ى، ك پیكهاتنه‌ له‌يانه‌:

* وه‌ره‌و نوابردن بار كورد له‌هه‌ر چوار پارچه‌ى كوردستان له‌ڕى داناین سیاسه‌ت و یه‌كده‌نگى كورد له‌ ناوچه‌گه‌.

* جه‌ختكردن له‌بان خه‌بات سیاسى و مه‌ده‌نى.

* داناین ریككه‌فتنیگ كوردستانى ك وه‌ جووريگ گشت حزب و لایه‌نه‌یل سیاسى كوردستان وه‌پیه‌و پابه‌ند بوون.

* دیاریكردن سیاسه‌تیگ نه‌ته‌وه‌یى له‌گشت ده‌زگاو كه‌ناڵه‌یل ره‌سانن كوردى و كوردستانى.

* خودئاماده‌كردن ئه‌را هه‌ر ئه‌گه‌ر و رویداگیگ تازه‌ له‌هه‌ر پارچه‌یگ كوردستان و ناوچه‌گه‌و جه‌هان، ك كاریگه‌رى و ره‌نگدانه‌وه‌ له‌بان مه‌سه‌له‌ى كورد داشتوود.

ئنجا ئه‌و ئاڵشتكاریه‌یله‌ ك هاتنه‌سه‌ بان هاوكیشه‌یل سیاسى و سه‌نگ هیز و پایه‌و كاریگه‌رى فكره‌ى دیموكراسیانه‌و ئازادیخوازانه‌ له‌ جه‌هان، شووڕش تازه‌یگ له‌ په‌یوه‌ندى و هه‌ق و ده‌سڵات و سستم سیاسى هاورده‌سه‌ به‌رهه‌م، ك یه‌یش هه‌وه‌جه‌ وه‌ وازبوین و له‌یه‌كڕه‌سینه‌وه‌ دیریدو له‌ى وه‌خته‌یلیشه‌ بایه‌سه‌ كورد له‌ هه‌ر چوار پارچه‌گه‌و جه‌هان هاوكار یه‌كترى بوون له‌ڕوى ئابوورى و سیاسى و كوومه‌ڵایه‌تى و فه‌رهه‌نگى و ره‌سانن.

مقه‌یه‌تیكردن ده‌سكه‌فته‌یل كورد وه‌تایبه‌ت هه‌رێم كوردستان و پشتگیریكردنى ئه‌را وه‌ده‌سهاوردن هه‌قه‌یل ده‌ستوورى و سیاسى و سروشتیه‌یلى له‌ عراق كار خواستیگه‌ جوور قویلایى ستراتیجى نه‌ته‌وه‌یى ئه‌را پارچه‌یل تر كوردستان وه‌ل مقه‌یه‌تیكردن سفه‌ته‌یل دیموكراسیه‌ت و هه‌ق ئازادى و داناین مه‌رجه‌عیگ سیاسى نه‌ته‌وه‌یى ك وه‌ل ده‌سڵات و ناوه‌نده‌یل سیاسى و ئابوورى و فه‌رهه‌نگیه‌یل ناوچه‌یى و ناوده‌وڵه‌تى په‌یوه‌ندى و مامڵه‌ بكاو بتویه‌نید میكانیزم یه‌كخستن كاروبار مه‌سه‌له‌ى كوردستانى دیارى بكا.

ماناى ئه‌وه‌سه‌ كۆنگره‌ى نه‌ته‌وه‌یى كورد پرووژه‌یگه‌ ئه‌را چاره‌سه‌ر كیشه‌یل نه‌ته‌وه‌ى كورد له‌بان ئاست ناوخود هیز و حزبه‌یل سیاسى و له‌هه‌مان وه‌خت وه‌ل ده‌وڵه‌ته‌یل داگیركه‌ر كوردستان و هیز و به‌رژه‌وه‌ندیه‌یل جیاواز ناوده‌وڵه‌تییش، هه‌ر له‌وه‌ر ئه‌وه‌یش با پشتگیر و ده‌سمیه‌تده‌ر سه‌رۆك بارزانى و هاوكاره‌یل دڵسووز بویمن له‌ سه‌رخستن كۆنگره‌گه‌ وه‌ شیوه‌یگ گشتگیر.

نه‌وره‌س ره‌شید

ج . أ