ئه‌خوازن حكوومه‌ت هه‌رێميش زينگ وه‌چاڵ بكه‌ن

شفق نيوز

كوردستان عراق ك كورد وه‌زوور ناوی نه‌ێده‌ فێدراڵی ناسرياگه‌ ك وه‌ خوين سه‌دان هه‌زار شه‌هيد و ئه‌نفال و كيمياواران و جينۆسايد و قوروانيداينه‌يل فره‌يگ وه‌ده‌س هاتگه‌ و ئوميد ده‌وڵه‌ت سه‌روه‌خوه‌ی كوردی له‌ناو نه‌خشه‌ی ئی هه‌رێمه‌ جی گرتگه‌؛ وه‌لی وه‌داخه‌و له‌شوون داگيركردن و به‌شه‌وكردن خاك كوردستان هه‌ر وه‌ختيگ كورد تواستگه‌ هه‌ناسه‌ی وه‌ده‌وڵه‌تبوين بكيشێد، گورگه‌يل چوارده‌وری په‌لاماری دانه‌و ڕێ هه‌ناسی بڕينه.‌‌ ئيسه‌يش ك كورد له‌ باشوور كوردستان بويه‌سه‌ خاون حكوومه‌تيگ نيمچه‌ سه‌روه‌خوه‌ی، وه‌ناو هاوسايه‌يل، جوور هه‌ڕه‌شه‌يگ ته‌ماشای كه‌ن و وه‌وه‌رده‌وامی ته‌قالا كه‌ن نوای گه‌شه‌كردن ئی هه‌رێمه‌ بگرن. وه‌لی له‌ی چه‌ن ساڵ دوياخره‌ ك له‌ ساێ حكوومه‌ت هه‌رێم، كوردستان گه‌شه‌ و پێشكه‌فتن وه‌رچه‌ويگ وه‌خوه‌يه‌و دی و بويه‌ ماكێت ده‌وڵه‌تيگ سه‌روه‌خوه‌ی كوردی له‌ ئاينده‌ و له‌لايگ تريش به‌سانن كۆنفرانس نه‌ته‌وه‌يی كوردستان له‌ هه‌رێم ك پێشبينی بڕياره‌يل گرنگيگ له‌تی ئه‌كريا، بويه‌ سه‌به‌ب ئه‌وه‌گ ده‌وڵه‌ت ئيران وه‌تووپواران كردن سنووره‌يل و توركيايش وه‌ئۆپه‌راسيۆنه‌يل سه‌ربازی خوه‌ی له‌ناو خاك هه‌رێم، په‌لامار كوردستان بيه‌ن و له‌ی لايشه‌و حكوومه‌ت عراق وه‌ كێشه‌ دروسكردن له‌ ناوچه‌يل داوڕياگ، هه‌رێم كوردستان خستيه‌سه‌ ژێر فشار. يه‌يش له‌وه‌ختيگه‌ ك كورد ئه‌گه‌ر له‌ به‌شه‌يل تر كوردستان جارێ كێشه‌ داشتوود وه‌لی له‌ عراق ئيسه‌ به‌شدار حكوومه‌ت و په‌رله‌مانه‌. وه‌باوه‌ڕم پيلان ئيسه‌ی داگيركه‌ره‌يل كوردستان، زينگ وه‌چاڵ كردن حكوومه‌ت هه‌رێم كوردستان و له‌ناوبردن ئی ئه‌زموون كورديه‌سه‌ له‌ باشوور كوردستان، وه‌لی وه‌داخه‌و وه‌رجله‌ ئه‌وه‌گ هاوسايه‌يلی حكوومه‌ته‌گه‌ی زينگ وه‌چاڵ بكه‌ن، كورد ديرێ خوه‌یكوشی كه‌ێد، ئه‌ويش وه‌خاتر يه‌كنه‌وين وتار سياسی و يه‌كنه‌گرتگی ماڵ كورده‌ له‌وه‌راوه‌ر پيلانه‌يل شووم داگيركه‌ره‌يل ك سه‌رۆك هه‌رێم كوردستان زياتر له‌ جارێگه‌ داوای يه‌كڕزی و يه‌كخستنی ئه‌كا، چوينكه‌ گشتمان هايمنه‌ ناو ئی كه‌شتيه‌ و ئه‌گه‌ر نقوم بوود گشتمان له‌ناو ئی ده‌ريا خنكيه‌يمن. ئمجا ئی وه‌رپرسياريه‌تی نه‌ته‌وه‌ييه‌ كه‌فێده‌ مل گشت هێز و لايه‌نه‌يل كوردی له‌ چوار پارچه‌ی كوردستان، وه‌تايبه‌ت ) PKK و PJAK) ك ئيسه‌ ئيران و توركيا وه‌ بيانگ ده‌س وه‌شانن له‌ هێزه‌يل ئه‌وان سه‌روه‌ری هه‌رێم كوردستان خه‌نه‌ ژێر پا و هاووڵاتييه‌يل بێ تاوان نيشته‌جی ناوچه‌يل سنووری كه‌نه‌ قوروانی. له‌ی وه‌خته‌ ك ڕووژهه‌ڵات ناوڕاس كه‌فتيه‌سه‌ وه‌ر شه‌پۆل ئاڵشتكاری و فره‌ له‌ هاوكيشه‌يل سياسی ناوچه‌گه‌ ديرێ ئاڵشته‌و بو‌ود، په‌نابردن ئه‌را چه‌ك خزمه‌ت وه‌ كێشه‌ی كورد ناكا و ) PKK و PJAK)يش ك دروشميان يه‌كگرتن چوارپارچه‌ی كوردستانه‌ بايه‌د يه‌ خاس بزانن ك هه‌ڵگردن چه‌ك و كوشتن چه‌ن سه‌رباز و جه‌ندرمه‌يگ بيجگه‌ له‌ زه‌ره‌ر ڕه‌سانن وه خوه‌يان و‌ ملله‌ت كورد له‌ كوردستان هويچ خزمه‌تيگ وه‌ كێشه‌ی كورد ناكا، چوينكه‌ له‌ی سه‌رده‌مه‌ په‌نابردن ئه‌را چه‌ك و جه‌نگ و توندوتيژی له‌سه‌رتاسه‌ر دونيا وه‌ تيرۆر و هه‌ڕه‌شه‌ ئه‌را بان ئاسايش نه‌ته‌وه‌يی ملله‌ته‌يل له‌قه‌ڵه‌م دريه‌ێد و په‌يڕه‌وكردن ئی سياسه‌ته‌ هيلێد له‌ناو ليست تيرۆر وڵاته‌يل بمينن و له‌لايگتريشه‌و هه‌رێم كوردستان وه‌بيانگ بوين چه‌كداره‌يل پژاك و په‌كه‌كه‌ تويش په‌لامار ده‌وڵه‌ته‌يل  ئيران و توركيا هاتگه‌. له‌ كووتايی بايه‌د يه‌ بويشم ك بيلا ئه‌زموون حكوومه‌ت هه‌رێم ك ده‌روه‌چ ئومێد ملله‌ت كورد له‌ چوار پارچه‌ی كوردستانه‌ نه‌كريه‌ێده‌ قوروانی سياسه‌ته‌يل غه‌ڵه‌ت و به‌رژه‌وه‌ندی ملله‌ت له‌وه‌رچه‌و بگيريه‌ێد چوينكه‌ ئی هه‌رێمه‌ ك وه‌خوين دڵ وه‌ده‌سهاتگه‌ ئه‌گه‌ر له‌ده‌س بچوود مه‌حاڵه‌ جاريگ تر سه‌ر بگرێ.

 

ئاراس جه‌واد