ژیان خڕاته‌یل له جه‌هان
خڕاته‌یل تا ئیسه‌یش مقه‌یه‌تى له داب ونه‌ریت خوه‌یان كردنه ك سه‌ده‌ها ساڵ وه‌رجه ئیسه له‌بانى ژیانه‌و ئه‌و ژیانیشه ك له‌تى ژیه‌ن فریه خوه‌شه له‌لایان، وه‌ل ئه‌وه‌یشا وه‌چه‌و سووكیگه‌و ته‌ماشاى ئه‌و كه‌سه‌یله ئه‌كه‌ن ك جوور خوه‌یان خڕات نین و مه‌ردمان تر وه جفتیار ده‌نه قه‌ڵه‌م، ك مه‌رام له جفتیار ئه‌وه‌سه زه‌وى وزار شیواننه‌و هه‌ر وه‌و خاتریشه خوسه‌یان تیه‌یگ له‌لیان .
خڕاته‌یل له گشت وڵاتیگ ته‌نیا ناویگ دیرن، ته‌نیا له وڵات فره‌نسا نه‌ود په‌نج ناو دیرن، ژنه‌یلیانیش هه‌میشه جنگ ره‌نگامه پووشن ، شیوه‌ى قسه‌كردنیان وه‌ل یه‌كترى جیاوازه، ك هه‌رچه‌نى له بنه‌ڕه‌ته‌و وه‌یه‌ك زووان قسه ئه‌كه‌ن، وه‌لى هه‌ر مه‌ردمانیگ و جیاوازن له مه‌ردمیگ تر ، ئمجا بنه‌ڕه‌ت زووانه‌گه‌یانیش ناسریاگه وه رۆمان خڕاته‌یل هنگارى"كالدیراش".
ئى خڕاته‌یله له بنه‌ڕه‌ته‌و نه‌خوه‌نه‌وارن و زووانیگ تایبه‌تیگ نه‌یرن، هه‌ر له‌وه‌ر ئه‌وه‌یش كلتوور و داب و نه‌ریتیان هه‌ر وه‌زووان له نه‌وه‌یگه‌و ئه‌را نه‌وه‌یگ تر جیواز ئه‌دێ، خڕاته‌یل حه‌ز له واران ناكه‌ن، چوینكه واران رى هامشوو له‌لیان گرید و فیشتریش دوشمن ئاو ده‌ریاچه‌یلن .
هاوسه‌رگیرى له‌لاى خڕاته‌یل فریه پیرووزه، ته‌ڵاقیش له‌لایان نیه مه‌گه‌ر وه ده‌گمه‌ن، ژنخوازینیش له‌ناویان چه‌ن شیوه‌یگ دیرید ، بریگ له‌لیان وه ڕواكیان و بڕیگیش وه سه‌ندن دویه‌ته‌گه له‌باوگى وه پویل شینن، ئمجا له‌خوه‌یانیش نه‌باشه‌د دویه‌ت وه مه‌ردمان تر نایه‌ن.
هه‌ر خڕاتیگ و سێ ناو دیرید، ناویگیان نهێنى له‌ناو خیزانه‌گه‌ى و ناویگ تر له‌ناو هووزه‌گه‌ى و ناو سێیه‌میش له‌ناو گشت مه‌ردم، یه‌یش وه‌و خاتره‌سه تا ناونویس نه‌كریه‌ن له‌لاى ده‌وڵه‌ت و هه‌میشه نه‌ناسریه‌ن.
سه‌عید شوان
ج . أ
