ئايا شوون خاسیگ له‌عراق دیه‌و ئه‌ڕا خوه‌ى؟

شفق نيوز

ئمجا وه‌ هه‌رحاڵ كوومه‌ڵگاى وشك یا موعه‌قه‌دیگه‌و فره‌ سه‌خته‌ بڕه‌سنه‌وه‌ له‌وه‌ك شوون نه‌ختینه‌یگ  بوینیه‌یگه‌وه‌ ئه‌را وه‌خشین و گفتوگوو شارستانیه‌ت له‌ناونى چینه‌یلى، هووكار ئه‌وه‌یشه‌ ئه‌وه‌سه‌ ك عراق وه‌ قوناغه‌یل سه‌ختیگا گوزه‌ر كرد جویر زوڵم و به‌دبه‌ختى و شیوازه‌یل سته‌مكارى له‌لایه‌ن حكوومه‌ته‌یل وه‌رینه‌وه‌ دژ وه‌گشت چینه‌یل كوومه‌ڵگا وه‌بى جیاوازى، یه‌یش وه‌و مه‌عنا ك هویچ پیكهاته‌یگ  له‌ عراق وه‌بى زه‌ره‌د ده‌رنه‌چى له‌ژیر سایه‌ى سیاسه‌ت سته‌مكاره‌یل وه‌رین.

وه‌لى ئیسه‌ ئه‌و ڕووژگاره‌ هه‌ڵكه‌فتگه‌ ئه‌را وه‌دیكردن زه‌مینه‌ى خاسیگ  ئه‌را رووشنهویرى وه‌خشین له‌ عراق، ئیمه‌یش ئمڕوو زیاتر له‌وه‌خته‌یل تر هه‌وه‌جه‌ وه‌ كاراكردن نه‌خش یا ده‌ور ده‌زگایه‌یل دیریم ك ریڕه‌و گفتوگوو شارستانیه‌ت بگرنه‌وه‌ر ئه‌را نزیكه‌وكردن رووشنهویریه‌یل جوراوجوور له‌عراق و ره‌سین ئه‌را شیوازیگ  له‌ گه‌شبینى یا ته‌فائول راسه‌قینه‌ له‌وه‌ر خاتر عراقیگ  خاوه‌ن ژیار ك ڕى ئازادى و ڕاى و گوزارش مه‌نتقى له‌تى بگریه‌یگه‌وه‌ر ئه‌را رووشنهویرى كوومه‌ڵگاى عراقى وه‌گشت جووره‌ رینمایه‌یل دینى و مه‌زه‌ویه‌وه‌. له‌ڕاسى ئیمه‌ نیه‌زانیم له‌وه‌رچه‌ به‌عزه‌ كه‌سه‌یلیگ  باوه‌ڕیان له‌یواسه‌ ك گوایا عراق نیه‌تویه‌نیگ  وه‌شیوه‌ى خاسیگ  روى بكه‌یگه‌ ئاینده‌ى رووشنایگ ، ئه‌یه‌ تاڕاده‌یگ  تویه‌نیم بویشیم راسه‌، وه‌لى نه‌ك وه‌ یه‌كجارى، چوینكه‌تویه‌نریه‌یگ  نه‌ف له‌ ئه‌زموونه‌یل وه‌رین وه‌ربگیریه‌یگ  وه‌تایبه‌ت ئه‌و ئه‌زموونه‌یل غه‌ڵه‌ته‌و له‌ هه‌مان وه‌خت بگه‌ردیه‌یگه‌ شوون خاڵه‌یل كز و هه‌وڵداین ئه‌را خاسه‌وكردنیان وه‌ گووره‌ى ڕیڕه‌و وه‌خشین دینى و گه‌ردین له‌شوون شیوازه‌یل غه‌ڵه‌ت ئه‌وساو راسه‌وكردنیان و ڕه‌سین ئه‌را فه‌لسه‌فه‌ى گفتوگوو شارستانیه‌ت، ك یه‌یش یه‌كیگه‌ له‌كار ده‌زگایه‌یل ئنسانى و دینى، ك بیگومان ئیسه‌ وه‌خت ئه‌وه‌ هاتگه‌ لاپه‌ڕه‌یگ تر واز بكه‌یم و ڕاى وه‌رانوه‌ر وه‌ربگریم و له‌یرا داوا له‌گشت ریكخریاگه‌یل كوومه‌ڵایه‌تى و ده‌زگایه‌یل رووشنهویرى كه‌یم جموجویل بیه‌نه‌ خوه‌یان و به‌شدارى له‌و كۆنگره‌و دانیشتنه‌یله‌ بكریه‌یگ  ك په‌یوه‌ندى وه‌ رووشنهویرى وه‌خشین و گفتوگوو شارستانیه‌ته‌وه‌ دیرن، وه‌ل ئه‌وه‌یشا بایه‌سه‌ گشتمان ماناى دیموكراسیه‌ت بزانیم و هه‌ر وه‌ختیگ  له‌بان مێز گفتوگوو دانیشیم بایه‌سه‌ ئنتماى حزبیمان له‌هویره‌و بووه‌یم و له‌هه‌مان وه‌خت بایه‌سه‌ واز له‌ ریڕه‌و راسه‌قینه‌ى خوه‌مان ناریم ك ئه‌ویش ئنتمابوینمانه‌ ئه‌را خاك عراق.