ته‌خت ڕه‌وان هه‌مان كه‌ژاوه‌

شفق نيوز

ئه‌مین مومه‌یز له‌ی باوه‌تو ئویشید: ها له‌ هويرم ك گه‌شتكردن له‌به‌غداوه‌ ئه‌را شوونه‌یل تر ده‌ورگردى وه‌ سوارى وڵاخ بویه‌ جوور ئه‌سپ و قاتر و شتر، ك دویاخر كه‌مه‌ كه‌مه‌ وه‌ گووره‌ى پيشكه‌فتن ئه‌زموون ئی هووكاره‌يله‌ ئه‌وه‌ز كریاگه‌و پیشكه‌فتگه‌و بویه‌سه‌ عه‌ره‌بانه‌ى چوار تایه‌رى و جفتیگ وڵاخ كیشانه‌سه‌ى.

ئمجا هه‌رچه‌نی سه‌ره‌تا هامشووكردن ته‌نیا وه‌سوارى وڵاخ بویه‌ له‌ناونى شاره‌یل، وه‌لى دویاخر ئاسانتره‌و بویه‌و كریاسه‌ كه‌ژاوه‌، ئى كه‌ژاوه‌يشه‌‌ چوار گووشه‌ بوی وه‌ ته‌خته‌دار دروس كریاو جوور ماڵ قاپى و ده‌روه‌چه‌یش داشت و له‌ بانيشه‌و نیمچه‌ خڕ بوی و ئه‌سكه‌ملى له‌تی دانریا ئه‌را نیشتن و له‌ژیریشه‌و ‌ دو گله‌ دار ئه‌ڕاى دریژه‌و كریاو له‌دویا و له‌ نواوه‌ ره‌سياگه‌ كووڵ هه‌ردوگ وڵاخه‌گه‌و به‌سیا شانه‌یلیانه‌و، ئمجا گه‌شتكه‌ره‌يليش نیشتیانه‌ ناو كه‌ژاوه‌گه‌ تا ره‌سيانه‌ ئه‌و شوونه‌يله‌ ك گه‌شت ئه‌رای كرديان.

له‌ڕاسی ته‌خت ڕه‌وانیش هه‌مان ئه‌و كه‌ژاوه‌ بویه‌ ك نریاسه‌ كووڵ جفتیگ وڵاخه‌و ، ك هه‌ردوگ ناوه‌گه‌يش ناوه‌يليگن كوردی و دویریش نیه‌ فكره‌ی كورد دروسی كردويد، چوینكه‌ وجوود كورد له‌به‌غدا مێژوو كویه‌نیگ دیرید.

دویاخریش هه‌نای هووكار هامشوو ئاسانتره‌و كریاو بویه‌ وڵاخ و عه‌ره‌بانه‌، دى عه‌ره‌بانه‌گه‌ خریا دویاى وڵاخه‌گه‌و زویتر ڕه‌سیاده‌ شوون دیاریكریاگ. وه‌لى له‌ سه‌رده‌م ئيسه‌يش ته‌كنۆلۆجیاو پیشكه‌فتن و هاتن سه‌یاره‌یل جوراوجوور حاشا له‌و كه‌ژاوه‌ يا ته‌خت ره‌وانه‌ كرد و خوه‌ی شوونی گرت.

محه‌مه‌د مسته‌فا

ج . أ