كه‌س نه‌گونجیاگ له‌جى گونجیاگ!!

شفق نيوز

  راسه‌ ئى دونیا پڕه‌ له‌ چشت ئه‌ڵڵاجه‌وى و جوراوجوور، چوینكه‌ ئه‌گه‌ر بچیمنه‌ بندروس ئه‌و مه‌سه‌له‌ ك ئویشید"كه‌س گونجیاگ له‌ شوون گونجیاگ"ئه‌وه‌ بیگومان نموونه‌یگ له‌ى جووره‌ كه‌م دوینیم له‌ دام و ده‌زگایه‌یل عراقى و دوینیم كه‌سه‌یل گونجیاگ و شاره‌زا نه‌خریانه‌سه‌ ئه‌و شوونه‌یله‌ ك تایبه‌تمه‌ندى خوه‌یان له‌تى دیرن و ئاشنان وه‌ چوینیه‌تى سه‌رخستن و وه‌ڕیه‌وبردنى.

ئه‌را نموونه‌، دوینیم له‌ ده‌زگایگ كشتوكاڵى عراقى كه‌سه‌یلیگ كریانه‌سه‌ وه‌رپرس و كار وه‌ده‌س ك هویچ په‌یوه‌ندییگ وه‌ بوار كشتوكاڵه‌و نه‌یرن، یا دوینیم له‌ بوار رووشنهویرى وه‌رپرسیارێتى دریاسه‌ كه‌سه‌یلیگ ته‌نیا هه‌ر وه‌ناو رووشنهویرن و هویچ شاره‌زایى و تایبه‌تمه‌ندییگ له‌ى بوار رووشنهویریه‌ نه‌یرن و فریه‌یگ له‌ خاوه‌ن باوه‌ڕنامه‌یلیش هه‌ن جاده‌ پاكه‌و كه‌ن و كووڵكیشى كه‌ن رووژانه‌، بیجگه‌ ئه‌وه‌یش مه‌سه‌له‌ى موحاسه‌سه‌و به‌شبه‌شه‌وكردن وزاره‌ته‌یل و پۆسته‌یل گه‌وراى وڵاته‌گه‌ كاریگه‌رى گه‌ورایگ ناسه‌ بان ئاینده‌ نارووشن ئى عراقه‌ ك مه‌گه‌ر هه‌ر خودا خوه‌ى بزانید چاره‌نویسى وه‌ره‌و كاملا چوود. ئنجا ئى جووره‌ دامه‌زراننیگ له‌ دام و ده‌زگایه‌یل ده‌وڵه‌ت وه‌ ئاشكرا دیاره‌و مه‌ردمان فریه‌یگیش هه‌ن وه‌ ساخته‌كارى ره‌سینه‌سه‌ ئه‌و پۆست و پایه‌ ك له‌بنه‌ڕه‌ته‌و نه‌یابه‌د شوون ئه‌وان بوود، به‌ڵكوو بایه‌سه‌ شوون كه‌سه‌یل خاوه‌ن ئه‌زموون و به‌ڵگه‌دار بوون له‌و بواره‌، چوینكه‌ هه‌ر ئى مه‌سه‌له‌یشه‌ بویه‌سه‌ هووكار شكه‌ست و شیوانن ده‌زگایه‌یل عراقى له‌ جیوه‌جیكردن ئه‌رك و كاره‌یلیان وه‌شیوه‌ى دروسیگ و هه‌ر یه‌یش بویه‌سه‌ مایه‌ى گه‌ناته‌كارى و دویاخستن جموجویل په‌ره‌داین و پیشكه‌فتن و ره‌سین وه‌ ئامانجه‌یل خواست.

شێخ محه‌مه‌د خاڵ له‌ كتاو" سه‌رگوزه‌یشته‌یل ژیان" باس ئه‌كاو ئویشید: له‌ سلێمانى قازى بویم ، پاریزگاریگ هقووق ئه‌رامان هاوردن، رووژه‌یل جومعه‌ له‌ دیواخان دانیشتیاد ئه‌را ئه‌وه‌ك مه‌ردم بچنه‌ لاى، ئنجا ئویشید منیش رووژیگ جومعه‌ بوى چیمه‌ سه‌ردانى، نوڕستم له‌ شان خوه‌یه‌و دوڵابیگ گه‌ورا دانریاگه‌و پڕى كردگه‌ له‌ كتاو جوان و ره‌نگین و له‌بان دوڵابه‌گه‌یش چه‌ن كتاویگ داناوید، ك یه‌كیگیان ناونیشان كتاوه‌گه‌ وه‌ زه‌ڕكه‌فت له‌قه‌یه‌و نویسریاویدو نویساننه‌گه‌ى بویچگ دیارداو ئه‌رام خاس نه‌خوه‌نریاوه‌ له‌وه‌ر هویرده‌یى نویساننه‌گه‌ى و دویریش بوى له‌لیمه‌و، منیش وتم: ئه‌و كتاو چه‌س له‌و بانه‌؟ وت: ئه‌و كتاو" حه‌لاله‌ین"ه‌، ئنجا ئویشید منیش وتمه‌پى: كتاویگ ناوى حه‌لاله‌ین بوود نیه‌، ئه‌وه‌ بایه‌سه‌"جه‌لاله‌ین"بوود ك ته‌فسیریگه‌"جه‌لاله‌دین محه‌لى"نویساره‌ى و تا ناوڕاس قورئان و دى له‌ورا كووچ یه‌كجارى كردو له‌شوون ئه‌ویش "جه‌لاله‌دین سه‌یوتى" ته‌واوى كردگه‌ له‌بان شیوه‌ى وه‌رین و هه‌ر له‌وه‌ر ئه‌وه‌یش ناو نریاگه‌"جه‌لاله‌ین" چوینكه‌ دو جه‌لال ناو ته‌واوى كردنه‌.

ئیسه‌یش ئیمه‌ له‌ى سه‌رده‌م زانستى و پڕ ماریفه‌ت و سه‌رده‌م كه‌سه‌یل شاره‌زاو تایبه‌تمه‌ند، دوینیم دام و ده‌زگایه‌یل ده‌وڵه‌ت ناڵنن وه‌ده‌س كه‌س نه‌گونجیاگ له‌ شوون گونجیاگ، ك ئاقبه‌ت ئى كاریشه‌ نه‌ك هه‌ر ده‌رده‌سه‌رى و ماڵویرانى، به‌ڵكوو چه‌قیانیگه‌و قورتاربوین له‌تى سه‌خت و مه‌حاڵه‌.

ره‌زا گه‌رمیانى

ج . أ