ئه‌وه‌ڵجا زه‌مانه‌ت ئيجا شه‌راكه‌ت

شفق نيوز

دياره‌ ئيسه‌ ئه‌را دامه‌زرانن حكوومه‌ت تازه‌و ئاڵشتكاری بنه‌ڕه‌تی له‌ پرووسه‌ی سياسی و به‌شداريكردن گشت پيكهاته‌يل وه‌بی جياوازی، داوا له‌ لايه‌ن كوردستانييش ئه‌كريه‌يد به‌شداری بكا له‌ حكوومه‌ت عه‌بادی و نوێنه‌ر كورد ئاماده‌ی دانيشتنه‌يل بدێ.

ئاشكراس ك تا كووتاييهاتن ده‌سڵات مالكی خاڵه‌يل فريه‌يگ له‌ خواست و داواكاری كورده‌يل نه‌چيه‌ خانه‌ی په‌سه‌نكردن و جيوه‌جيكردن له‌وه‌ر سياسه‌ت چه‌فت و ناڕه‌وای وه‌رپرسه‌يل ئه‌و حكوومه‌ته‌ ك زوورم لايه‌نه‌يل عراقی دژايه‌تی ولايه‌ت سێيه‌م سه‌رۆكه‌گه‌ی كرد له‌وه‌ر حوكم نادادگه‌ری و ته‌كڕه‌ويانه‌ی. وه‌لی ئيسه‌ ئه‌و حوكمه‌ كووتايی وه‌پی هاورياو حكوومه‌تيگ تر شوونی ئه‌گريد ك هيمان نازانيم ره‌فتار و هه‌ڵسووكه‌فتی چوين ئه‌دێ وه‌ل هه‌وه‌جه‌و داواكاريه‌يل ملله‌ت سته‌مديده‌ی ئی وڵاته‌و به‌رنامه‌ی چه‌س ئه‌را ئاينده‌؟

له‌ی حاڵه‌تی كورد بايه‌سه‌ هه‌ر له‌ ئيسه‌و هوير له‌ به‌رژه‌وه‌ندی باڵای خوه‌ی بكاو جاريگتر خوه‌ی نه‌خاده‌ ناو كيشمه‌كيش بودجه‌و مووچه‌ی فه‌رمانبه‌ره‌يلی و ياسای نه‌فت و غاز و مه‌سه‌له‌ی چاره‌سه‌رنه‌كرياگ ناوچه‌يل كوردستانی ده‌يشت هه‌رێم ك هيمان يه‌كلاوه‌ نه‌كرياگه‌و موور ته‌عريب له‌بانيان لانه‌ورياگه‌. ئيسه‌ كورد وه‌رجه‌ گشت چشتيگ بايه‌سه‌ ئه‌وه‌ڵجا زه‌مانه‌ت ناوچه‌يی و ناوخوه‌يی و ناوده‌وڵه‌تی له‌باره‌ی داواكاريه‌يلی له‌ حكوومه‌ت ئاينده‌ دابين بكا ئيجا شه‌راكه‌ت و به‌شداری له‌تی بكا وه‌خاتر مسۆگه‌ركردن مافه‌يلی، چوينكه‌ ته‌نيا وه‌ گفت و قه‌وڵ بی كرده‌وه‌و بی به‌ڵگه‌ بار وه‌ مه‌نزڵ ناڕه‌سيدو نه‌بايه‌د جوور جاران متمانه‌ وه‌ هه‌مان ئه‌و مه‌ردمانه‌ بكه‌يد ك ئيسه‌يش هه‌ر خوه‌يان جڵه‌و ده‌سڵات ديرن و زوورمينه‌ن له‌ په‌رله‌مان، هه‌ر وه‌و خاتريشه‌ ئويشيم هه‌ر غه‌فڵه‌تيگ په‌شيمانی ها شوونی و كورد بايه‌سه‌ وه‌ مه‌رج و زه‌مانه‌ت له‌ به‌غدا بمينيد نه‌ك ئه‌را له‌ده‌سداين وه‌خت، يه‌يش له‌وه‌ختيگ ك حاڵ حازر نوڕستن وڵاته‌يل خوه‌رئاواو ئه‌مريكايش ئه‌را كورد پڕ له‌مايه‌ی گرينگی و گه‌شبينيه‌و ته‌نانه‌ت له‌ی وه‌خته‌يل دوياخريشه‌ سه‌نگ كورد له‌لای ئه‌مريكيه‌يل ئه‌را پشتگيريكردنی له‌ جه‌نگ داعش و جواودانه‌وه‌ی بانگه‌وازه‌گه‌ی مايه‌ی خوه‌شبه‌ختی و ئارامی وه‌رپرسه‌يل و سه‌ركردايه‌تی و ملله‌ت كوردستان بوی وه‌گشتی ئه‌را روی وه‌ڕوی بوينه‌وه‌ی ترۆريسته‌يل.

ره‌نجده‌ر ئاواره‌