سه‌گه‌یل له‌وڵاته‌یل خوه‌رئاوا ماڵ تایبه‌ت دیرن و له‌(عراق)یش زیاتر له‌ نیمه‌ى ملله‌ته‌گه‌ كرانشینن!

شفق نيوز

هه‌س له‌به‌خت ئاده‌میزاد وه‌ تایبه‌ت جایه‌ڵ جوانه‌یل، ك هه‌میشه‌ بایه‌سه‌ ئه‌را گه‌ردین له‌شوون وچان و ده‌ركردن شه‌كه‌تى و ته‌ز له‌ش سه‌ختى فره‌یگ بوینیگه‌ چه‌و.

ئیسه‌ له‌عراق مه‌سه‌له‌ى كرانشینى روى وه‌ر یا مه‌ساحه‌ى فراوانیگ گرته‌سه‌وه‌ر له‌ئه‌نجام گرنگى نه‌داین حكوومه‌ت وه‌ هاووڵاتیه‌یل عراقى وه‌تایبه‌ت جایه‌ڵ جوانه‌یلمان ك ئه‌گه‌ر بایگ و به‌راورد یا مقارنه‌یان بكه‌یم وه‌ل جایه‌ڵ وڵاته‌یل تر خوه‌رئاوایى(الدول الغربیه‌) له‌ڕوى ئه‌وه‌ك ئه‌ڕایان پیشكه‌ش كریه‌یگ له‌لایه‌ن حكوومه‌ته‌یلیان، ئه‌وه‌ بیگومان كه‌مته‌رخه‌مى فره‌یگ كریه‌یگه‌دى له‌ئاست خزمه‌تكردن وه‌ جایه‌ڵه‌یل و نه‌وین سه‌رچه‌وه‌یگ ژیان و ماڵ یا شوقه‌یگ تایبه‌ت ك له‌تى بتویه‌نیگ وه‌رده‌وامى به‌یگه‌ هه‌وڵداین و دابینكردن به‌خته‌وه‌رى خوه‌ى و خیزانى. ماناى ئه‌وه‌سه‌ له‌ى وڵاته‌ خاسترین و نه‌فدارترین مه‌ردم كومه‌ڵگا ك ئه‌ویش چین جایه‌ڵ جوانه‌یله‌و نه‌وه‌یل دویاڕووژن پشتگووش خریانه‌و له‌هه‌ق سه‌ره‌تایى خوه‌یان بیبه‌شن. یه‌یش له‌وه‌ختیگ ك داهات و ئابوورى عراق ئاست فره‌ به‌رزیگ خوه‌نیگه‌وه‌ له‌چه‌و وڵاته‌یل تر جه‌هان و ئه‌گه‌ر وه‌گووره‌ى ئه‌و خه‌یر و به‌یر عراقه‌ باس بكه‌یم ئه‌وه‌ بایه‌سه‌ ئه‌و مناڵیشه‌ ك هیمان ها زگ داڵگ شوقه‌یگ بیاشتووگ، وه‌لى وه‌چه‌واشه‌وه‌ دوینید فه‌قیره‌یلیگیش هه‌ن له‌وه‌ر ئه‌وه‌ك بیكه‌سن و شوونیگ له‌خوه‌یان نه‌یرن دوینیده‌یان له‌ناو جاده‌یل خه‌فن، وه‌لى له‌وڵاته‌یل خوه‌رئاوایى سه‌گه‌یلیانیش ماڵ و ئوتێل تایبه‌ت وه‌خوه‌یان دیرن و وه‌رجه‌ ماوه‌یگ له‌ یه‌كیگ له‌ كه‌ناڵه‌یل فره‌نسى له‌بان زووان میدیاى ئه‌و وڵاته‌ ئاشكراى ئه‌وه‌ كریا ك له‌فره‌نسا باڵه‌خانه‌یل گرانقیمه‌ت و تایبه‌تیگ ئه‌را (سه‌گ)ه‌یل ئه‌و وڵاته‌ دروسكریاگه‌، هه‌ڵبه‌ته‌ نه‌ك هه‌ر له‌فره‌نسا ئه‌و هه‌قه‌ وه‌ حه‌یوانیش دریاگه‌، به‌ڵكوو له‌ زوورم وڵاته‌یل تر خوه‌رئاواییش ئه‌و حاڵه‌ته‌ كریه‌یگه‌ دى. وه‌لى نوڕید له‌لاى ئیمه‌ له‌ى عراقه‌ شماره‌ى ئه‌و خیزانه‌یله‌ ك ماڵ تایبه‌ت وه‌خوه‌یان نه‌یرن زیاتره‌ له‌وانه‌ك ماڵدارن، چوینكه‌ ئیسه‌ ئه‌را نموونه‌: هه‌ر خیزانیگ وه‌لاى كه‌مه‌وه‌ سێ خیزان له‌لى كه‌فته‌سه‌وه‌ مه‌سه‌له‌ى بیكارى و نه‌وین وه‌زیفه‌یش له‌یوا كردگه‌ وه‌زع گوزه‌ران سه‌خته‌و بوود، بیجگه‌ ئه‌وه‌یش نرخ ماڵ رووژ وه‌ڕووژ روى له‌ زیابوین ئه‌كاو پیاو فه‌قیر و نه‌دار تواناى سه‌ندنى نه‌یریگ و ناچاره‌ ڕازى بوود وه‌ كرانشینى.

ئنجا زه‌ره‌دمه‌ن یه‌كه‌م جویر ئه‌وه‌ك له‌سه‌ره‌تا ئشاره‌ت وه‌پى كردیم چین جایه‌ڵ جوانه‌یله‌ ك فره‌یگیش له‌لیان له‌وه‌ر ئه‌وه‌ك ماڵ تایبه‌ت نه‌یرن نیه‌توان بچنه‌ ناو پرووسه‌ى هاوسه‌رگیرى و ژیانیگ كوڵه‌مه‌رگه‌وه‌. چوینكه‌ ئه‌گه‌ر ئاده‌میزاد له‌ى وڵات ئیمه‌یشه‌ له‌ڕوى ئنسانیه‌ته‌وه‌ ته‌ماشاى بكریاتاگ، ئه‌وه‌ بایه‌سه‌ خه‌یر وبه‌یر وڵاته‌گه‌ نه‌چیاتاگه‌ گیرفان دز و جه‌رده‌، بایه‌سه‌ وه‌ حورمه‌ته‌وه‌ هه‌ق و هساوى دیارى بویاتادو مه‌ینه‌تى و ره‌شبینى یا ته‌شائوم نه‌ویاتاده‌ به‌شى. وه‌لى تاڕاده‌یگ له‌هه‌رێم كوردستان چاره‌سه‌ر ئى مه‌سه‌له‌ كریاگه‌و حكوومه‌ت خه‌ریكه‌ گرنگى یا ئه‌همیه‌ت ده‌یگه‌ دروسكردن شوقه‌ى نیشته‌جیبوین ئه‌را خیزانه‌یل وه‌ قست دریژماوه‌، ك یه‌یش له‌مه‌سه‌له‌ى كرانشینى كه‌مه‌و كردگه‌، ئومیده‌واریم له‌ئاینده‌ى نزیكیگ باقى شاره‌یلتر عراقیش هه‌مان گام له‌تیان بنریه‌یگ و خیزانه‌یل فره‌یگ له‌گووشه‌ى زیندان بارنه‌ ده‌یشت و دڵه‌یلیان شاد بكریه‌ى.