په‌لاماره‌یل كووچ وه‌پیكردن(ته‌سفیر)

شفق نيوز

1980 بوى ، ك رژیم وه‌رین گشت به‌غز و كینه‌تى ڕشانه‌ كورده‌یل فه‌یلییا هه‌ر له‌وه‌ر خاتر ئه‌وه‌ك كورد بوین . وه‌ڕاسى یادگاریه‌یل تیه‌ڵ و مه‌ینه‌تیه‌یل ناخوه‌شیگ  بوین زیاتر له‌ نیم سه‌ده‌ له‌ ده‌ركردن و سزاو به‌دبه‌ختى و دویرى كه‌س وكار و له‌ده‌سداین زیاتر له‌ 15 هه‌زار جایه‌ڵ جوان له‌ زندانه‌یل رژیم .

له‌و خیزانه‌یلیشه‌ ك به‌دبه‌ختى فره‌یگ  هاته‌ بانیان باس كه‌ن و ئویشن : له‌ ڕووژ 5 نیسان ساڵ 1980 و له‌سه‌عات شه‌ش ئیواره‌ چه‌ن كه‌سیگ  له‌ ده‌زگاى ئه‌من له‌ناكاو چوارده‌ور ماڵمان دان و دویاى وشكانن فره‌یگ  گشتمان بردن ئه‌را ئه‌من و له‌یوا هویره‌و كردیم گوایا له‌وه‌ر  پرس و پرسكاریه‌و دویاخر وه‌رمان ده‌ن و ئویشن بچن ، وه‌لى كاره‌گه‌ جووریگ  تر بوى و گشتمان جیواز كردن ئه‌را ناوچه‌ى عه‌به‌خانه‌و له‌ورا چه‌ومان كه‌فته‌ چه‌ن خیزانیگ  و گشت ئه‌و خیزانه‌یلیشه‌ نه‌زانستن مه‌سه‌له‌گه‌ چه‌س ، دویاى نزیكه‌ى دو سه‌عات وه‌ سه‌یاره‌یل گه‌ورا جیوازمان كریا ئه‌را دایره‌ى شوناسنامه‌و له‌ورا چه‌ومان كه‌فته‌ (سه‌عدون شاكر)و گشت به‌ڵگه‌یگ  له‌لیمان داگیر كرد هه‌ر شوناسنامه‌و دوفتر خزمه‌ت و شایه‌ت جنسیه‌و گشت ئه‌و به‌ڵگه‌یل ره‌سمییشه‌ ك تایبه‌ت بوى وه‌خوه‌مان .

له‌دویاى سه‌عات 10ى ئیواره‌ى هه‌مان ڕووژ سه‌یاره‌یل ته‌لبه‌نكریاگ ئه‌ڕامان هاوردن و ناچار كریایم گشتمان سوار بویمن ، برده‌مان ئه‌را شوونیگ  نادیار و له‌مه‌رز به‌غدا ده‌رچیمن و نه‌زانستیم وه‌ره‌و كوورا به‌نه‌مان ، تا وه‌ڕجاو تكا یه‌كیگ  له‌و پۆلیسه‌یله‌ ك پاسه‌وان ئیمه‌ بوى وتیا (ته‌ڕو ووشگ  وه‌یه‌كه‌وه‌ سزیا)و وته‌پیمان وه‌ره‌و مه‌نه‌لى چیمن ، دویاى چه‌ن سه‌عاتیگ  دویاى نیمه‌ى شه‌و ره‌سیمنه‌ مه‌نه‌لى و له‌شوون ماوه‌ى كه‌میگ  سه‌یاره‌ى (ئیڤا)ى عه‌سكه‌رى ره‌سیه‌ لامان و ناچار كریایم و گشتمان وه‌ زوور سوار كردن و نه‌زانستیم وه‌ره‌و چ شوونیگ  به‌نه‌مان ، تا ئه‌وه‌ بوى ده‌مه‌و سوو ره‌سیمنه‌ شوونیگ  نه‌زانستیم كاملاس ، دى له‌ورا داگریایم ، دویاخر وه‌پا ڕیكردیم وه‌ناو شوونیگ  ترسناك و فه‌رمان دریا هه‌ركه‌سیگ  لاوه‌ بكا یا بنوڕیگه‌ وه‌ر وپشت خوه‌یه‌وه‌ یه‌كسه‌ر كوشیه‌یگ  وه‌ گولله‌ , دویاى نیم سه‌عات ڕیكردن ، سه‌ربازه‌یل هیشتنه‌مانه‌ جى و ته‌قه‌ كریان تا ڕخمان بچووگ ، ئه‌وه‌ بوى ره‌سیمنه‌ كنار چه‌میگ  و قه‌یریگ  ئاوایى كه‌فته‌ وه‌رچه‌ومان و نوڕستیم سێ كه‌س هاتن وه‌ره‌و پیریمان و ئه‌وسا زانستیم ناوچه‌ى (سۆمار)ه‌و یه‌كیگ  له‌و پیاوه‌یله‌ دوباره‌ چیه‌ڕا ئاوایه‌گه‌و چه‌ن گه‌ڵابه‌یگ  ئه‌ڕامان هاورد تا له‌چه‌مه‌گه‌ بپه‌ڕیمنه‌وه‌ ، وه‌ختیگیش ره‌سیمنه‌ ئاوایه‌گه‌ مه‌ردم ئاوایه‌گه‌ یارمه‌تیمان دان و خواردن و جنگ  فره‌یگیش دانه‌ پیمان و دویاخر خه‌وه‌ردار ده‌سڵات ئیرانى كردن و پرس و پرسكارى فره‌یگ  وه‌لمان كریا له‌باوه‌ت وه‌زع و هووكار مه‌سه‌له‌ى كووچ وه‌پیكردن یا ته‌سفیرمان ، چوینكه‌ لایه‌ن ئیرانى نه‌زانستن مه‌سه‌له‌گه‌ چه‌س تا ئه‌و سه‌عاته‌ ئیمه‌ ره‌سیمنه‌ لایان ، دویاى شه‌ش سه‌عات وه‌ سه‌یاره‌ى عه‌سكه‌رى ئیرانى جیواز كریایم ئه‌را ناوچه‌ى (سه‌رپیه‌ڵ زه‌هاو) ئه‌را ناو مزگفتگ  له‌وه‌ر ئه‌وه‌ك چه‌ن رووژیگ  وچان به‌یم و دویاى ئه‌وه‌یش به‌شمانه‌و كریا له‌ئوردگاى په‌نابه‌ره‌یل و دى له‌وراوه‌ گه‌شت به‌دبه‌ختى ئاواره‌یى ده‌س وه‌پیكرد تا رمیان رژیم سه‌دام .

ئیسه‌یش ئه‌وه‌سه‌ هه‌مان چاره‌نویس ك نیه‌زانیم وه‌ره‌و كوورا به‌یگه‌مان و هیمان مه‌سه‌له‌ى شوناسنامه‌و موڵك و موڵكدارى یه‌كلاوه‌ نه‌ویه‌و گشت ماڵه‌یلمان زه‌فت كریاگه‌و تائیسه‌یش ها له‌وه‌رده‌س وه‌رپرسه‌یل عراق و بیجگه‌ ئه‌وه‌یش چاره‌نویس جایه‌ڵ جوانه‌یل فه‌یلى كه‌سمان نیه‌زانیمنه‌ى و ته‌نانه‌ت قه‌وره‌یل وه‌جه‌میانیش نیه‌زانیم ها له‌كوورا . تویه‌نیم بویشیم كورده‌یل فه‌یلى تا ئیسه‌یش حكوومه‌ت تازه‌ى عراق هویچ هه‌وڵ خاسیگ  له‌باوه‌تیانه‌وه‌ نه‌یاگه‌و خه‌مه‌یلیان وه‌رده‌وامه‌ .