ئه‌راچه‌ ڕی له‌شيوانن جنگ كوردی ناگيريه‌ێ؟

شفق نيوز

چوينكه‌ تاريخ كورد وه‌ده‌س خوه‌ی نه‌نويسياگه‌و شيوياگه‌ ، وه‌لی دو تايبه‌تمه‌ندی هه‌س ك تائيسه‌ مقه‌يه‌تی له‌وجوود نه‌ته‌وه‌ی كورد كردنه‌ ك ئه‌ويش زوان و جنگه‌گه‌يه‌ .

هه‌ر له‌كويه‌نه‌وه‌ جنگ كوردی وه‌گشتی و جنگ ژنانه‌ وه‌تايبه‌ت ئه‌وه‌نه‌ جوان و تايبه‌تمه‌ند بويه‌ نه‌ك هه‌ر له‌لای خوه‌مان ، به‌ڵكوو لای گشت كوردناس و گه‌شتكه‌ره‌يل بيگانه‌و نه‌ته‌وه‌و هاوسايه‌يل كورديش مايه‌ی مه‌يلكيشان بويه‌و هه‌ميشه‌ نه‌ته‌وه‌گه‌مان وه‌ پووشانن جنگ جوان و نه‌ته‌وه‌يی درياسه‌ قه‌ڵه‌م ، ئه‌را نموونه‌يش : له‌ دو بوونه‌ی تايبه‌ت هاشمی ره‌فسنجانی سه‌رۆك كوومار وه‌رين ئيران دگان وه‌ ئه‌وه‌يا نا ك جنگ ژنانه‌ی كورد هه‌م جوانه‌و هه‌م هه‌وه‌جه‌ وه‌باڵاپووشی نه‌يريگ ، چوينكه‌ له‌ بنه‌ڕه‌ته‌وه‌ جنگه‌گه‌ ريك وپيكه‌ ، شايه‌ت يه‌يش يه‌كمجار بووگ كاروه‌ده‌سه‌يل و سه‌ركرده‌ی نه‌ته‌وه‌يل تر دگان وه‌ تايبه‌تمه‌ندی خاس وجوان و ره‌سه‌نيگ كورديا بنه‌ن .

مه‌به‌س باسه‌گه‌مان ئه‌وه‌سه‌ وه‌رجه‌ دو ساڵ وه‌ناو گويڕانكاری و مۆديلكردن جنگ ژنانه‌ی كورديه‌وه‌ چه‌نه‌ها جوور تازه‌ی جنگ په‌يا بويه‌ ك ئه‌وه‌نه‌ كوڵ و رويته‌و بويه‌ لايه‌ن ره‌سه‌نايه‌تی وه‌پيه‌و ديار نيه‌ . بيگومان كه‌سه‌يل فره‌يگ له‌ژن وپياگ فره‌ دڵگرانن له‌ی جووره‌ جنگه‌يله‌و ئويشن نيه‌وگ جنگ كوردی وه‌تايبه‌ت كه‌لپه‌ل ژنانه‌ وه‌و ده‌رده‌ بچووگ و نيه‌وگ ريگه‌ بدريه‌يگ جنگ ره‌سه‌ن كوردی له‌يوا له‌لی بايگ و ناپه‌سه‌نه‌و بكريه‌يگ ، به‌ڵكوو بايه‌سه‌ ريكخرياگه‌يل ژن و خه‌مخوه‌ره‌يل ومقه‌يه‌تيكه‌ر كلتوور و جنگ ژنانه‌ی كوردی ريگری له‌و هه‌تك كردنه‌ بگرن و نيه‌وگ ئه‌و جنگه‌يل ژنانه‌ ك له‌بان مۆديل تازه‌ كريانه‌ وه‌ناو جنگ كوردی ژنانه‌وه‌ بناسريه‌ن ، به‌ڵكوو بايه‌سه‌ جوور هه‌ر مۆده‌يگ تر جه‌هان ناو بنريه‌ن ، له‌وه‌ر ئه‌وه‌‌ ئه‌گه‌ر وه‌كرداريش هويره‌و بكه‌يم ئه‌رامان ئاشكرا بووگ ك ئه‌و جنگه‌يل تازه‌ وه‌هويچ شيوه‌يگ په‌يوه‌ندی وه‌ جنگ ره‌سه‌ن كورديه‌وه‌ نه‌يرن ، چوينكه‌ جنگ ره‌سه‌ن كوردی وه‌ناو و ناوچه‌و جووره‌يليه‌وه‌ ناسريه‌ن وه‌ك ( ده‌يشت دزه‌يی هه‌ولێر ، وڵات كۆيه‌ ، خۆشناوه‌تی ، بادينان ، ئێزيديه‌يل ، هه‌ورامان ، گه‌رميان ، سلێمانی ، موكريان ، كرماشان ، شكاك و مه‌نگورايه‌تی ، هه‌كاری ، بۆتانی ، وانی ، سه‌رحه‌دی ، دياربه‌كری ، حه‌له‌بی) . بيگومان هه‌ر يه‌كيگ له‌يانه‌ شيوه‌يگ ديريگ له‌ دويرانن و پارچه‌و گيرفان و قه‌يافه‌و كه‌مه‌ر و ته‌خت سينه‌و ناوپشت و يه‌قه‌و مل و داوان و هه‌ر له‌كويه‌نه‌وه‌ له‌يوا دروسكريانه‌و ئسپات ره‌سه‌نايه‌تی خوه‌يان كه‌ن و داب و ده‌ستوور ئه‌و ناوچه‌يل خوه‌يانه‌ نيشانده‌ن . ئمجا له‌يرا پرسيم ك ئايا ئه‌و جنگه‌يله‌ ك وه‌ی دوياخره‌ ئه‌و خانمه‌يله‌ وه‌ناو جنگ ژنانه‌وه‌ خستنه‌ی بازاڕه‌وه‌ جنگ كام ناوچه‌ی كوردستانه‌ ؟ بيگومان هويچ جواويگ نه‌يرن ئه‌را ئی پرسياره‌ ، چوينكه‌ وه‌هويچ جووريگ ئه‌و جنگه‌يله‌ نيه‌چنه‌ خانه‌ی جنگ ژنانه‌ی كورديه‌وه‌ . دی نيه‌زانيم له‌وه‌رچه‌ وه‌ده‌س خوه‌يان قه‌ور ئه‌را جوانترين و ره‌سه‌نترين و قيمه‌تدارترين سه‌رمايه‌ی كوردی هه‌ڵكه‌نن و وه‌ناو مۆدێله‌وه‌ گويڕانكاری تيه‌رنه‌ بانی ؟