فشار ئابوورى

شفق نيوز

 

یه‌یش بیجگه‌ هه‌وڵ فراوانیگ ئه‌را موڵه‌ت نه‌داین پاریزگایه‌یل تر عراق و دروسكردن وه‌ربه‌س له‌وه‌رده‌میان ئه‌را ئه‌وه‌گ سیستم فیدراڵى له‌ ناوچه‌یلیان دانه‌مه‌زرنن و له‌وه‌ر ئه‌وه‌گ گشت پاریزگایه‌یل خوارگ و ناوڕاس عراق سه‌ر وه‌ به‌غدا بوون.

له‌ڕاسى ئى ره‌فتاره‌یل حكوومه‌ت عراقه‌ ك له‌ ڕى مالكیه‌و ئه‌نجام دریه‌یدو وه‌ هاوكارى حسێن شه‌هرستانى په‌یڕه‌و ئه‌كریه‌ید دژ وه‌ خود ده‌ستوور عراق فیدراڵه‌، ك فیشتر له‌ 80% مه‌ردم عراق ده‌نگ له‌بانى دان.

ئیمه‌ى كورد وه‌ خواست و باوه‌ڕ خوه‌مان هاتیمنه‌و ئه‌را به‌غدا، چوینكه‌ رژیم سه‌دام له‌ شوون چه‌نه‌ها ده‌یه‌ له‌و راسیه‌ ره‌سیه‌و ك ناتویه‌نید له‌وه‌ فیشتر دوشمنایه‌تى ملله‌ته‌گه‌مان بكاو له‌وه‌ر خاتر مه‌ندنه‌وه‌ى خوه‌ى كوردستان هیشته‌جى و هویچ په‌یوه‌ندییگى وه‌ كوردستانه‌و نه‌مه‌ندو ته‌نانه‌ت وه‌ كرده‌وه‌ مه‌رزیش دیارى كریا، چوینكه‌ سوپاى عراقى و هیز پێشمه‌رگه‌ له‌ شوون دیاریكریاگ وه‌رانوه‌ر یه‌كترى جیگیر بوین و هویچ لایگ نه‌چیه‌ مه‌رز یه‌كترى.

وه‌لى وه‌ ڕمیان سه‌دام ئه‌وه‌ بوى كورد و سه‌ركردایه‌تى ئه‌وه‌ په‌سه‌ن كرد ك په‌یوه‌ندییگ دووسایه‌تى وه‌ل حكوومه‌ت تازه‌ى به‌غدا دروس بكا، ك كورد خوه‌ى نه‌خش سه‌ره‌كى داشت له‌و هه‌وڵه‌ و خوازیار ئه‌وه‌ بوى عراقیگ فیدراڵى، دیموكراسى، په‌رله‌مانى و فره‌یى دروس بكا وه‌ ئه‌وه‌گ هاوسه‌نگى نه‌ته‌وه‌یل تر له‌تى مقه‌یه‌تكریاگ بوود، وه‌لى جى داخه‌ هه‌ر له‌ سه‌ره‌تاوه‌ ئیمه‌ى كورد هس وه‌ ئه‌وه‌ نه‌كردیم ك له‌لایه‌ن ده‌سڵاتداره‌یل تازه‌وه‌ مه‌یلیگ هه‌س ئه‌را بنیاتناین عراقیگ فیدراڵى، چوینكه‌ وه‌ كرده‌وه‌ ئه‌وه‌ ده‌ركه‌فت ك وه‌ چه‌واشه‌ى ئه‌و ئه‌ڕاى چوینه‌ ره‌فتار كردیان، ك تا راده‌یگ ئیسه‌ وه‌ ته‌واوى هس وه‌ مه‌رام شاریاگ ئه‌و دیده‌ ئه‌كریه‌یدو دویریش نیه‌ ئه‌جنداى ده‌ره‌كییش له‌ پشتیه‌و بوود.

حكوومه‌ت به‌غدا دویاى ئه‌وه‌گ نه‌تویه‌نست ئابڵووقه‌ى هه‌رێم كوردستان له‌ ڕوى سیاسیه‌و بیه‌ید، هه‌وڵه‌یلى فیشتره‌و كرد ئه‌را ئابڵوقه‌ى ئابوورى و هه‌ر رووژیگ پاساویگ تازه‌ دوینیده‌و ئه‌را جه‌نگ ئابوورى دژ هه‌رێم و گرفت ئه‌خاده‌ وه‌رده‌م پیشكه‌فتن ئابوورى كوردستان، ك ئه‌ویش وه‌ وه‌كارهاوردن كارت بودجه‌.

ئیسه‌یش ئابوورى كوردستان تا راده‌ى خاسیگ گه‌شه‌ كردگه‌و له‌بان پاى خوه‌ى وسیاگه‌، ك سه‌ركردایه‌تى سیاسى كورد جوور كارتیگ بته‌و ئه‌تویه‌نید له‌ وه‌رانوه‌ر به‌غدا باریده‌ى كار، وه‌لى ئه‌یه‌ هه‌وه‌جه‌ وه‌ پشتگیرى مه‌ردم كوردستان دیریدو بایه‌سه‌ ملله‌ته‌گه‌مان له‌ى وه‌خته‌یل چاره‌نویسسازه‌ یه‌كڕزى خوه‌ى و لایه‌نگرى ئه‌را سه‌ركردایه‌تى سیاسى له‌ وه‌رانوه‌ر به‌غدا نیشان بیه‌ن، ك وه‌ راسى ئیسه‌یش وه‌خت نیشانداین ناڕه‌زایى نیه‌، چوینكه‌ به‌غدا ئه‌یه‌ وه‌ كزیمان هساو ئه‌كا.

سه‌لام عه‌بدوڵڵا

ج . أ